Përfundoi riasfaltimi i rrugës para Shkollës fillore “Goce Dellçev” në Gostivar

31.08.2018

Ka përfunduar sot rehabilitimi i plotë dhe riasfaltimi i rrugës “Vëllezërit Bllazheski” para Shkollës fillore “Goce Dellçev” në Gostivar me gjatësi prej 315 dhe gjerësi 9 metra.

Ky investim është pjesë e projektit të realizuar nga ana e Komunës së Gostivarit, me të cilin rehabilitohen disa rrugë në këtë pjesë të qytetit, me gjatësi të përgjithshme prej mbi 1000 metra dhe me kosto prej mbi 200 mijë euro.

Para riasfaltimit, u bë edhe zëvendësimi dhe rehabilitimi tehoreve të rrugës, si dhe nivelizimi i pusetave, ndërsa krahas rrugës kryesore u asfaltua edhe një rrugicë anësore e quajtur “Rruga 1”, me gajtësi prej 45 metrash dhe gjeërsi prej 4.5 metarsh.

Segmenti, riasfaltimi i të cilit përfundon sot, është më i gjati në kuadër të këtij projekti, ndërsa do të mbetet për tu riasfaltuar edhe një pjesë e rrugës “18 Nëntori”, respektivisht pjesa prej afër Stacionit Policor deri afër daljes në bulevardin “Vëllezërit Gjinoski”.

Në këtë segment janë para përfundimit punimet për ndërtimin e një linje të ujësjellësit dhe kanalizimit në gjatësi prej 130 metrash, e që ishte kërkesë e banorëve dhe realizohet para asfaltimit që të mos ketë më pas prerje të asfaltit.

Shërbimi për informim

KOMUNIKATË

29.08.2018

Komuna e Gostivarit, e ndjen për obligim që opinionit publik, e sidomos nxënësve, prindërve të tyre dhe punonjësve të arsimit, t’ua sqarojë dhe argumentojë se të gjitha obligimet ndaj shkollave fillore dhe të mesme i kryen në kohë dhe me përgjegjësi të plotë.

Komunës së Gostivarit i lëshohen mjete nga pushteti qendror në formë të bllok dotacioneve, të cilat për vitin 2018 janë të planifikuara në lartësi prej 600.266.000 denarë, të dedikuara për shkollat fillore dhe të mesme, çerdhet dhe Njësinë e zjarrfikësve.

Përfundimisht me ditën e sotme, nga të planifikuarat 385.187.374 denarë, janë realizuar 383.263.721 denarë, ose e shprehur në përqindje 99.50%, ndërsa 0.5% janë në realizim e sipër.

Krahas bllok dotacioneve, subjekteve të lartpërmendura, Komuna e Gostivarit u transferon edhe mjete nga buxheti bazë, si vullnet i mirë i kryetarit të komunës dhe që është praktikë e rrallë në Maqedoni. Konkretisht, sa i përket sferës së arsimit, Komuna shkollave dhe çerdhes u ka transferuar deri më tani mbi 9.000.000 denarë, respektivisht rreth 150.000 euro nga buxheti i saj bazë.

Nga e gjithë kjo që u sqarua më lartë, lehtë nënkuptohet se përveç asaj që Komuna e Gostivarit shkollave ua transferon bllok dotacionet si mjete të kushtëzuar dhe që s’mund të përdoren për asnjë dedikim tjetër, ajo nga buxheti i vet bazë ndan edhe mjete shtesë për mbështetje të shkollave fillore dhe të mesme, e gjithë kjo me qëllim të mbarëvajtjes së procesit arsimor, si një nga sferat për të cilat kryetari Taravari është zotuar se do t’i kushtojë rëndësi të veçantë dhe me të gjitha mjetet do të luftojë që arsimi të depolitizohet dhe departizohet.

Përsërisim edhe një herë se të gjitha akuzat e drejtuara deri te kryetari i komunës së Gostivarit, Arben Taravari nga ana e drejtorëve të dhunshëm të shkollave (ushtarë partiakë të BDI-së), janë të motivuara politikisht dhe të porositura nga personi i cili akoma nuk mund të pajtohet me faktin se i humbi zgjedhjet e fundit lokale edhe krahas angazhimit në favor të tij të komplet aparatit shtetëror dhe policor të Republikës së Maqedonisë.

Shërbimi për informim

 

Kryetari Taravari mirëpriti dyzet artistë figurativë nga shtete të ndryshme të botës

27.08.2018

Artistët figurativë nga vende të ndryshme të botës, të cilët marrin pjesë në Koloninë ndërkombëtare të artit “Gostivari 2018”, vizituan sot Komunën e Gostivarit me ç’rast u mirëpritën nga kryetari Arben Taravari.

Në takimin e realizuar në sallën e Këshillit të komunës së Gostivarit, kryetari Taravari bëri një përshkrim të shkurtër të komunës dhe qytetit të Gostivarit, duke thënë se Gostivari njihet si qytet i mikpritjes por edhe si qytet i artistëve figurativë

“Ju dëshiroj qëndrim të këndshëm në qytetin tonë dhe uroj që të krijoni vepra sa më të mira artistike në kuadër të kolonisë. Ne si Komunë e Gostivarit, do të vazhdojmë të mbështesim aktivitetet e ndryshme në sferën e artit figurativ, por edhe të kulturës në përgjithësi, sepse arti dhe kultura janë ato që i japin shpirt shoqërisë”, theksoi mes tjerash kryetari Taravari.

Reshat Ameti – kryetar i Shoqatës së Artistëve Figurativë “Draudacum” me seli në Gostivar, falënderoi kryetarin Taravari për mbështetjen dhe e njoftoi atë se kjo koloni është tradicionale dhe e 13-ta me radhë, ku sivjet marrin pjesë 40 artistë figurativë nga 12 vende të ndryshme të botës.

Në këtë takim mjaft miqësor të artistëve dhe kryetarit Taravari, folën edhe artistët Vllade Temkov, Svetisllav Savkoviq – Kajyer, Vaihid Hakan dhe Sefkat Isligen.

Në Koloninë e 13 ndërkombëtare të Artit “Gostivari 2018”, marrin pjesë artistë figurativë nga Kosova, Shqipëria, Maqedonia, SHBA, Ukraina, Mali i Zi, Turqia, Egjipti, Franca, Serbia, Bosnja e Hercegovina dhe Koreja e Jugut.

Koloninë e organizon SHFAM Draudacum” – Gostivar, ndërsa e njëjta financohet nga Ministria e Kulturës dhe Komuna e Gostivarit.

Kryetari i “Draudacum”, Reshat Ameti e ftoi kryetarin Arben Taravari për pjesëmarrje në ekspozitën me veprat e krijuara në këtë Koloni, që do të mbahet në Qendrën për Kulturë në Gostivar më 29 gusht.

Shërbimi për informim

Ndërtohet kanalizim në gjatësi prej 2000 metrash në fshatin Turçan i Vogël

27.08.2018

Në vazhdën e investimeve të njëpasnjëshme në sferën e infrastrukturës, projekt i radhës i Komunës së Gostivarit është ndërtimi i kanalizimit në fshatin Turçan i Vogël.

Është ky edhe një premtim i realizuar i kryetarit Arben Taravari, i dhënë banorëve të fshatit Turçan i Vogël si kërkesë e tyre e arsyeshme, me rastin e vizitës së tij këtij fshati të premten e kaluar.

Linja e kanalizimit ka një gjatësi prej rreth 2000 metrash, ndërsa me ndërtimin e saj zgjidhet problemi i gjithë fshati.

Komuna e Gostivarit, tashmë ka hyrë në fazën e bumit investiv, ndërsa në muajin shtator fillon realizimi i akoma më shumë projekteve nga fusha e infrastrukturës dhe përmirësimi i cilësisë së jetës të qytetarëve të komunës së Gostivarit.

Shërbimi për informim

Takim publik i organizuar nga CIVIL: Taravari prezantoi përpjekjet e Komunës së Gostivarit për vlerat evropiane dhe iniciativat e gjelbra

24.08.2018

Në organizim të OJQ “CIVIL”, në sallën e Këshillit të Komunës së Gostivarit, u mbajt një takim publik me autoritetet lokale, sektorin civil dhe me qytetarë në kuadër të fushatës “Veprim-Integrim” që ka për qëllim promovimin e vlerave evropiane dhe të iniciativave të gjelbra.

Përpjekjet e Komunës së Gostivarit në këto fusha, para të pranishmëve i prezantoi kryetari i komunës së Gostivarit, Arben Taravari.

“Si Komunë kemi bërë një sërë aktivitetesh në kuadër të kompetencave tonë dhe mundësive që na i lejon buxheti komunal. Kemi pasur aksione dhe projekte për gjelbërimin e qytetit, pastrimin e e deponive të egra dhe gjelbërimin e të njëjtave. Planifikojmë të vëmë në funksion transport publik me minibusë me energji elektrike. Angazhohemi për zgjidhje përfundimtare të problemit me deponinë rajonale Rusino. Do të promovojmë shfrytëzimin minimal të makinave, respektivisht përdorim sa më masovik të biçikletave, ku planifikojmë në vjeshtë të shpallim tender për studim fizibiliteti. Të gjitha këto me qëllim që të ruajmë mjedisin jetësor, të kemi ajër sa më pak të ndotur, si dhe shumë komponente tjera ekologjike për të cilat vendet perëndimore shumë investojnë, ndërsa ne si shtet investojmë shumë pak. Ne si Komunë që ka obstruksione nga pushteti qendror përpiqemi që me vet buxhetin modest të komunës të iniciojmë disa punë që mund t’i bëjmë dhe janë për të mirën e qytetarëve të komunës së Gostivarit” theksoi Taravari.

Xhabir Deralla nga organizata “Civil”, falënderoi kryetarin e komunës ës Gostivarit për bashkëpunimin e vazhdueshëm me organizatën të cilën ai përfaqëson, si dhe për qasjen e tij korrekte ndaj sektorit civil në përgjithësi.

“Këto iniciativa të cilat i ka ndërmarrë dhe planifikon t’i realizojë Komuna e Gostivarit janë gjëra iniciativa të cilat në Evropë dhe në boitën e zhvilluar konsiderohen si punë të mëdha. Unë kam shprehur keqardhjen njëlloj si shumë miq të mijë për atë që doktor Taravari braktisi postin e ministrit të shëndetësisë ku u tregua mjaft i suksesshëm, por tani që shoh se ai shënon rezultate të njëpasnjëshme si kryetar komune, më vjen mirë që përzgjodhi këtë post dhe arrin që edhe krahas asaj që është një kryetar i cili vjen nga radhët e opozitës, kontribuon shumë për qytetarët e Gostivarit”, theksoi mes tjerash Deralla.

Në pyetjen e të pranishmëve se çka ndërmerr Komuna e Gostivarit për zgjidhjen e problemit me qentë endacakë, kryetari Taravari u përgjigj se në rrjedhë është ndërtimi i një stacionari për trajtim të qenve endacak, me çka Gostivari do të jetë qyteti i parë në Maqedoni i cili do ta ketë zgjidhur në mënyrë adekuate këtë problem të kamotshëm.

Shërbimi për informim

U afsaltua rruga lokale në Tërnovë të Gostivarit që shpie deri te shkolla e fshatit

24.08.2018

Ka përfunduar ndërtimi i rrugës lokale në fshatin Tërnovë. që shpie për te shkolla. Rruga ka një gjatësi prej rreth 800 metrash, ndërsa pjesa e rrugës që është shtruar me asfalt është me gjerësi mesatare prej rreth 4 metrash.

Ndërtimi i kësaj rruge është bërë në kuadër të projektit të financuar përmes një granti të komponentit IPA të Bashkimit Evropian, e që përfshin ndërtimin edhe të një rruge tjetër në fshatin Padalisht, grant ky me vlerë të përgjithshme prej 7.314.814,80 denarë, respektivisht në kundërvlerë 118.940 euro,

“Me ndërtimin e këtyre rrugëve synohet që në këtë pjesë të Malësisë së Gostivarit të krijohet biznes klimë e volitshme për zhvillim të agrikulturës, bujqësisë, pylltarisë dhe cilësisë së furnizimit me ujë, si dhe zhvillimit të turizmit dhe hotelerisë rurale”, thotë Besim Dogani – udhëheqës i Zyrës për Ekonomik Lokal pranë Komunës së Gostivarit.

Vlen të theksohet se këtyre ditëve Komuna e Gostivarit ka hyrë në një fazë të bumit investiv, ngase paralel po realizohen më shumë projekte kapitale, ndërsa në përfundim janë procedurat për realizimin e disa projekteve tjera nga sfera e infrastrukturës.

Shërbimi për informim

 

Lllakavicasit pritën Kurban Bajramin me rrugën e re të asfaltuar

23.08.2018

Banorët e fshatit Llakavicë festën e Kurban Bajramit, sivjet e shënuan me rrugën e re të asfaltuar në hyrje të fshatit.

Realizuesit e punimeve punuan intensivisht edhe në ditët e festës, me qëllim që të përfundojnë punimet për riasfaltimin e rrugës në gjatësi prej 230 metra, me një sipërfaqe prej mbi 1300 metra katror, respektivisht prej te rruga rajonale Gostivar-Sërmnovë e deri te ura mbi lumin Llakashnicë në brendi të fshatit Llakavicë.

Paraprakisht u bë gërryerja e asfaltit ekzistues i cili ishte mjaft i dëmtuar, me trashësi prej 4 cm, e më pas sipërfaqja u shtrua me asfalt të ri të cilësisë së lartë.

Për këtë qëllim Komuna e Gostivarit ndau nga buxheti i saj 1.046.000 denarë.

Ishte ky edhe një premtim i realizuar i kryetarit të Komunës së Gostivarit, Arben Taravari për vitin e parë të mandatit.

Ndryshe, Komuna e Gostivarit për në fshatin Llakavicë ka paraparë edhe disa projekte infrastrukturore gjatë mandatit katërvjeçar, si kërkesa të arsyeshme të banorëve të kësaj ane.

Shërbimi për informim

 

NJOFTIM

22.08.2018

Njoftohen qytetarët se nesër (e enjte) në ora 08:00 do të fillojnë punimet për riasfaltimin e rrugës “Svetozar Peposki”, respektivisht rrugës te NP Komunalec” në afërsi të SHF “Goce Dellçev, në gjithë gjatësinë e saj.

Apelojmë deri te të gjithë qytetarët që sonte, gjegjësisht më së voni deri nesër në ora 08:00, të mos i lënë të parkuara automjetet e tyre në këtë rrugë, që të mos pengojnë mbarëvajtjen e punimeve.

Automjetet që eventualisht nesër do të gjenden në vendngjarje, do të dislokohen përmes Shërbimit “Merimangë”.

Komuna e Gostivarit dhe kompania realizuese e punimeve, Ju falënderojnë për mirëkuptimin.

Shërbimi për informim – Komuna e Gostivarit

Mesazh-urimi i kryetarit Arben Taravari me rastin e Kurban Bajramit

20.08.2018
Të nderuar qytetarë të Gostivarit, pjesëtarë të konfesionit islam,
Festa e madhe e Kurban Bajramit simbolizon sakrificën për të ndihmuar njerëzit në nevojë, por edhe rasti më i mirë që të braktisen hidhërimet dhe mospajtimet, dhe të mbizotëroje dashuria dhe mirësia.
Le t’i lutemi Zotit të madh që përpjekjet dhe sakrificat tona, të na i kthejë në mirësi dhe mbarësi, lumturi , shëndet dhe dashuri tek të gjithë.
Të nderuar besimtarë, uroj që në familjen tuaj të mbretërojë paqja dhe mëshira e Zotit!
Me fat Festa e Madhe e Kurban Bajramit!
Sinqerisht,

Arben Taravari
Kryetar i komunës së Gostivarit

 

Terreni për futboll të vogël në Çegran shtrohen me bar artificial

17.08.2018

Në vazhdën e përpjekjeve të Komunës së Gostivarit, që krahas investimeve në infrastrukturë të investohet edhe në projekte që rrisin nivelin e cilësisë së jetesës, siç janë kultura, sporti dhe rekreacioni, këtyre ditëve është shtruar me bar artificial terreni për futboll të vogël në Çegran

Komuna e Gostivarit ka ndarë nga buxheti i saj 1.750.000 denarë për furnizim dhe vendosje të barit artificial të cilësisë së lartë, në dy fusha të futbollit të vogël, një në Çegran dhe një në Balindoll.

“Tash kur kanë përfunduar punimet në Çegran, do të pasojnë edhe punimet në Balindoll. Vlen të theksohet se krahas vendosjes së barit artificial, në terrenin për futboll të vogël në Çegran, është vendosur edhe ndriçim adekuat, si dhe janë kryer edhe punë tjera përcjellëse që ky terren t’i përmbushë të gjitha standardet e nevojshme”, thotë Jasin Demiri – zëdhënës i komunës së Gostivarit duke uruar që rinia e fshatit Çegran ta shfrytëzojë sa më gjatë këtë terren dhe të kujdeset për të si për pronë private.

Shërbimi për informim