Projektuesit dhe ndërtimtarët e Gostivarit bashkëbiseduan me kryetarin Taravari dhe përgjegjësit e Sektorit të urbanizimit

27.03.2019

Projektuesit dhe ndërtimtarët e Gostivarit, ishin të ftuar sot për bashkëbisedim në mjediset e Komunës së Gostivarit, ku para kryetarit Arben Taravari dhe përgjegjësve të Sektorit të urbanizimit shpalosën të gjitha vërejtjet, propozimet dhe sugjerimet e tyre për punë më efikase dhe planifikim më të mirë të urbanizimit në komunë.

“Qëllimi i këtij takimi është që të dëgjojmë opinionet e arkitektëve dhe ndërtimtarëve, me qëllim që në bazë të vërejtjeve dhe sugjerimeve të tyre të rrisim efikasitetin e shërbimeve në sferën e urbanizimit, të përgatisim plane më të përshtatshme urbanistike dhe gjithçka tjetër që tangon ata sa i përket urbanizimit dhe ndërtimit”, theksoi kryetari Arben Taravari.

Përgjegjësi i Sektorit të urbanizimit pranë Komunës së Gostivarit, Sefedin Bilalli njoftoi se takime të këtilla informative-konsultative do të mbahen rregullisht në çdo dy-tre muaj, respektivisht sipas nevojës, me qëllim të rritjes së transparencës në punë dhe përfshirjes sa më të madhe të projektuesve dhe ndërtimtarëve në proceset e vendimmarrjes.

Shërbimi për informim  

NJOFTIM

Të nderuar qytetarë,
Për shkak të një defekti të linjës së ujësjellësit Ф250 në bulevardin “Vëllezërit Gjinoski” në Gostivar, do të ketë ndërprerje të furnizimit me ujë prej te rrethrrotullimi te salloni “Dam Com” deri në dalje të qytetit, në Zonën VI dhe VII dhe në rrugën “Nikolla Parapullov”, ndërsa në pjesët prreth do të ketë shtypje të zvogëluar.

Ekipet e NP “Komunalec” punojnë në sanimin e defektit. Pritet që furnizimi me ujë të normalizohet rreth orës 15:00.
Komuna e Gostivarit dhe NP “Komunalec” falënderojnë qytetarët për mirëkuptimin.

Shërbimi për informim

APEL: Kujdes për shkak të rrezikut nga zjarret!

27.03.2019

Apelojmë deri tek të gjithë individët të cilët punojnë ose lëvizin nëpër vende të hapura që të mos ndezin zjarre.
Apelojmë deri tek bujqit, të bëjnë kujdes kur i pastrojnë dhe i djegin mbeturinat dhe kashtat nëpër fushat e tyre të mos largohen nga vendi përderisa nuk sigurohen se zjarri është shuar dhe se ai nuk do të zgjerohet kur frynë erë.
Apelojmë gjithashtu që ata të cilët punojnë në pyje, dhe bjeshkatarët respektivisht alpinistët, të mos hedhin bishta cigaresh të pashuara, për shkak se nevojitet vetëm një shkëndijë e vogël që të ndizet bari i thatë apo shkurret.

Për shkak të shpeshtimit të zjarreve nëpër pyje dhe fusha në rajonin më të gjerë të Gostivarit, Njësia Territoriale Kundërzjarrit – Gostivar, e ka vështirë që të ballafaqohet me to, ndërsa dëmet e shkaktuara nga djegia e pyjeve janë afatgjate.

Rikujtojmë se shkaktimi i zjarreve në mënyrë të qëllimshme apo prej pakujdesisë së njeriut, paraqet vepër penale me të cilën janë paraparë sanksione rigoroze ligjore, dënime me para dhe me burg deri më 10 vjet, varësisht nga pasojat.

Shërbimi për informim

NJOFTIM

Të nderuar qytetarë,

Për shkak të linjës së ujësjellësit Ф150 në afërsi të Xhamisë Rinia në rrugën “Beliçica” në Gostivar, do të ketë ndërprerje të furnizimit me ujë në fshatin Turçan i Vogël, lagjen Tullana 1, Tullana 2, Fazaneria 1 dhe Fazaneria 2, ndërsa në Turçan të Madh dhe në lagjen Banjeshnicë do të ketë shtypje të zvogëluar.

Ekipet e NP “Komunalec” punojnë në sanimin e defektit. Pritet që furnizimi me ujë të normalizohet rreth orës 15:00.

Komuna e Gostivarit dhe NP “Komunalec” falënderojnë qytetarët për mirëkuptimin.

Shërbimi për informim

Taravari vizitoi fabrikën Varadar-Dollomit

25.03.2019

Kryetari i komunës së Gostivarit, Arben Taravari dhe përfaqësues të Shoqatës ekologjike “GV Eko” nga Gostivari, vizituan fabrikën Vardar Dollomit, me qëllim që të njoftohen nga afër me standardet të cilat implementon kjo fabrikë në drejtim të mbrojtjes nga ndotja e ajrit.

“Me përfaqësuesit e fabrikës Vardar-Dollomit kemi pasur kontakte të rregullta dhe është ky ndoshta takimi i katërt apo pestë. Është normale që kryetari i komunës, për problemet dhe shqetësimet e qytetarëve të shkojë në vend të ngjarjes. Dihet se Gostivari si shumë komuna tjera në nivel të shtetit ka problem me aerondotjen. Nga stacionet matëse kuptojmë se kemi koncentrim të madh të grimcave PM 10 dhe kjo na imponon që të koordinohemi dhe bashkëpunojmë me prodhuesit e mëdhenj që të bëjmë gjithçka që është e mundur për të zvogëluar ndotjen e ajrit deri në një nivel të pranueshëm”, theksoi kryetari Taravari.

Drejtori ekzekutiv i fabrikës Vardar-Dollomit, Remzi Abdullai tha se fabrika posedon licencën e integruar ekologjike A, ka të vendosur filtra përkatës dhe se i plotëson të gjitha standardet e nevojshme. Megjithatë, sipas tij, deri te zgjidhja definitive e problemit duhet të angazhohet shteti , sidomos në drejtim të sjelljes së gazifikimit.

Ndërkaq kryetari Shoqatës “GV Eko”, theksoi se përveç plotësimit të të gjitha standardeve, fabrikat të cilat janë ndotës potencial të ajrit ambiental duhet të jenë të larguara të paktën 15 kilometra nga qyteti.

Shërbimi për informim

Hapet solemnisht një kompani reale në shkollën e mesme teknike në Gostivar

25.03.2019

Kryetari i komunës së Gostivarit, Arben Taravari dhe përfaqësues të administratës komunale, morën pjesë në hapjen solemne të kompanisë reale Megametal 2018 që do të funksionojë në kuadër të Shkollës së Mesem Teknike Komunale “Gostivar”.

Në kuadër të kësaj kompanie do të bëhet prodhimi i pjesëve metalike dekorative dhe pjesëve të tjera të nevojshme nëpërmjet makinës më bashkëkohore CNC.

Bëhet fjalë për një grant për zhvillimin aftësive dhe mbështetjen e  inovacionit të zbatuar, financuar nga një hua e Bankës botërore .

“Kompania Megametal 2018 është një kompani e shkollës që do të mundësojë që nxënësit në të njëjtin vend të njihen dhe të shfrytëzojnë mjetet dhe teknologjitë moderne për dizajnim dhe prodhim. Nxënësit pjesën më të madhe të punës praktike do ta kalojnë në shkollën e tyre”, tha Ekrem Miftari në cilësinë e koordinatorit të projektit.

Të pranishmëve iu drejtua edhe drejtori i shkollës teknike Sadudin Sadiku i cili tha se janë të kënaqur me rezultatet që shënon kjo shkollë në përgatitjen e kuadrove profesionale

“Sot të gjithë së bashku krenohemi me rezultatet dhe arritjet tona që ky projekt të bëhet realitet, dhe kjo na motivon që në të ardhmen të shënojmë rezultate akoma më të mira”, theksoi Sadiku.

Kompania Megametal 2018 do të funksionojnë partneritet  me kompaninë Progup nga Manastiri.

Vlen të theksohet se përveç asaj që nxënësit do të aftësohen për punë në këtë kompani, produktet e tyre do të shiten në treg dhe do të gjenerojnë të ardhura për nevojat e shkollës.

Shërbimi për informim 

Hapet llogaria donatore për të pësuarit në tragjedinë e Laskërcës

Të nderuar qytetarë të Gostivarit dhe të Maqedonisë në përgjithësi, ju njoftojmë se konfrom Vendimit të Këshillit të Komunës së Gostivarit të miratuar unanimisht në seancën e 12-të, prej sot është aktive Llogaria e posaçme në të cilin do të mund të dononi mjete për ndihmë të familjarëve të viktimave dhe të lënduarve në tragjedinë në afërsi të fshatit Llaskërcë.

Mjetet mund t’i dononi në xhiro-llogarinë me numër:

716014021578990
Shifra e të ardhurave:
725916 00

Qëllimi i remitancës:
Përkrahje të pësuarve në tragjedinë në Llaskërcë Xhiro-llogaria do të jetë e hapur për një kohë të pacaktuar, ndërsa për ditën e mbylljes së saj vendim do të marrë Këshilli i Komunës së Gostivarit. Varësisht nga mjetet e grumbulluara, Këshilli do të vendosë edhe për mënyrën dhe lartësinë e mjeteve të cilat do tu ndahen të pësuarve.

Gostivarasit dhe qytetarët e Maqedonisë në përgjithësi, gjithmonë kanë ditur të tregohen humanë dhe solidarë. Ta dëshmojmë edhe kësaj here humanizmin tonë dhe të ndajmë dhembjen dhe humbjen bashkë me të pësuarit në tragjedinë më të madhe që goditi Gostivarin!
Shërbimi për informim

Të nderuar përfaqësues të OJQ,

Komuna e Gostivarit vazhdon të implementoj projektin e UNDP – Programi Regjional për Demokraci Lokale në Ballkanin Perëndimor (ReLOaD).Në kuadër të aktiviteteve të këtij projekti në vitin 2019, Ftojmë organizatat joqeveritare për pjesëmarrje në debatin publik i cili do të mbahet më datë 20.03.2019(e Mërkurë ) me fillim në ora 10.30 (në sallën e Këshillit komunal – Komuna e Gostivarit).

Në Debatin publik do të diskutohen Prioritetet e definuara (në atach...) duke pritur nga përfaqësues të OJQ-ve mendimet, sugjerimet dhe propozimet rreth të njëjtave. 

Në takimin e paraparë do të merr pjesë edhe ekipi i projektit të UNDP-së.

Me respekt,

Draft priorities_Gostivar_2019

NJOFTIM

Njoftohen familjarët e viktimave dhe personave të lënduar në fatkeqësinë me autobusin në afërsi të fshatit Llaskërcë, se në Qendrën për Shërbime Komunale pranë Komunës së Gostivarit (në katin përdhes) mund të parashtrojnë kërkesë për përkrahje financiare në përputhje me Vendimin e Këshillit të Komunës së Gostivarit të miratuar në seancën e fundit.

Familjarët e viktimave duhet të dorëzojnë Certifikatë të vdekjes së të ndjerit, kopje të letërnjoftimit dhe numrin e transaksionit të parashtruesit të kërkesës.

Udhëtarët tjerë duhet të dorëzojnë vetëm kopje të letërnjoftimit dhe numrin e llogarisë së transaksionit.

Në emër të personave të lënduar të cilët ende janë të shtrirë në spital, kërkesën mund ta parashtrojnë familjarët e afërt.

Vërejtje: Komuna e Gostivarit shfrytëzon listën zyrtare të udhëtarëve të siguruar nga ana MPB-së.

Shërbimi për informim      

Kryetari Taravari dhe zv/ambasadori britanik Otway, prezent në ekspozitën kundër ekstremizmit të dhunshëm

14.03.2019

Në sallën e vogël të Qendrës për Kulturë në Gostivar, u shfaq ekspozita me rreth 20 piktura të punuara nga nxënësit e shkollave fillore dhe të mesme të komunës së Gostivarit, të cilat trajtonin temën e luftës kundër ekstremizmit të dhunshëm.

Ishte kjo një ekspozitë në kuadër të projektit dyvjeçar që realizohet në tre komuna, respektivisht në Gostivar, Çair dhe Kërçovë e që mban titullin “Fuqizimi i qëndrueshmërisë së luftës kundër ekstremizmit të dhunshëm të komuniteteve lokale në Maqedoninë e Veriut”, i financuar nga ambasada e Britanisë së Madhe dhe ajo e Holandës.

Të pranishëm në ekspozitë ishin edhe kryetari i komunës së Gostivarit, Arben Taravari dhe zv/ambasadori i Mbretërisë së Bashkuar, Dominic Otway, përfaqësues të Stacionit policor të Gostivarit, përfaqësues të organizatave joqeveritare, etj.

Të pranishmëve iu drejtua kryetari i komunës së Gostivarit, Arben Taravari i cili me këtë rast falënderoi Ambasadën e Mbretërisë së Bashkuar dhe atë të Holandës për mbështetjen financiare të këtij projekti, respektivisht për kontributin e tyre për luftimin më efikas të ekstremizmit të dhunshëm

“Jam i sigurt se të gjithë ne sot duam të përcjellim një mesazh me një qëllim për një mjedis të sigurt dhe të këndshëm për të gjithë ne. Dhuna, ekstremizmi dhe radikalizmi nuk janë zgjedhja jonë. Në komunën dhe në vendin tonë nuk ka vend për dhunë dhe nuk dhuna nuk është mjet i mirë për mbrojtjen e të drejtave dhe lirive të njeriut Për një mjedis të sunduar nga paqja dhe liria, të gjithë ne e mbajmë përgjegjësinë”, theksoi mes tjerash Taravari.

Zëvendësamabsadori i Mbretërisë së Bashkuar, z. Dominic Otway tha se ata kanë punuar me pushtetin qendror dhe atë lokal me qëllim të luftimit të ekstremizmit të dhunshëm dhe se mënyra që ata e panë si më efikase është që ekstremizmi të luftohet nëpërmjet sportit dhe kulturës.

“Ne të Ambasadës britanike, jemi të lumtur që kemi mundësi të përkrahim një projekt i cili drejtpërdrejt prek një numër të madh të njerëzve në jetën e përditshme dhe u ndihmon komuniteteve. Në nivel lokal ne përkrahim Maqedoninë e Republikës së Veriut që të luftojë dhe parandalojë ekstremizmin e dhunshëm. Gjithashtu punojmë në nivel lokal që t’ju ndihmojmë të krijoni ligje. Punojmë me udhëheqës fetarë dhe udhëheqës të komuniteteve që t’i bëjmë njerëzit bashkë duke u ndihmuar që të mësojnë më shumë për njëri tjetrin”, nënvizoi zv/ambasadori Otway.

Dy punimet më të mira të kësaj ekspozite, u shpërblyen me vauçerë prej nga 1000 denarë.

Shërbimi për informim