Vendosen shporta të reja për mbeturina nëpër rrugët e qytetit

30.03.2018

Ka filluar sot shpërndarja e shportave të reja për mbeturina të cilat po vendosen nëpër rrugët kryesore të qytetit të Gostivarit.

Është ky një projekt i Ndërmarrjes Publike “Komuanlec” të Gostivarit, me të cilin synohet të rritet niveli i pastërtisë publike në qytet.

“Ndërmarrja, për këtë fazë, është furnizuar me 30 shporta të reja për mbeturina, ngase shportat ekzistuese ishin të dëmtuara dhe jofunksionale. Me këtë projekt synojmë që ta ngremë pastërtinë publike në qytet në një nivel më të lartë”, thonë nga kjo ndërmarrje.

NP “Komunalec” njëherit apelon deri te qytetarët që shportat për mbeturina t’i shfrytëzojnë konform dedikimit të tyre dhe në të njëjta të mos hidhen edhe mbeturinat urbane nga amvisëritë apo bizneset.

Shërbimi për informim

Filloi aksioni për sanimin e rrugëve

30.03.2018

Ndërmarrja Publike “Komunalec” me mbështetje të Komunës së Gostivarit, ka filluar aksion një aksion të gjerë për sanimin e gropave goditëse nëpër rrugët e qytetit.

“Pas motit me reshje të shumta të shiut dhe borës të cilat kapluan territorin e komunës së Gostivarit, rrugët kanë pësuar dëmtime të shumta, respektivisht janë paraqitur të ashtuquajturat gropa godiëtse në asfalt. Tani kur më moti është përmirësuar dhe ekzistojnë kushte të volitshme për punë ndërtimore, kemi filluar me një aksion të gjerë për mbushjen e gropave nëpër të gjitha rrugët e dëmtuara, duke u dhënë prioritet rrugëve më kryesore dhe më të frekuentuara”, thotë drejtori i NP Komuanlec“, Isak Lazami.

Nga Komuna e Gostivarit njoftojnë se, brenda vitit do të sanohen dhe do të rikonstruktohen disa rrugë të qytetit dhe rrugë lokale të cilat janë më të dëmtuara.

Shërbimi për informim

Qytetarët për Komunën: Punojmë sëbashku për transparencë dhe përgjegjësi

Në kuadër të projektit “Qytetarët për Komunën – Punojmë së bashku për transparencë dhe përgjegjësi”, NEXUS – Koncepti Civil në bashkëpunim me komunën e Gostivarit, do të zbatojnë aktivitete të përbashkëta të të njëjtit projekt.

Bëhet fjalë për një ueb Platformë që synon të rrisë pjesëmarrjen e qytetarëve në identifikimin dhe zgjidhjen e problemeve të përditshme lokale. Ky projekt do të inkurajojë bashkëveprim më të madh midis vetqeverisjes lokale dhe qytetarëve, do të krijojë një atmosferë ku pjesëmarrja qytetarëve do të jetë kyçe, përmes të cilave qytetarët do mund ti shprehin ankesat e tyre në mënyrë të drejtpërdrejtë, në të njëjtën mënyrë të kryejnë edhe mbikqyrje mbi punën e pushtetit lokal.

>> Linku për tek pyetsori 

Të gjitha abuzimet në Komunën e Gostivarit, denoncohen në organet kompetente

29.03.2018

Zëdhënësi i komunës së Gostivarit, Jasin Demiri, në pres-konferencën e sotme njoftoi se fushata “E vërteta për BDI-në” ndërpritet jo sepse nuk ka dëshmi të reja për keqpërdorime, por për tu lënë hapësirë organeve kompetente të veprojnë në përputhje me shkeljet e konstatuara.

“Të gjitha shkeljet dhe abuzimet të cilat i kemi konstatuar gjatë kontrolleve të brendshme, respektivisht për të gjitha rastet ku ekzistojnë dyshime të bazuara për kundërvajtje apo vepër të kryer penale, i kemi denoncuar para organeve kompetente: Ministrinë e Punëve të Brendshme – Policinë financiare, Prokurorinë Publike”, theskoi Demiri.
Ai tha se krahas asaj që Komuan e Gostiavrit ka kërkuar kontroll nga revizioni shtetëror, është kërkuar që edhe Inspektorati i punës dhe Inspektorati shtetëror i arsimit të bëjnë kontrolle të jashtëzakonshme me qëllim që e vërteta të dalë në shesh dhe për çdo keqpërdorim të kërkohet përgjegjësi.

“Komuna e Gostivarit do të vazhdojë me kontrolle të brendshme për punën e udhëheqësisë komunale në mandatet e shkuara, duke mos anashkaluar edhe punën e administratës komunale në këtë mandat. Pra, askush nuk do të mund t’i ikë përgjegjësisë për shkak se askush nuk mund të jetë mbi ligjin. Nuk ekziston njeriu për shtetin, por shteti ekziston për njeriun”, theksoi zëdhënësi i komunës.

Demiri shprehu bindjen që sistemi gjyqësor në Republikën e Maqedonisë sa më shpejtë të reformohet dhe të gjithë shkelësit e ligjeve dhe kriminelët, të marrin dënimin e merituar.

Shërbimi për informim

Kryetari Taravari priti kampionin ballkanik të karatesë Berat Jakupi

26.03.2018

Kryetari i komunës së Gostivarit, Arben Taravari, priti në kabinetin e tij karateistin Berat Jakupi pas suksesit të radhës që shënoi në Kampionatin Ballkanhik të karatesë në Stamboll nga ku u kthye me medalje ari.

“Të gjitha kohërat kanë heronjtë e vet. Viteve të fundit, simbol dhe ambasador i Gostivarit në Ballkan, Evropë por edhe në botë, mban emrin Berat Jakupi. Para meje kam medaljet e Beratit dhe ky fakt më bën që si gostivaras, të jem shumë krenar për këtë sukses të tijin”, theksoi Taravari.

Jakupi falënderoi kryetarin Taravari për mikpritjen e e ngrohtë dhe interesimin e tij për avancimin e sportit në Gostivar.

“Ëndrra ime nuk përfundon këtu. Medaljet e fituara më hapin rrugën për pjesëmarrje në lojërat olimpike Tokio 2020. Shpresoj që në kampionatin evropian të kurorëzohem me medalje dhe gradualisht edhe në kampionatin botëror në fund të këtij viti të jem aty diku. Dhe nëse i arrij këto rezultate, do të na bëhet ëndrra realitet që Gostivari të ketë përfaqësues në lojërat olimpike”, u shpreh optimist Jakupi.

Ndryshe, Berat Jakupi deri më tani është stolisur me shumë medalje, ku vlen të theksohet medalja e artë në kategorinë +78kg në evropianin e karatesë për U-21 në Lisbonë të Portugalisë. Ai llogaritet ndër karateistët më të suksesshëm të të gjitha kohërave në Maqedoni.

Shërbimi për informim

Në shkollat e Gostivarit mbahen debate rinore për integrimin e të rinjve në arsim

23.03.2018

Në tre shkolla fillore komunale të Gostivarit, në vijim është pilot-projekti “Integrimi i të rinjve në arsim”. Projektin e implementon Agjencia amerikane për zhvillim ndërkombëtar (USAID) në bashkëpunim me Sektorin e arsimit pranë Komunës së Gostivarit.

“Fillimisht ky pilot-projekt realizohet në shkollat fillore Bashkimi dhe Goce Dellçev të qytetit dhe në SHF ‘Çajla’ të fshatit Çajlë, ndërsa në të ardhmen do të përfshihen edhe shkollat tjera komunale. Projektin e implementon USAID-i në bashkëpunim me Komunën e Gostivarit, ndërsa aktualisht janë duke u zhvilluar debate rinore, ku ekspertë të fushës përmes bashkëbisedimit detektojnë kërkesat dhe nevojat e të rinjve për integrimin e të rinjve në arsim”, shpjegon Aslijan Snopçe – udhëheqëse e Sektorit për arsim.

Debatet rinore realizohen me grupe të përbëra prej 20 nxënësish.

Shërbimi për informim

E vërteta për BDI-në – Shefi i kabinetit qeras vetveten me 4 lap-topë dhe një tablet

22.03.2018

Në kuadër të fushatës “E vërteta për BDI-në”, zëdhënësi i Komunës së Gostivarit, Jasin Demiri, në konferencën e sotme për shtyp, zbardhi rastet e dy shkelje flagrante të procedurave dhe abuzim me asetet e Komunës së Gostivarit, nga ana e ish shefit të kabinetit të kryetarit Nevzat Bejta.

“Më 18.10.2013 Komuna e Gostivarit është furnizuar me Tablet – Aplle iPad me vlerë prej 42.901 pa tender të shpallur. Pranimin e mallit e ka nënshkruar shefi i kabinetit të ish kryetarit me shënimin se Tableti gjendet në zyrën e tij, por Tabletin në fjalë, ish shefi i kabinetit nuk e ka dorëzuar kur e ka lëshuar zyrën. Në këtë rast kemi dy shkelje të rënda, respektivisht, mos-shpallje të tenderit publik për prokurim me vlerë mbi 30.000 denarë dhe vjedhje klasike të mjeteve të komunës”, theksoi Demiri.

Më tej ai informoi për rastin tjetër, ku abuzimi është akoma më i rëndë. Respektivisht bëhet fjalë për abuzim të mjeteve në vlerë prej 321.300 denarë, respektivisht mbi 5000 euro.

“Komuna e Gostivarit më datë 17.10.2013 është furnizuar me 4 lap-topë me çmim prej nga 76500 denarë plus TVSH. Askush deri më sot nuk i ka parë ato lap-topë në Komunë, dhe nuk dihet se ku kanë përfunduar. Edhe pse nuk qëndron nënshkrimi se kush i ka pranuar lap-topët, dihet se ato i ka pranuar ish shefi i kabinetit të kryetarit Nevzat Bejta”, tha zëdhënësi i komunës.

“Se ku kanë përfunduar 4 lap-topët dhe Tableti, do të duhet të japë llogari ish struktura udhëheqëse e Komunës së Gostivarit, edhe para administratës komunale edhe para organeve të hetuesisë”, tha në fund të konferencës për shtyp zëdhënësi Demiri.

Shërbimi për informim

 

 

Nënshkruhet Memorandum Bashkëpunimi ndërmjet Komunës së Gostivarit dhe Fondacionit Metamorfozis

19.03.2018

Në prani të kreut të Delegacionit të BE-së në Maqedoni, Samuel Zhbogar, në një ceremoni rasti, Komuna e Gostivarit dhe Fondacioni Metamorfozis, sot nënshkruan Memorandum Bashkëpunimi mbi Projektin për forcimin e turizmit inovativ.

Në emër të Komunës së Gostivarit, Memorandumin e nënshkroi kryetari Arben Taravari, ndërsa në emër të Fondacionit Metamorfozis, drejtori ekzekutiv i fondacionit Bardhyl Jashari.

Projekti synon të promovohet një sektor energjik turistik i cili në mënyrë efikase u përshtatet nevojave të tregjeve vendore dhe ndërkombëtare dhe të kontribuojë në përshpejtimin e rritjes dhe stimulimit të hapjes së vendeve të reja të punës në zonën turistike ndërkufitare midis Maqedonisë dhe Shqipërisë, më saktësisht në rajonin e Gostivarit dhe Elbasanit.

Në përputhje me Memorandumin, Fondacioni Metamorfozis obligohet që të promovojë vlerat e të gjitha vendeve potenciale dhe mundësitë për zhvillimin e turizmit në rajonin e Pollogut, ndërsa Komuna e Gostivarit do të sigurojë informacione, ekspertizë dhe përvojë, si dhe do t’i nxisë ndërmarrjet e vogla dhe të mesme dhe të gjitha palët e interesuara që në mënyrë aktive të kontribuojnë në realizimin e objektivave të projektit.

Kohëzgjatja e Memorandumit të Bashkëpunimit është nga data 19 mars 2018 deri më 31 mars 2020. Projekti financohet nga Programi për Bashkëpunim Ndërkufitar të Bashkimit Evropian.

Shërbimi për informim

Zhbogar: Pres që buxheti të miratohet ashtu siç e propozon kryetari Taravari

19.03.2018

Kryetari i komunës së Gostivarit, Arben Taravari priti sot në kabinetin e tij shefin e diplomacisë së Bashkimit Evropian në Maqedoni, Samuel Zhbogar.

Pas takimit, të dy bashkëbiseduesit në një konferencë për shtyp të mbajtur në Press-qendrën e komunës thanë se takimi ka kaluar në një atmosferë tejet miqësore dhe se kanë biseduar për projekte të përbashkëta të cilat janë në vijim, ato që së shpejti do të fillojnë të implementohen, si dhe për projekte potenciale të cilat mund t’i fitojë Komuna e Gostivarit e që financohen nga fonde të ndryshme të Bashkimit Evropian.

“Ishte nder dhe kënaqësi e veçantë për mua që të kem sot mysafir zotin euro-ambasador Zhbogar. Biseduam me të për situatën aktuale në Gostivar dhe për projektet e përbashkëta me Bashkimin Evropian. E njoftova zotin Zhbogar se nesër në ora dhjetë do të mbahet seanca e Këshillit dhe se pres që definitivisht buxheti të miratohet, sepse kjo është në interes të të gjithë qytetarëve”, tha në pronocimin e tij për media, kryetari Arben Taravari.

“Kënaqësia për takimin e sotëm ishte e imja. Njihem me zotin Taravari para se ai të zgjidhet kryetar komune, madje edhe para se të bëhet ministër i shëndetësisë. U takuam për herë të parë në Spital kur shkuam ta vizitojmë zotin Sela pas sulmit ndaj tij më 27 prill. Siç theksoi edhe kryetari Taravari biseduam për projekte për të cilat mund të aplikojë dhe t’i fitojë komuna”, theksoi Zhbogar.

Euroambasadori njoftoi po ashtu se në takim është biseduar edhe në lidhje me situatën në komunë për sa i përket buxhetit komunal.

“Duhet komuna që të zhvillohet, të ndërtohen kopshte fëmijësh ku do të vendoseshin fëmijët. Andaj unë shpresoj se që nesër buxheti komunal do të miratohet, edhe atë në kornizën në të cilën është propozuar nga kryetari i komunës së Gostivarit Arben Taravari”, nënvizoi Zhbogar.

Në kuadër të vizitës, euro-ambasadori Zhbogar dhe kryetari Taravari, të shoqëruar nga bashkëpunëtorët e tyre, bënë një shëtitje nëpër qytetin e Gostivarit.

Shërbimi për informim

Taravari paralajmëroi fillimin e gjashtë projekteve infrastrukturore

16.03.2018

Kanë filluar punimet për rikonstruktim të plotë të parkut të madh të qytetit në Gostivar.

Për të ndjekur punimet nga afër , në vendngjarje doli kryetari Arben Taravari, i cili me këtë rast njoftoi se së shpejti do të fillojë edhe asfaltimi i pesë rrugëve në territorin e komunës së Gostivarit.

“Siç e shihni, tashmë kanë filluar punimet për rikonstruktim të plotë të parkut të madh, e që nënkupton nivelizimin e tokës, rregullimin e shtigjeve me pllaka bekatoni, prerjen e drunjve në fazë të kalbjes dhe zëvendësimi i tyre me fidane të reja, mbjellja e gjelbërimit e kështu me radhë, edhe atë në të dyja anët e lumit Vardar”, njoftoi në deklaratën e tij për media kryetari Taravari.

Punët për rikonstruktim të parkut, i kryen Ndërmarrja publike “Parkingje publike dhje gjelbërime”. Drejtori i kësaj ndërmarrjeje Muzafer Zulbehari njoftoi se punimet do të zgjasin rreth një muaj, ndërsa kostoja e projektit është rreth 30 mijë euro, para këto të siguruara nga vetë ndërmarrja.

Kryetari Taravari, njoftoi, po ashtu, se me fillimin e stinës së pranverës do të punohet intensivisht për realizim të projekteve të ndryshme infrastrukturore, duke veçuar me këtë rast, asfaltimin e pesë rrugëve në territorin e komunës së Gostivarit.

Shërbimi për informim