Mbërrin donacioni nga “Eagle” – 300 punonjës të Gostivarit do të pajisen me uniforma cilësore

14.01.2019

Treqind uniforma pune të cilësisë më të lartë, i ndahen komunës së Gostivarit si donacion nga Kompania e renomuar “Eagle”.

Uniformat e para nga ky donacion, ia dorëzoi kryetarit të komunës Arben Taravari, përfaqësuesi i kësaj kompania Baki Sulejmani nga Gostivari.

“Kompania Eagle i donon Komunës së Gostivarit 300 palë veshje të unifikuara edhe atë për rojtarët e komunës së Gostivarit 8 palë veshje, për punonjësit e NP Komunalec – 150 palë, për Parkingjet dhe Gjelbrimin – 70 palë, për Konviktin e nxënësve – 30 palë, si dhe për zjarrfikësit – 50 palë të cilat po i pranojmë sot.  Falënderoj Rolandin, Jetmirin dhe Bakiun, si dhe kompaninë Eagle të cilët e bëjnë këtë donacion që është shumë domethënës. Uniformat për të gjithë punonjësit janë të njëjta ndërsa do të dallohen vetëm për nga ngjyra. Ndryshe Kompania Eagle është kompani e renomuar për prodhimin e  uniformave dhe ajo i prodhon edhe fanellat e shumë ekipeve fubollistike të cilat garojnë në ligat evropiane. Shpresojmë se deri në muajin shkurt do t’i pranojmë komplet dhe do t‘ua shpërndajmë punonjësve të komunës së Gostivarit dhe ndërmarrjeve nën kompetencë të saj, dhe ata do të kenë uniforma pune cilësore dhe të dallueshme”, theksoi kryetari Taravari.

Baki Sulejmani falënderoi kryetarin e komunës së Gostivarit dhe administratën komunale për bashkëpunimin e  frytshëm tash e gjashtë muaj më parë, dhe theksoi se falë këtij bashkëpunimi në Gostivar do të mbahet edhe kampi i Futbollit Edmilson dhe se do të ketë edhe donacione të tjera që shkojnë në dobi dhe në interes të shoqërisë në Gostivar.

Në shenjë respekti dhe falënderimi, kryetari i komunës së Gostivarit Arben Taravari i dhuroi një dhuratë simbolike koordinatorit për këtë donacion, Baki Sulejmani.

Shërbimi për informim 

FTESË – PËR PJESËMARRJE NË NGJARJEN PËR NJOFTIM ME PROJEKTIN „PËRMIRËSIM I QËNDRUESHMËRISË NDAJ PËRMBYTJEVE NË RAJONIN E POLLOGUT“

FTESË
PËR PJESËMARRJE NË NGJARJEN PËR NJOFTIM ME PROJEKTIN „PËRMIRËSIM I QËNDRUESHMËRISË NDAJ PËRMBYTJEVE NË RAJONIN E POLLOGUT“

Të nderuar,
Kemi kënaqësinë t’Ju ftojmë të merrni pjesë në ngjarjen për njoftim me projektin e inicuar rishtazi „Përmirësim i qëndrueshmërisë ndaj përmbytjeve në rajonin e Pollogut” që do të mbahet më 29 janar 2019, në Hotelin Merkur në Tetovë, duke filluar në ora 9:30.

Projekti financohet nga Qeveria Zviceriane kurse implementohet nga Programa për zhvillim e Kombeve të Bashkuara (UNDP), në partneritet me Ministrinë për ambient jetësor dhe planifikim hapësinor, komunat e rajonit të Pollogut dhe një numër i madh i institucioneve tjera relevante.

Qëllimi i ngjarjes është që shoqatat e qytetarëve që janë aktive në rajonin e Pollogut të njihen me:
a) gjetjet kryesore nga vlerësimi i rreziqeve nga përmbytjet në rajonin e Pollogut dhe masat e rekomanduara për zbutjen e tyre;
b) qëllimet dhe aktivitetet e projektit të planifikuara për vitet e ardhëshme;
c) punën e trupit të posaformuar ndërkomunal – Rrjetit për Pollog të mbrojtur dhe rrezistent, që është përkrahur nga ana e projektit.

Në këtë ngjarje do të diskutohet edhe rreth përkrahjes që mund të japë sektori civil për forcimin e qëndrueshmërisë së përgjithshme të komuniteteve ndaj përmbytjeve dhe dukurive tjera përcjellëse, si dhe modaliteteve tjera për bashkëpunim në kuadër të projektit.

Do jemi mirënjohës nëse në kohë konfirmoni pjesëmarrjen Tuaj deri te Ermira Fida, nëpërmjet adresës ekeltronike ermira.fida@undp.org, ose në tel. 071-289-326 më së voni deri më 21 janar 2019.

Qëndrojmë në dispozicionin Tuaj për të gjitha informatat plotësuese.
Me respekt,
Përmirësimi i qëndrueshmërisë ndaj përmbytjeve në rajonin e Pollogut

Ftesë dhe agjendë

Kryetari Taravari me bashkëpunëtorët iu bashkëngjit aksionit për pastrimin vullnetar të borës

13.01.2019

Spitali dhe objektet fetare, ishin pikat në të cilat u realizua sot aksioni vullnetar për pastrimin e borës të cilit iu bashkëngjit kryetari i komunës së Gostivarit, Arben Taravari dhe drejtorët e ndërmarrjeve me bashkëpunëtorët e tyre.

Në realizimin e këtij aksioni u kyç edhe operatori ekonomik për mirëmbajtje dimërore Nasir Turs, ndërsa asistoi edhe policia.

“Një grup i të rinjve të Aleancës për Shqiptarët ngriti iniciativë për realizimin një aksioni të këtillë të cilit me shumë vullnet iu bashkëngjita edhe unë me bashkëpunëtorët e mi. Krahas asaj që japin një kontribut simbolik, dërgojmë edhe një mesazh të fuqishëm deri te qytetarët që të pastrojnë mjediset para shtëpive apo dyqaneve të tyre. Patjetër ta them se jam shumë i kënaqur me kontributin e shumicës së qytetarëve në këtë drejtim, por gjithmonë mund të bëhet edhe më shumë, si nga institucionet, ashtu edhe nga qytetarët”, theksoi Taravari.

Ai bëri me dije se për këtë periudhë është shumë i kënaqur nga bashkëpunimi me policinë dhe shprehu bindjen se bashkëpunimi do të vazhdojë edhe më tutje.

“Sa i përket menaxhimit me situatën, me shumë kënaqësi njoftoj se Komuna e Gostivarit është vlerësuar me notën 5 nga ana e policisë, në një shkallë notimi prej 1 deri në 5. Nëse dalin parashikimet e sinoptikëve se do të kemi sërish reshje bore, do të intensifikojmë aktivitetet dhe sipas nevojës edhe do ta bartim borën, për çka do të nevojitet edhe një disiplinë e shtuar nga qytetarët që t’i heqin automjetet e lëna në rrugë apo parkingje publike”, nënvizoi kryetari i komunës.

Vullnetarët në aksionin e sotëm, me kazma dhe lopata thyen akullin dhe mënjanuan borën në sipërfaqet rreth Xhamisë së Sahatit, Kishës Shën Mëria, parkingun e Spitalit dhe shtigjet e këmbësorëve brenda këtij institucioni shëndetësor . Në vende të caktuara u hodh edhe kripë.

Shërbimi për informim

Komuna e Gostivarit e gatshme për tu ballafaquar me motin e ligë që na pret

09.01.2018

Sipas parashikimit të motit të Drejtorisë për Punë Hidrometeorologjike dhe rekomandimit të Qeverisë së Republikës së Maqedonisë, Komuna e Gostivarit është duke i bërë të gjitha përgatitjet për tu ballafaquar me motit e ligë që na pret, i ndjekur me reshje intensive të borës dhe me temperatura të ulëta.

Me qëllim të ndërmarrjes së aktiviteteve parandaluese në kohë reale për reduktimin e pasojave nga paqëndrueshmëria e paralajmëruar e moti, janë njoftuar udhëheqësitë e bashkësive lokale në territorin e komunës.

Nëse është e nevojshme, krahas operarotorit për mirëmbajtjen dimërore të rrugëve, do të angazhohen me kapacitet të plotë edhe ndërmarrjet publike dhe njësia e zjarrfikësve.

Shtabi komunal i krizave do të jetë në bashkëpunim të vazhdueshëm me Shtabin rajonal për menaxhimin e krizave.

Vlen të përmendet se të gjitha rrugët lokale në territorin e komunës së Gostivarit janë të kalueshme dhe trafiku zhvillohet pa probleme serioze. Rrugët pastrohen rregullisht nga bora, ndërsa kur temperaturat bien, vazhdimisht hidhet kripë.

Për ballafaqim me sukses të gjendjes, luten qytetarët dhe personat juridikë që t’i respektojnë normat e parashikuar me ligj për kushte të këtilla.

Shërbimi për informim

Kryetari Taravari u ndau mirënjohje subjekteve dhe personave më meritorë në vitin 2018

04.01.2019

Kryetari i komunës së Gostivarit, Arben Taravari, u ndau sot mirënjohje subjekteve dhe personave të cilët gjatë vitit 2018 kanë dhënë kontribut të veçantë për realizimin e aktiviteteve dhe projekteve të ndryshme në drejtim të përmirësimit të cilësisë së jetës së qytetarëve të komunës së Gostivarit.
“Sot u ndaj mirënjohje speciale disa bashkësive lokale dhe individëve, për të cilët vlerësova se gjatë vitit 2018 kanë shënuar rezultate dhe kanë dhënë kontribut të veçantë për mirëqenien e qytetarëve tanë, e gjithë kjo me një bashkëpunim të shkëlqyer me Komunën e Gostivarit, por edhe me institucione tjera. Do të veçoja këtu rezultatet e shënuara të bashkësive lokale të fshatit Çajlë, Çegran, Forinë, Llakavicë dhe Debresh. Këto bashkësi lokale edhe pse si pasojë e minimizimit të rolit të tyre me Ligjin për vetëqeverisje vendore, gati se u pasivizuan tërësisht, ato po shënojnë rezultate të shkëlqyera dhe arrijnë të organizohen si institucione të mirëfillta”, thekѕoi kryetari Taravari.
Ai nënvizoi se duke u ndarë mirënjohje kryetarëve të bashkësive lokale, në fakt nderon edhe gjithë banorët e këtyre fshatrave për angazhimin si dhe mërgimtarët për mbështetjen financiare që mundësuan realizimin aktiviteteve dhe projekteve ashtu siç nuk mbahen mend në këtë zonë. Taravari shprehu edhe gatishmërinë që në të ardhmen këto bashkësi lokale të kenë mbështetje më të madhe nga ana e Komunës, duke i inkurajuar bashkësitë e tjera lokale që të ndjekin shembullin e tyre dhe të rrisin cilësinë e jetës së banorëve të vet.
Kryetari Taravari u ndau mirënjohje edhe katër individëve për të cilët ka vlerësuar se me angazhimin e tyre gjithashtu kanë lënë gjurmë në vitin 2018.

“Shpend Sulejmani, si ish ushtrues detyre në Konviktin e nxënësve, vetëm për disa muaj bëri punë sa për dy mandate, duke rinovuar në tërësi objektin si nga brenda ashtu edhe nga jashtë, sa për dy mandate, edhe pse e dinte se nuk do të mund të emërohet drejtor. Bekim Ame, kryetari i Shoqatës të personave me aftësitë kufizuara “Porosia” nga Dibra, është duke bërë shumë edhe për fëmijët nga Gostivari, sidomos ata me autizëm. Gjatë vitit 2018, shumë donacione kemi pranuar nga Turqia dhe kemi ngritur ura të reja bashkëpunimi. Koordinator për bashkëpunim me Republikën e Turqisë e kemi Gëzim Haxhiejupin, të cilit do i ndajmë mirënjohje duke respektuar dhe falënderuar kështu të gjitha institucionet e Turqisë që na kanë ndihmuar në forma të ndryshme, ashtu siç e di mirë opinioni publik”, potencoi Taravari

Mirënjohje iu nda edhe Hakan Gostivarit, i cili jeton në Turqi, është shtetas turk, por në mënyrë permanente angazhohet në aksione humanitare dhe ndarjen e donacioneve shumë të vlefshme për Gostivarin me rrethinë.

Shërbimi për informim