Janë siguruar 120 mijë euro për ndërtimin e rrugëve lokale në Padalisht dhe Tërnovë

27.11.2017

Në kuadër të programit për zhvillim të infrastrukturës rurale të financuar nga Bashkimi Evropian dhe bashkëfinancuar nga buxheti kombëtar, Komuna e Gostivarit siguroi fonde në vlerë prej 120.000 euro. Programin e implementon Ministria e Financave, ndërsa i njëjti administrohet nga Banka Botërore.

Komuna e Gostivarit fitoi të drejtën për të shfrytëzuar BE grant në lartësi prej 90.000 euro për ndërtimin e dy rrugëve lokale, njëra në fshatin Padalisht dhe tjetra në fshatin Tërnovë. Vlera e përgjithshme e projekteve është 120.000 euro dhe të njëjtit bashkëfinancohen nga buxheti kombëtar në vlerë prej 30.000 euro.

Pritet që me ndërtimin e këtyre rrugëve të përmirësohet komunikacioni në këto vendbanime dhe të njëjtit të lidhen më mirë me qytetin e Gostivarit. Përfitimet nga këto projekte drejtpërdrejt do t’i ndjejnë të gjithë banorët e komunës së Gostivarit dhe do të mundësohen kushte më të sigurta për qarkullimin e këmbësorëve dhe automjeteve.

Shërbimi për informim

 

NP “Parkingjet publike dhe gjelbërimi” aksion për krasitjen e drunjve dhe pastrimin e shtartit të luimit në fshatin Debresh

29.11.2017

Në vigjilie të stinës së dimrit, Ndërmarrja publike “Parkingjet publike dhe gjelbërimi”, është para përmbylljes së aksionit për krasitjen e drunjve në sipërfaqet publike në qytetin e Gostivarit.

“Për momentin jemi duke punuar në krasitjen e drunjve në parkun e vogël të qytetit dhe aksioni tashmë është në fazën përfundimtare. Do t’i shfrytëzojmë në maksimum ditët me mot të përshtatshëm për punë, që gjelbrimin dhe drunjtë t’i sjellim në një gjendje të kënaqshme”, thotë drejtori i kësaj ndërmarrjeje, Muzafer Zulbeari.

Nga ana tjetër, po kjo ndërmarrje ka ndërmarrë aksion edhe për pastrimin e shtratit të lumit përreth Xhamisë në fshatin Debresh. Nga kjo ndërmarrje njoftojnë se askioni i këtillë ndërmerret shkaku se i njëjti ka qenë përplot me hedhurina dhe se aksioni i këtillë ka qenë një kërkesë e banorëve të fshatit.

Aksione për pastrimin e shtretërve të lumenjve nëpër fshatrat e komunës së Gostivarit, do të realizohen në kontinuitet, varësisht nga nevoja.

Shërbimi për informim

Me ekspozitën “Çmimi i Nëntorit” dhe koncertin “Paqe e miqësi nëpërmjet tingujve” u përmbyllën manifestimet për Ditën e Pavarësisë në Gostivar

29.11.2017

Ekspozita tradicionale mbarëkombëtare  “Çmimi i Nëntorit”, e cila organizohet nga ana e SHAFM “Draudacum” nga Gostivari dhe me koncertin “Paqe e miqësi nëpërmjet tingujve” me mjeshtër eminent të skenës muzikore shqiptare nga Elbasani, ishin aktivitetet përmbyllëse të organizuara në Gostivar për shënimin e Ditës së Flamurit, e që u mbështetën nga Komuna e Gostivarit.

Dy eventet kushtuar 28 Nëntorit, i përcollën një numër i madh i qytetarëve të Gostivarit, si dhe përfaqësues të Komunës së Gostivarit.

Në mungesë të kryetarit Taravari, fjalë përshëndetëse në ndarjen e Çmimit të Nëntorit, mbajti këshilltari komunal dr. Besim Memedi,i cili mes tjerash theksoi:

“Fëmija që fle rritet, ndërsa një popull që fle vdes, thoshte Ismail Qemali. Kjo ngjarje kulturore, tregon se ne nuk jemi popull i cili fle. Më lejoni që të përcjell përshëndetjet e kryetarit Arben Taravari, i cili për arsye objektive nuk mund të marrë pjesë fizikisht, por është prezent me shpirt. 28 Nëntori është një ditë të cilën e kemi festuar dhe do të vazhdojmë ta festojmë si më të shtrenjtën e ditëve. Gëzuar ditën e Pavarësisë, Shqipëri! Gëzuar Ditën e Flamurit, shqiptarë! Gëzuar 28 Nëntorin! Sinqertisht, Arben Taravari”, përcolli urimet e kryetarit Taravari, këshilltari komunal dr. Besim Memedi.

Në koncertin “Paqe e miqësi nëpërmjet tingujve”, me drejtor organizativ këngëtarin nga Gostivari Hajdar Hajdari, publiku gostivaras pati rastin të kënaqet me tingujt e këngës shqipe, por edhe të muzikës ballkanike për të përcjell mesazhin e paqes, tolerancës dhe miqësisë ndërmjet popujve.

Shërbimi për informim

Drejtorët e shkollave u emëruan për profesionalizmin e tyre, e jo për përkatësinë partiake

29.11.2017

Falënderojmë degën e BDI-së në Gostivar që shqetësohet se si i kryejmë punët ne në Komunë. Vetëm se këta të BDI-së janë peng i së shkuarës dhe duke qenë se në kohën e tyre vendimet e tyre i merrte vetëm një njeri, ende mendojnë se autokracia vazhdon! Jo! Kemi lajme të mira edhe për BDI-në. Vendimet tek ne nuk merren vetëm nga kryetari i komunës, z. Arben Taravari, por nga të gjithë njerëzit kompetentë të autorizuar nga ligji, së bashku me kryetarin. Iku koha e diktatorëve! Në këtë kontekst sqarojmë opinionin e shqetësuar të BDI-së, se të gjitha veprimet e punësimit janë ndërmarrë në pajtim me profesionalizmin dhe jo si në kohën e shkuar që njerëzve ju shikohej përkatësia partiake, e jo kualifikimi profesional.

Dhe sado që në Gostivar të gjithë e njohim njëri-tjetrin, si duket këta të BDI-së nuk e dinë se zonja Shpresa Useini nuk është kryetare e Forumit të Gruas të Aleancës për Shqiptarët, e që do të ishte nder dhe kënaqësi po të ishte, pasi kjo zonjë është një mësuese e cila prej vitesh punon me profesionalizëm të lartë në Shkollën fillore “Ismail Qemali” dhe ishte kolektivi i kësaj shkolle ai që e propozoi për të qenë në detyrën e dhënë në këtë institucion.

Kryetare e Forumit të Gruas e Aleancës për Shqiptarët është znj. Afërdita Mislimi Hamza, për të cilën jemi krenarë që e kemi në radhët e grupimit tonë. Kështu pra, dega e BDI-së në Gostivar, për çdo paqartësi mund të kontaktojë me personat përgjegjës pranë Komunës, që herën tjetër mos të duken gënjeshtarë.

Faleminderit,

Komuna e Gostivarit – Shërbimi për informim

OSBE, SPB dhe Komuna e Gostivarit implementojnë projektin “Thuaji JO gjuhës së urrejtjes”

28.11.2017

OSBE dhe Reparti për preventivë pranë SPB – Tetovë, në bashkëpunim me Komunën e Gostivarit, filluan implementimin e projektit preventiv-edukativ “Thuaji JO gjuhës së urejtjes”.

Me këtë projekt dë të përfshihen nxënësit e viteve të para të katër shkollave të mesme publike të Gostivarit të cilët e ndjekin mësimin në gjuhën shqipe, maqedonase dhe turke.

“Projekti do të realizohet gjatë kësај dhe muajit të ardhshëm, ndërsa në kuadër të tij do të mbahen ligjërata speciale nga nëpunës të trajnuar profesional në fushën e përmirësimit të mirëkuptimit ndërmjet nxënësve me përkatësi të ndryshme etnike”, njofton znj. Aslian Snopçe – përgjegjëse e Departamentit për arsim.

Pas përfundimit të ligjëratave, do të shpallet konkursi letrar në temë “Jeto në harmoni me të tjerët”, ndërsa veprat e përzgjedhura si më të mira, do të prezantohen në një ekpozitë të veçantë, që do të ketë për qëllim ngritjen e vetëdijes tek të rinjtë për rëndësinë e tolerancës dhe respektit në mjediset etnikisht të përziera.

Shërbimi për informim

SHF “Ismail Qemali” shënoi Ditën e flamurit dhe patronatin e shkollës

28.11.2017

Me një program të pasur kulturor-artistik, nxënësit e SH “Ismail Qemali”, shënuan sot 28 Nëntorin – Ditën e pavarësisë, datë kjo që përkon edhe me patronatin e shkollës.

Në fillim të manifestimit, përfaqësues të Departamentit të arsimit dhe Kabinetit të kryetarit të komunës së Gostivarit, vendosën lule të freskëta te busti i arkitektit të pavarësisë së Shqipërisë, Ismail Qemali, që gjendet në oborrin e shkollës.

Programi artistik filloi me intonimin e himnit kombëtar, interpretuar nga kori i shkollës nën dirigjimin e pedagogut të muzikës Muhamet Azizi, për të vazhduar më pas me leximin e referatit kushtuar Ditës së pavarësisë nga ana e pedagoges së historisë, Diana Shabani.

“Historia kombëtare gjatë periudhës së ekzistimit të vet ka pasur ideologë, patriotë dhe rilindas, por vendin më të merituar në periudhën e rilindjes kombëtare e ka Ismail Qemali, i cili jo vetëm që është udhëheqës i lëvizjes kombëtare, por ai ishte edhe kryeministër i parë i Shqipërisë së pavaruar”, theksoi znj. Shabani dhe shtoi se është nder dhe kënaqësi që sot ky institucion mban emrin e tij.

Programi artistik vazhdoi me këngë korale interpretuar nga dy koret e shkollës, përgatitur nga pedagogët e muzikës Muahmet Azizi dhe Fjolla Iseini, solo-këngë dhe poezi me motive patriotike dhe lirike.

Manifesitmi kushtuar Ditës së Pavarësisë dhe patronatit të shkollës, u përmbll me Vallen tiranase, të perfomruar nga grupi valltar i shkollës.

Dita e Flamurit Kombëtar, sot u shënua edhe në shumë shkolla publike të Gostivarit, ndër të cilat edhe në Shkollën fillore “Forina” në fshatin Forinë.

Ndërsa mbrëmë në Qendrën për kulturë u mbajt manifestimi qendror në organizim të shkollave publike të qytetit dhe me mbështetje të Komunës së Gostivarit.

Shërbimi për informim

Emërohen u.d. drejtorë në të gjitha institucionet arsimore të komunës së Gostivarit

Emërohen u.d. drejtorë në të gjitha institucionet arsimore të komunës së Gostivarit

27.11.2017

Përmes një konference për shtyp, zëdhënësi i komunës së Gostivarit – Jasin Demiri, i bëri të ditur emrat e ushtruesve të rinj të detyrës drejtor nëpër institucionet përkatëse arsimore të komunës së Gostivarit.

Tre institucione do të vazhdojnë t’i menaxhojnë ushtruesit e deritashëm të detyrës, ndërsa në shumicën e shkollave tashmë janë emëruar drejtues të rinj. Siç e dini, kryetari i komunës Arben Taravari vizitoi disa nga shkollat dhe mori mendimin e kolektivit, por fakti që disa shkolla nuk arritit t’i vizitojë para se të emërojë ushtrues detyre, nuk do të thotë se ata janë anashkaluar”, tha Demiri.

Ai bërë të ditur se të gjithë ushtruesit e detyrës drejtorë, do të jenë nën mbikëqyrje edhe të komunës, edhe të kolektivit, prindërve dhe nxënësve dhe nëse konstatohet se ata nuk arrijnë të menaxhojnë siç duhet institucionin, në vend të tyre do të emërohen ushtrues të tjerë.

Ushtruesit e detyrës kanë mandat gjashtëmujor dhe të gjithë ata të cilët me nder dhe me sukses do ta kalojnë këtë fazë, nëse do të konkurrojnë në konkursin e regullt dhe nëse do t’i plotësojnë kushtet, do të përzgjidhen për drejtor me mandat katërvjeçar, gjithnjë duke i ndjekur procedurat ligjore”, nënvizoi zëdhënësi i komunës së Gostivarit.

Në vazhdim të press konferencës, Demiri i bëri të njohur për publikun emrat e ushtruesve të detyrës drejtor në të gjitha shkollat fillore dhe të mesme, shkollën e ulët të muzikës dhe të Kopshtit të fëmijëve në Gostivar.

Ja lista e plotë e drejtuesve të institucioneve pulbike arsimore në komunën e Gostivarit:

1. SHF Ismail Qemali – Shpresa Useini

2. SHF Bashkimi – Vlera Fidani

3. SHF Goce Dellçev – Sasho Shareski

4. SHF Mustafa K. Ataturk – Oktaj Nuredin

5. SHF Çajla – f. Çajlë Mevlude Saliu

6. SHF Gjon Buzuku – f. Sërmnovë Ibish Iljazi

7. SHF Faik Koncia – f. Debresh Sanije Durmishi

8. SHF Përparimi – f. Çegran Blerim Ameti

9. SHF Liria – f. Vërtok Nazlije Islami

10. SHF Forina – f. Forinë Zeqie Musliu

11. Shkolla e muzikës Enver Stafai- Betime Jakupi

12. Kopshti i fëmijëve “Gëzimi fëmijëror -Natasha Sazdoska

13. Gjimnazi -Driton Imeri

14. Shkolla ekonomike -Jovanka Ognjanoska

15. Shkolla medicinale -Jeton Sulejmani

16. Shkolla teknike -Gajur Izairi

Shërbimi për informim

Mesazh-urimi i kryetarit të komunës së Gostivarit, Arben Taravari për Ditën e Pavarësisë

Kombi është baza e identitetit të çdo njeriu!

Duke dashur shumë kombin tënd, atëherë je i gatshëm të respektosh kombet tjerë!

Për ne shqiptarët, sot është festa e flamurit tonë kombëtar!

Është një ditë të cilën e kemi festuar dhe do të vazhdojmë ta festojmë, si më të shtrenjtën e ditëve.

Gëzuar Ditën e pavarësisë, Shqipëri!

Gëzuar Ditën e Flamurit, shqiptarë!

Gëzuar 28 Nëntorin!

Ju pafsha gjithnjë duke festuar!

Sinqerisht,

Arben Taravari – kryetar i komunës së Gostivarit

Event për Ditën e pavarësisë organizuar nga shkollat publike, me mbështejte të Komunës së Gostivarit

27.11.2011

Deparatamenti për arsim, kulturë dhe sport pranë Komunës së Gostivarit, mori pjesë aktive në organizimin e aktiviteteve për shënimin e 28 Nëntorit – Ditët së Pavarësisë.

“Gjatë ditëve që lamë pas, patëm një angazhim intensiv pët të nxitur dhe për të ndihmuar nxënësit dhe mësimdhënësit e tyre në të gjitha shkollat publike në komunën e Gostivarit, me mësim në gjuhën shqipe, që të jenë sa më aktiv në realizimin e aktiviteteve për shënimin e Ditës së Pavarësisë”, njofton Aslian Snopçe, përgjegjëse e Departamentit për arsim, kulturë dhe sport pranë Komunës së Gostivarit.

Nga ky Departament njoftojnë se sonte (e hënë) me fillim në ora 18:00 në Qendrën për kulturë në Gostivar, do të mbahet një event me program të pasur kulturor-artistik për shënimin e Ditës së Pavarësisë, festës më të madhe të kombit shqiptar.

“Me këtë rast, apelojmë për një pjesëmarrje sa më masovike në këtë event dhe le ta shënojmë në mënyrë dinjitoze Ditën e pavarësisë, apo siç e njohim edhe si Dita e flamurit tonë kombëtar”, nënvizon znj. Snopçe.

Komuna e Gostivarit, do të vazhdojë që të përkrahë në mënyra të ndryshme të gjitha aktivitetet që kanë të bëjnë me ngritjen e cilësisë së jetës kulturore në territorin e saj.

Shërbimi për informim

Filloi zbatimi i këndit ”Përshëndetje Taravari”, qytetarët mund të shprehin sugjerimet dhe vërejtjet e tyre

24/11/2017

E marta nuk është dita e vetme ku qytetarët e Gostivarit do të mund t’i drejtohen kryetarit, z. Arben Taravari. Ashtu siç ishte paralajmëruar, nga dita e premte ka filluar zbatimi i këndit të ri të komunikimit të drejtpërdrejt “Përshëndetje Taravari”, një model që filloi të zbatohet fillimisht në Ministrinë e Shëndetësisë në kohën kur këtë ministri e drejtonte kryetari i ri i Komunës së Gostivarit.

Këndi”Pershendetje Taravari”, u mundëson qytetarëve që përmes mesazheve elektronike në “Whatsapp” dhe “Viber” të mund të drejtohen për çdo ide, sugjerim, lëvdatë ose për parregullsi, përpjekje për korrupsion dhe tjera parregullsi që lidhen me funksionimin e Pushtetit Lokal në Gostivar.

Në faqen zyrtare të Komunës së Gostivarit (www.gostivari.gov.mk) është vendosur baneri me numrin e telefonit: 070 85 80 05 ku qytetarët mund të vendosin komunikim të drejtpërdrejt me kryetarin e Komunës së Gostivarit, z. Arben Taravari.

Shërbimi për Informim,
Komuna e Gostivarit