Aslian Snopçe: Ekskursionet shkollore do të realizohen sipas planit

30.04.2018

Udhëheqësja e Sektorit për arsim pranë Komunës së Gostivarit, Aslian Snopçe, bëri të ditur sot për mediat, se të gjitha ekskursionet shkollore do të realizohen sipas plan-programit të paraparë dhe se nxënësit dhe prindërit nuk duhet të shqetësohen.

“Dua të njoftojë opinionin publik, e sidomos nxënësit dhe prindërit e tyre se ekskursionet shkollore do të realizohen në bazë të planit të paraparë të MASH-it dhe se ne si Komunë as duam as mundemi të ndërhymë këtu, në një situatë kur na janë marrë ingerencat në sferën e arsimit”, njoftoi znj. Snopçe.

Ajo sqaroi se spekulimet për kinse mosrealizim të ekskursioneve janë paraqitur pas parashtrimit të ankesës nga një agjenci turistike për te gjimnazi i Gostivarit dhe se procedura do të vazhdojë përmes rrugës gjyqësore dhe se kjo nuk do të ndërlidhet me realizimin e ekskursioneve.

“Kur është në pyetje interesi i nxënësve, Komuna e Gostivarit asnjëherë nuk do të bëjë problem dhe asnjë veprim i yni nuk ka dhe nuk do të ketë asnjëfarë prapavije politike.

Shërbimi për informim

U mbajt Gara ndërkombëtare në paraglajding “Mavorovo Open” – 2018, u mbështet edhe nga Komuna e Gostivarit

30.04.2018

Fundjavën që lamë pas, 28 dhe 29 prill, u mbajt Gara ndërkombëtare në Paraglajding – ulje precize “Mavorovo Open” – 2018, në organizim të Klubit Fluturues “Kondor” – Gostivar, me mbështetje edhe të Komunës së Gostivarit.

Ceremonia e hapjes solemne u mbajt të shtunën në ora 10 në Stadiumin sportiv të Mavrovës, ku fjalë përshëndetëse mbajti edhe zëdhënësi i komunës së Gostivarit, Jasin Demiri.

Në garë morën pjesë pilotë me flatra prej 6 shteteve, Maqedoni, Shqipëri, Kosovë, Turqi, Serbi, Bullgari dhe Rumani.

Në ceremoninë e shpalljes së fituesve që u mbajt të dielën në ora 15, mori pjesë kryetari i komunës së Gostivarit, Arben Taravari.

“Përgëzoj klubin Kondor nga Gostivari, e sidomos kryetarin e klubit Mentor Saiti për këtë organizim të shkëlqyer. Përgëzoj fituesit, por edhe të gjithë nga vendet e ndryshme të Ballkanit dhe shpresoj se janë kënaqur me peizazhin e bukur që ofron Mavrova dhe mikpritja e ngrohtë gostivarase. Komuna e Gostivarit gjithmonë do të vihet në dispozicion të të gjitha aktiviteteve rekreativo-sportive si një sferë shumë e rëndësishme e jetës së të rinjve dhe qytetarëve në përgjithësi”, theksoi mes tjerash kryetari Taravari.

Gara ndërkombëtare në Paraglajding “Mavorovo Open” – 2018 është pjesë e kalendarit të Federatës Ndërkombëtare të Aviacionit (FAI) ndërsa u realizua me mbështetje të Federatës së Aviacaniot të Maqedonisë.

Shërbimi për informim

Nxënësit e SHF “Goce Dellçev” vizituan Komunën e Gostivarit

26.04.2018
Nxënësit e klasës së katërt, paralelet në gjuhën maqedonase, pranë Shkollës Fillore Komunale “Goce Dellçev” – Gostivar, të shoqëruar nga mësueset e tyre, ishin sot për vizitë në Komunën e Gostivarit, për tu njoftuar me mënyrën e funksionimit të pushtetit lokal.

Gjatë vizitës ata takuan kryetarin e komunës Arben Taravari dhe bashkëpunëtorët e tij si dhe vizituan ambientet ku i kryejnë detyrat administratorët komunalë.

Kryetari i komunës Arben Taravari dhe pjesëtarët e kabinetit të tij, i njoftuan nxënësit me mënyrën e funksionimit të vetëqeverisjes lokale me një gjuhë të kuptueshme për moshën e tyre, duke u dëshiruar atyre që kur të rriten edhe ata të bëhen pjesë e administratës komunale, të marrin poste udhëheqëse dhe dikush të bëhet edhe kryetar komune.
Gjatë vizitës, nxënësit e SHF “Goce Dellçev” bashkëbiseduan me kryetarin Taravari dhe i parashtruan atij pyetje të shumta.

Shërbimi për informim

 

Komuna e Gostivarit e para implementon Ueb Platformën Raporto.mk

26.04.2018

Sot e tutje, banorët e komunës së Gostivarit mund të raportojnë në mënyrë të lehtë ankesat e tyre për problemet e kategorive siç janë: mbeturinat, gropat në rrugë, ndotësit e ajrit, ndriçimi publik, trotuaret e dëmtuara, rrugë të papastruara nga bora dhe akulli, si dhe probleme të tjera komunale me të cilat ballafaqohen në vendet ku banojnë dhe gravitojnë. Kjo falë vënies në funksion të Platformës online Raporto.mk.

Në promovimin e kësaj platforme që u bë sot para përfaqësuesve të administratës komunale, sektorit civil dhe qytetarëve në sallën e Këshillit të Komunës së Gostivarit, kryetari i komunës Arben Taravari theksoi se zbatimi i një platforme të tillë i ka lindur si ide gjatë vizitës në Bashkinë e Tiranës ku tashmë implemnetohet një Platformë e ngjashme e quajtur “Tirana ime” dhe ka vendosur që komuna e Gostivarit të jetë pilot komuna e parë në Maqedoni ku do të vihet në funksion Platforma Raporto.mk.

“Komuna e Gostivarit është e para që vendos në funksionon një mjet të komunikimit të qytetarëve me shërbimet komunale duke përdorur veglat teknologjike në Maqedoni. Jemi të përcaktuar që të vazhdojmë me transparencë dhe llogaridhënie ndaj qytetarëve duke zhvilluar mjete tjera teknologjike për zhvillim të demokracisë” theksoi mes tjerash Taravari.

Ai falënderoi me këtë rast, Shoqatën Nexus CC, Ambasadën Amerikane në Shkup dhe OJQ Democracy Lab që bënë të mundshëm jetësimin e kësaj Platforme.

“Plani ynë është që pas një periudhe të përdorimit të suksesshëm të kësaj platforme nga ana e qytetarëve të Gostivarit, e njëjta të aplikohet edhe në Komunat tjera më të mëdha urbane në Maqedoni, ku komuna e Gostivarit do të shërbejë si një shembull pozitiv. Do të falënderoja me këtë rast kryetarin Arben Taravari që na i dha mundësinë për implementimin e e këtij projekti, si dhe administratën komunale për organizimin e këtij eventi sot”, theksoi kryetarja e Nexus CC ,Afrodita Musliu.

Fjalë përshëndetëse mbajti edhe përfaqësuesi i Ambasadës së SHBA-ve në Shkup, Albion Abdullai, i cili tha se ndjehet krenar që përkrah një projekt të këtillë në Komunën e Gostivarit dhe beson në sukseshmërinë e të njëjtit.

Raporto.mk realisht do të pasqyrojë të gjitha vështirësitë qe hasin qytetaret e Gostivarit, ndërsa vendosmëria e udhëheqësisë së Komunës së Gostivarit është shumë e qartë dhe do të tentohet që me resurset njerëzore me të cilat disponon, të zgjidhen sa më shumë raste ato që do të raportohen përmes platformës.

Raporto.mk është krijuar në bazë të platformës së hapur FixMyStreet të MySociety dhe e ofruar përmes DemTools të Institutit Kombëtar Demokratik (NDI).
Platforma është pjesë e Projektit “Qytetarët për Komunën: Së bashku për transparencë dhe përgjegjësi” i zbatuar nga SH.Q. NEXUS- Koncepti Civil dhe pjesërisht i mbështetur me grant nga Ambasada e SHBA-ve në Shkup, ndërsa për zbatimin e saj në Komunën e Gostivarit, më 5 mars të këtij viti kryetari Taravari nënshkroi Memorandum bashkëpunimi me përfaqësuesit e Shoqatës qytetare Nexus CC.

Shërbimi për informim

 

Nesër vihet në funksion Platforma RAPORTO.MK

Shoqata Qytetare NEXUS – Koncepti Civil (NEXUS) do të promovojë vënien në funksion të Platformës Raporto.mk. Promovimi do të mbahet në sallën e Këshillit të Komunës së Gostivarit, nesër në ora 10:00.

Në promovim janë ftuar organizatat qytetare, institucionet, donatorët, si dhe të gjitha palët e interesuara që kanë bashkëpunuar ose kanë qenë pjesë e projektit, ndërsa  fjalë përshëndetëse do të mbajë kryetari i komunës së Gostivarit, Arben Taravari.

Platforma synon të rrisë pjesëmarrjen e qytetarëve në identifikimin dhe zgjidhjen e problemeve të përditshme lokale. Qëllimi i Raporto.mk është të inkurajojë bashkëveprim më të madh midis vetëqeverisjes lokale dhe qytetarëve, të krijojë një atmosferë ku pjesëmarrja e qytetarëve do të jetë kyçe, qytetarët do mund t’i shpalosin ankesat e tyre në mënyrë të drejtpërdrejtë, si dhe ta ndjekin punën e pushtetit lokal.

Raporto.mk është krijuar në bazë të platformës së hapur FixMyStreet  të MySociety dhe e ofruar përmes DemTools të Institutit Kombëtar Demokratik (NDI).

Platforma është pjesë e Projektit “Qytetarët për Komunën: Së bashku për transparencë dhe përgjegjësi” i zbatuar nga SH.Q. NEXUS- Koncepti Civil  dhe pjesërisht i mbështetur me grant nga Ambasada e SHBA-ve në Shkup.

Shërbimi për informim

Drejtorët e dhunshëm të BDI-së shpallin konkurse të paligjshme

24.08.2018

BDI-ja arriti që me anë të presioneve të ndryshme mbi qeverinë Zaev, t’ia merr kompetencat në arsim kryetarit të komunës së Gostivarit, Arben Taravari.

Ata duke aluduar në atë se do të venë rend në arsim, sollën drejtorë të dhunshëm dhe drejtorë shkelës të çdo norme ligjore.

Së fundmi, në Shkollën e Mesme të Mjekësisë, drejtori Agron Alili, më datë 23.04.2018 shpalli konkurs për vende pune për kohë të caktuar deri më 31.08.2018, për vendet e njëjta të punës në të cilat paraprakisht janë të angazhuar profesorë dhe pedagogu i shkollës, me kontratë nga 18.01-31.08.2018.

Duke marrë parasysh se drejtori hap konkurs pune pa pasur nevojë urgjente apo mungesë kuadri, në kohën që ka mësimdhënës të angazhuar për periudhën e njëjtë kohore, ai bën shkelje ligjore, e cila s’ka tjetër se si të shpjegohet përveç se me revanshizëm politik, i cili rëndë dëmton ecurinë kualitative të procesit mësimor dhe të drejtat e punëtorit që është në marrëdhënie të punës.

Kërkojmë publikisht, ndërsa do të kërkojmë edhe në formë institucionale nga organet kompetente si Inspektorati shtetëror për arsim, Inspektorati për punë, Avokati i popullit etj. mbrojtjen e mësimdhënësve dhe pedagogut të shkollës së mesme të mjekësisë.

Shërbimi për informim

Ambasadorja turke ia dorëzoi çelësat e dy auto-ambulancave kryetarit Taravari

24.04.2018

Ambasadorja e Republikës së Turqisë në Shkup, Tülin Erkal Kara, ia dorëzoi kryetarit të komunës së Gostivarit, Arben Taravari, çelësat e dy auto-ambulancave – donacion turk për nevojat e Spitalit të përgjithshëm të Gostivarit.

Donacioni në fjalë ishte i dakordësuar që në kohën kur Arben Taravari ishte ministër i shëndetësisë, ndërsa dorëzimi i donacionit u bë sot.

Ambasadorja Kara, paraprakisht ishte për vizitë në Komunën e Gostivarit. Në një atmosferë miqësore, ambasadorja turke dhe kryetari Taravari, biseduan për gjendjen aktuale dhe sfidat me të cilat ballafaqohet Komuna e Gostivarit.

Ndryshe, ishte kjo vizita e dytë e ambasadores turke Tülin Erkal Kara në Gostivar gjatë mandatit të kryetarit Arben Taravari.

Shërbimi për informim

Gjatë fundjavës u mbushën gropat goditëse në të gjitha rrugët e qytetit të Gostivarit

23.04.2018

Ndërmarrja Publike “Komunalec”, me mbështetje të Komunës së Gostivarit, gjatë fundjavës që kaloi përmbylli aksionin për mbushjen e gropave goditëse në të gjitha rrugët e qytetit.

“Aksionin që e filluam me ardhjen e pranverës, gjatë fundjavës së kaluar e përfunduam dhe tashmë të gjitha gropat në rrugët e qytetit janë të mbushura me çka është mundësuar lëvizja normale e automjeteve”, thotë drejtori i Ndërmarrjes publike “Komuanlec”, Isak Lazami.

Këtë vit, Komuna e Gostivarit planifikon të asfaltojë rreth 15 rrugë lokale në qytet dhe në zonat rurale.

Shërbimi për informim

Me vetëiniciativë të banorëve dhe me ndihmën e Komunës së Gostivarit, rregullohet lagja rome “Dupka”

21.04.2018

Banorët e lagjes së margjinalizuar rome “Dupka” në Gostivar, realizuan një aksion për pastrimin e vendbanimit të tyre, ndërsa në ndihmë u doli Komua e Gostivarit përmes Ndërmarrjes publike “Komunalec”.

Banorët lokalë i pastrojnë mbeturinat dhe i grumbullojnë në një vend, ndërsa Ndërmarrja publike bën bartjen e tyre, rrafshimin e rrugës dhe pastrimin e kanalit për ujërat atmosferik.

Komuna e Gostivarit i mbështet dhe ndihmon të gjitha aksionet e banorëve të vendbanimeve të ndryshme në qytet dhe nëpër fshatra, si dhe inicion aksione të këtilla.

Ndryshe, lagjja rome “Dupka” ekziston disa dekada, por ka qenë totalisht e margjinalizuar edhe nga pushteti lokal edhe nga ai qendror. Udhëheqësia aktuale e Komunës së Gostivarit, angazhohet që të krijojë kushte normale për të gjithë qytetarët që jetojnë në territorin e saj.

Shërbimi për informim

NJTKZ pajiset me 10 shtretër – donacion nga Komuna e Gostivarit

20.04.2018

Me qëllim të përmirësimit të kushteve të punës për të punësuarit në Njësinë Territoriale Kundërzjarrit – Gostivar, Komuna e Gostivarit ndau donacion prej 10 shtretërish.

Jusuf Bajrami koordinator i autorizuar nga Komuna e Gostivarit në NJTKZ, falënderoi kryetarin e komunës Arben Taravari për këtë donacion, duke bërë me dije se përmirësimi i kushteve të punës në këtë njësi, do të jetë një proces permanent.

“Zjarrfikësit profesionalë, detyrat e tyre i kryejnë në turne prej 12 orësh dhe në përputhje me ligjin, gjatë orarit të punës mund edhe të pushojnë, respektivisht të flenë në periudha të caktuara. Shtretërit me të cilat dispononte NJTKZ ishin jashtë çdo standardi, kështu që në emër të zjarrfikësve, falënderoj kryetarin Taravari që kujdeset për të siguruar kushte sa më të mira që ata t’i kryejnë detyrat e tyre të punës”, theksoi koordinatori Bajrami.

Vlen të theksohet se paraprakisht NJTKZ-së të Gostivarit nga Republika e Turqisë iu dhuruan edhe uniforma pune për 5 zjarrfikës, ndërsa në mungesë të dotacioneve të mjaftueshme nga pushteti qendror, Komuna e Gostivarit do të ndajë mjete nga buxheti i vet për përmirësimin e kushteve të punës, kushteve teknike dhe hapësinore, me qëllim të mundësimit të funksionimit sa më efikas të personave të cilët kryejnë një punë kaq fisnike, siç është profesioni i zjarrfikësit.

Njësia Territoriale Kundërzjarrit – Gostivar, mbulon gjithë territorin e komunës së Gostivarit dhe asaj të Vrapçishtit, si dhe një pjesë të komunës Mavrovë-Rostushë, respektivisht një territor me rreth 100 mijë banorë, ndërsa dotacionet që vijnë nga pushteti qendror, nuk plotësojnë as një të tretat e nevoja reale për funksionim të mirëfilltë të kësaj njësie.

Shërbimi për informim