Njohtim për realizim të aktivitetit sportiv “Fluturim, Çiklizëm dhe Ecje“ në Komunën e Gostivarit si pjesë e projektit “Fuqizimi i qëndrueshmërisë kundër ekstremizmit të dhunshëm të komuniteteve lokale në Maqedoni”

Të nderuar,

Qendra për bazë të përbashkët QBP me përkrahje nga Ambasada Britanike dhe Ambasada e Mbretërisë së Holandës në Shkup realizon projektin “Fuqizimi i qëndrueshmërise kundër ekstremizmit të dhunshëm të komuniteteve lokale në Maqedoni”, me kohëzgjatje prej 15 tetor 2018 deri më 15 tetor 2020. Projekti synon të mbështesë Strategjinë Kombëtare dhe Planin Aksional për Kundërshtimin e Ekstremizmit të Dhunshëm duke forcuar bashkëpunimin ndërmjet aktorëve lokal duke përfshirë drejtuesit civilë, fetarë dhe të rinjt dhe autoritetet lokale / qendrore për çështjet e Parandalimit dhe Kundërshtimin e Ekstremizmit të Dhunshëm duke krijuar Ekipet e Veprimit në Komunitetit (EVK) brenda tre pilot komunave Çair, Gostivar dhe Kërçovë.

Përveç këtyre aktiviteteve, do të organizohen ngjarje sportive dhe kulturore në tre pilot komuna, ku do të marrin pjesë të rinj, qytetarë nga Komuna e Gostvarit. Aktiviteti i dytë sportiv është paraparë të realizohet në Komunën e Gostvarit në 24.07.2019 (e mërkurë), ky aktivitet përfshin elemente të bashkëpunimit, komunikimit dhe ndërlidhjen e fëmijëve dhe të tjerëve me prejardhje të ndryshme etnike, në të njëjtën kohë, promovimin e tolerancës, bashkëjetesës paqësore, kohezionit social dhe bashkëpunim në nivel kulturor. Aktiviteti sportiv “Fluturim, Çiklizëm dhe Ecje“ do të fillojë në ora 10.00 në Fshatin Koritë. Gjatë orës së parë, paraglaiderista profesionistë do të fluturojnë së bashku me pjesëmarrësit e interesuar. Pikë-nisja me paraglaider do të jetë në fshatin Koritë, ndërsa zbritja në fshatin Çegran. E pasuar me çiklizëm, ku pjesëmarrësit do të sjellin biçikletat personale dhe do të ngasin biçikletë nga Gostivari deri në Vërtok. Në fund, qytetarët do të bëjnë ecje gjysëm malore/të lehtë rreth lumit Vardar, duke u nisur nga Vërtoku për në Gostivar.

Në orën 12.30 Kryetari i Komunës së Gostivarit Z. Arben Taravari do të mirëpresi Ambasadoren e Mbretërisë së Bashkuar Zonjën Rachel Galloway, në Vërtok dhe më pas Zonja Galloway do të marri pjesë në aktivitetitn e ecjes deri në Gostivar.
Përveç qytetarëve, çiklistë profesionistë dhe paraglaideristë do të jenë pjesë e ngjarjes një ditore.
Ngjarja nuk do të ketë fjalime oficiale, e njejta do të fokusohet vetëm në promovimin e sportit si vlerë dhe çiklizmin si mënyrë ekologjike dhe e shëndetshme transportuese.

Për më shumë informacione dhe pregaditjet e mëtejshme në lidhje me këtë ngjarje mund të më kontaktoni në mob 078/243-953.

Faleminderit paraprakisht për bashkëpunimin.

Taravari dhe Suma bisedojnë për vendosje bashkëpunimi të ngushtë

22.07.2019

Kryetari i komunës së Gostivarit, Arben Taravari priti sot në kabinetin tij kryetarin e komunës së Hanit të Elezit (Kosovë), Rufki Suma.

“Ishte nder dhe privilegj të pres sot kryetarin e komunës së Hanit të Elezit, Rufki Suma i cili me sukses po e menaxhon komunën për tre mandate. Ai është një role model për kryetar komune dhe kuptova se ai nuk ka bërë asnjëherë fushatë aktive, madje as posterë me fotografinë e tij, që do të thotë se qytetarët dinë ta vlerësojnë punët e kryetarëve të komunave. Ky është takimi ynë i dytë, hera e parë si ministër i shëndetësisë dhe tani si kryetar i komunës së Gostivarit. Biseduam për vendosjen e një bashkëpunimi të ngushtë dhe shpresoj së shpejti t’i bëj një vizitë kthese në komunën e Hanit të Elezit”, theksoi kryetari Taravari, pas takimit.

Ndërkaq kryetari i komunës së Hanit të Elezit theksoi se komuna që drejton ai ka nevojë për eksperiencën e Komunës së Gostivarit dhe se kjo është një arsye më shumë që të rritet bashkëpunimi ndërmjet dy komunave.

“Falënderoj kryetarin Taravari për pritjen e ngrohtë. Biseduam për shkëmbim të përvojave dhe shpresojmë si rezultat i bashkëpunimit do të mund të aplikojmë për projekte të IPA fondeve”, nënvizoi kryetari i komunës së Hanit të Elezit Suma.

Shërbimi për informim

U shpalos agjenda e Verës Kulturore Gostivari 2019

22.07.2019

Bashkëpunëtorja për kulturë pranë Komunës së Gostivarit, Imërlije Saliu në një konferencë për shtyp shpalosi sot agjendën e aktiviteteve në kuadër të Verës Kulturore – Gostivari 2019 që edhe sivjet mban moton “Mirë se Vini Mërgimtarë”, sepse përkon me qëndrimin e mërgimtarëve tanë në vendlindje.

“Në agjendë janë përfshirë projekte të larmishme kulturore që kanë mbështetje financiare dhe logjistike nga ana e Komunës. E rëndësishme është të theksohet se në këto aktivitete janë përfshirë të gjitha etnicitetet që jetojnë në Komunën tonë pa përjashtim, dhe të gjitha përkatësitë fetare. Risi këtë vit është The Park Festival, projekt ky i mbështetur financiarisht nga Ministria e Kulturës, nga Komuna e Gostivarit si dhe me mjete vetanake të Shoqatës Inbox Entertaiment, të cilën publiku do të mund ta shijojë në dy fundjavët e ardhshme, edhe atë: 26, 27, 28 Korrik dhe 2, 3, 4 Gusht” theksoi znj. Saliu.

Ajo njoftoi se një aktivitet tjetër është “Fly Hike and Bike”, projekt ky i mbështetur nga Britania e Madhe, ku qytetarët në mënyrë vullnetare do të bashkëngjiten në paraglaiding, ciklizëm dhe ecje në natyrë.
“Në kuadër të Verës Kulturore, 4 nga projektet janë të mbështetura financiarisht dhe të organizuara nga vetë Komuna, edhe atë: New Stars Are Coming” – projekt multietnik që ka për qëllim promovimin e artistëve të rinj të qytetit tonë, pastaj Koncerti me Ilahi. Do të kemi edhe Stand up Comedy me Hadsim Memishi Sopi, si dhe manifestimin kushtuar Ditës së Ilindenit”, theksoi në vazhdim Imërlije Saliu.

Ajo sqaroi se në kuadër të aktiviteteve është edhe projekti nga shoqata Bashkërisht Mundemi i titulluar “Sporti na bashkon” ku pjesëmarrës do të jenë njerëzit me aftësi të veçanta. Si dhe konferenca shkencore me temë ”Etnokultura e trevave të Gostivarit”
“Siç shihet, hapësirë për bashkëpunim kanë pasur të gjithë shoqatat dhe qytetarët që kanë pasur dëshirë dhe vullnet për bashkëpunim”, nënvizoi znj, Saliu.

Ajo u bëri thirrje të gjithë qytetarëve që të bëhen pjesë e kësaj agjende, ndërsa mërgimtarëve u dëshiroi qëndrim të këndshëm në vendlindje.

Shërbimi për informim

 

NP “Parkingjet publike dhe gjelbërimi” – Gostivar, shënon rezultatet më të mira që nga themelimi i saj

22.07.2019

Ndërmarrja publike për menaxhim me parkingjet publike dhe sipërfaqet e gjelbëruara nga Gostivari, këtyre muajve ka shtuar aktivitetet dhe është duke shënuar rezultatet më kulminante që nga themelimi.

Në parkun e madh të qytetit sapo ka përfunduar instalimi i sistemit automatik për ujitje, ndërsa në vijim është rregullimi i rretheve të reja me lule dekorative në anën përskaj rrugës në lagjen Dutllëk. Rrethrrotullimet nëpër qytet kanë marrë një pamje krejtësisht të re, ndërsa është bërë edhe edhe rregullimi hortikulturor i oborreve të disa shkollave komunale.

“Qytetarët e duan gjelbërimin dhe e duan të bukurën. Për këtë që bëjmë na përgëzojnë jo vetëm qytetarët e komunës së Gostivarit, por edhe nga qytetet tjera dhe na thonë se puna jonë duhet të shërbejë si shembull edhe për komunat tjera. Në bazë të mundësive financiare dhe kapaciteteve me të cilat disponojmë, ne do të vazhdojmë të punojmë që në qytet por edhe nëpër fshatra të krijojmë sa më shumë sipërfaqe të gjelbra dhe të rregulluara në aspektin hortikulturor”, thekson Bekim Çelebiu – drejtor i NP “Parkingjet publike dhe gjelbërimi”.

Çelebiu thotë se për çdo aktivitet të ndërmarrjes të cilën ai e drejton, ka pasur përkrahje të pa rezervë nga kryetari i komunës së Gostivarit, Arben Taravari.

Ai apelon deri tek qytetarët që të kujdesen për sipërfaqet e gjelbra, sepse ato janë një pasuri e përbashkët.

Shërbimi për informim

Së shpejti do të hapet edhe një kopsht fëmijësh në Gostivar

19.02.2019

Në objektin e  ish Shkollës fillore në fshatin Banjicë e Poshtme, në vijim janë punët intensive për adaptimin e tij për Kopsht fëmijësh.

Bëhet fjalë për një investim të Komunës së Gostivarit në vlerë prej rreth 50 mijë euro, me çka do të bëhet rikonstruktim i plotë i objektit në fjalë.

Rikonstruktimi i brendshëm dhe i jashtëm do të përfshijë instalimin e ri të rrymës elektrike, banjo të reja, pllaka të reja të qeramikës, sistem i ri i ujësjellësit dhe kanalizimit, si dhe do të bëhet zëvendësimi i dritareve të vejtra me dritare me efikasitet energjetik. Ndërsa sa i përket ngrohjes qendrore, do të instalohet edhe pompa termike si standard më bashkëkohor.

Pritet që së shpejti të përfundojnë punimet, dhe Kopshti i ri i fëmijëve të jetë i gatshëm të pranojë fëmijë të të gjitha nacionaliteteve, respektivisht përkujdesja dhe edukimi i tyre do të bëhet në gjuhën shqipe, maqedonase dhe turke.

Nga Sektori për veprimtari publike pranë Komunës së Gostivarit thonë se kjo bëhet për shkak se në listën e  pritjes të  IPKF “Gëzimi Fëmijëror” vazhdimisht numri është i madh dhe se kjo do të jetë një rast i mirë sidomos për banorët e dy Banjicave dhe lagjeve Dutllok, Lajthia, Banjeshnica dhe Fazaneria që të regjistrojnë fëmijët në këtë kopsht.

Shërbimi për informim 

Debreshi bëhet me stadium bashkëkohor për futboll të vogël

18.07.2019

Një nga kërkesat kryesore të banorëve të fshatit Debresh, njëhertit dhe premtim I kryetarit të komunës së Gostivarit, Arben Taravari, këtyre ditëve u realizua në tërësi. Debreshi u bë me stadium për futboll të vogël i cili plotëson të gjitha standardet bashkëkohore.

“Ishte kjo një ndër kërkesat dhe nevojat kryesore të Debreshit. Ne si Komunë përpiqemi të investojmë sa më shumë për krijimin e kushteve më të mira për fëmijët dhe të rinjtë tanë, që sadopak të ndikojmë në reduktimin e migrimit të rinisë dhe të pengojmë dukuritë devijante te kjo grupmoshë. Stadiumi që sapondërtuam në Debresh plotëson të gjitha standardet bashkëkohore dhe uroj që rinia e këtij vendbanimi ta shfrytëzojë sa mël shumë dhe sa më gjatë”, thotë kryetari Arben Taravari.

Për asfaltimin dhe shtrimin me bare artificial me granula ekologjike, ulëseve dhe bankave, Komuna e Gostivarit ka pagur rreth 50 mijë euro, ndërsa krahas kësaj janë realizuar edhe punë shtesë për çka është angazhuar edhe Bashkësia lokale e fshatit.

Shërbimi për informim

Punohet intensivisht në zgjerimin e rrjetit të kanalizimit në disa fshatra të komunës së Gostivarit

17.08.2019

Komuna e Gostivarit nëpërmjet Ndërmarrjes publike për veprimtari komunale “Komunalec” – Gostivar, është duke zgjeruar rrjetin e kanalizimit në disa fshatra, me ç’rast qasje në kanalizim do të kenë edhe rreth 10 për qind e popullsisë së përgjithshme të komunës së Gostivarit.

Në fshatin Çajlë, është duke u ndërtuar rrjet kanalizimi me gjatësi të përgjithshme 3022 ku pas përfundimit të punimeve, të gjitha amvisëritë e këtij fshati do të kenë qasje në kanalizim.

Para përfundimit janë punimet për ndërtim të kanalizimit në fshatin Banjicë e Epërme, me gjatësi prej 3199 metra, me çka ky fshat i cili deri më tani nuk ka pasur fare linjë kanalizimi, i tëri do të përfshihet me rrjet kanalizimi.

Nga ana tjetër, vazhdojnë punimet për ndërtimin pjesës së fundit të kanalizimit në fshatin Turçan i Madh, ndërsa këtyre ditëve ka filluar edhe ndërtimi i kanalizimit në një pjesë të lagjes Banjeshnicë të Gostivarit, në gjatësi prej 180 metra.

Pas përfundimit të ndërtimit të rrjetit të kanalizimit në fshatin Zdunjë, në vijim është sjellja e rrugës në gjendjen e mëparshme, respektivisht bëhet asfaltimi i pjesëve të dëmtuara të rrugës gjatë realizimit të punimeve.

“Kjo nënkupton se rreth 10% e popullsisë të komunës së Gostivarit, të cilët deri më tani nuk kanë qenë të kyçura në rrjetin e kanalizimit, tashmë ose janë lidhur ose do të lidhen së shpejti. Planifikojnë që në të ardhmen e afërt të vazhdojë zgjerimi i rrjetit të kanalizimit edhe në disa fshatra fushore të komunës ku në pjesë të caktuara mungon kanalizimi, siç është rasti me fshatin Raven, si dhe në disa lagje të qytetit ku kanalizimi mungon vetëm nëpër disa rrugica”, thotë Isak Lazami – drejtori i NP “Komunalec”.

Kjo ndërmarrje, aktualisht punon edhe në instalimin e një linje të re ujësjellësit në fshatin Çajlë, me gjatësi prej 450 metrash.

Shërbimi për informim

 

NJOFTIM: Të premten do të bëhet dezinsektimi i parë nga toka në territorin e komunës së Gostivarit

09.07.2018

Njoftohen qytetarët se më datë 12.07.2018 (e premte), do të bëhet dezinsektimi i parë nga toka në territorin e Komunës së Gostivarit për zhdukjen e mushkojave të rritura dhe dëmtuesve të tjerë.

Dezinsektimi do të kryhet në mbrëmje pas orës 24:00 deri në orët e hershme të mëngjesit, vetëm në kushte të mira atmosferike.

Lokacionet në të cilat do të bëhet dezinsektimi nga toka janë me sa vijon:
Rr. “Zhivko Brajkoski” – Parku i i qytetit nga ana e majtë e lumit Vardar, rr. “M.Ç Filiposki” – Parku i qytetit nga ana e djathtë e lumit Vardar, Spitali i qytetit, rr. “JNA” deri te udhëkryqi i Zdunjës, shtrati i lumit Vardar në atarin e fshatit Raven, kanali prej udhëkryqit të Zdunjës – Zona e VI – Maleardi – rr. Boris Kidriç – rr.Beliçica deri në lagjen Fazaneria- vendbanimi Banjicë – bulevari i Vëllezërit Gjinoski, përmes Sheshit të qytetit deri në dalje të qytetit kah fshati Çajlë e deri tek lumi Jahorkë në fshatin Forinë .

Në rast të kohës me shi ose me erë të fortë dezinsektimi do të anulohet për ditën e ardhshme ose për ndonjë ditë tjetër me kushte më të mira atmosferike.
Për dezinsektim do të përdorët Aurodil i tretur në bazë të prospekteve të prodhuesit për përdorim, edhe atë 50 ml / 5 l.

Luten kultivuesit e bletëve që të marrin masat e duhura mbrojtëse, që do të thotë të strehojnë bletët në kutitë e tyre, të sigurojnë sasi të nevojshme të ujit për mbajtjen e bletëve të mbyllura minimum 5-6 orë pas trajtimit të territorit.

Dezinsektimin do ta kryejë SHPTSHP “PLANT MEDIKA”.

Shërbimi për informim

Ndërmarrja e parkingjeve publike lëshon bileta javore, dy javore dhe mujore për parkim zonal

08.07.2019

NP “Parkingjet publike dhe gjelbërimi” prej sot fillon me lëshimin e biletave javore, dyjavore dhe mujore për parkim zonal.

“E futëm këtë shërbim me qëllim që gjatë qëndrimit në vendlindje, mërgimtarëve t’ua lehtësojmë parkimin e automjeteve, sepse viteve të kaluara kishim ankesa nga ana e tyre se hasin në vështirësi gjatë dërgimit të sms porosive sepse kryesisht përdorin celularë me numra të jashtëm. Por, kjo nuk do të thotë se këto lehtësime nuk do të mund t’i shfrytëzojnë edhe banorët e përhershëm të komunës së Gostivarit”, thotë drejtori i ndërmarrjes, Bekim Çelebiu.

Nga kjo ndërmarrje njoftojnë po ashtu, se do të hiqen nga përdorimi bllokatorët dhe se ata të cilët do t’i parkojnë makinat pa paguar shërbimin, do të zbatohen gjoba përkatëse.

Në pjesën qendrore të qytetit do të hapen pika pagesore, ndërsa lokacionet qytetarët do të mund t’i identifikojnë shumë lehtë, sepse në xhamat e shitoreve ku mund të sigurohen biletat do të ngjiten etiketa me mbishkrimin: Parking tickets.

Komuna e Gostivarit apelon deri tek të gjithë qytetarët që tu përmbahen rregullave për parkim zonal, me çka do të shmangin situatat e padëshirueshme për ata vetë, si dhe do të kontribuojnë që të vihet rend në parkim dhe në trafikun rrugor në përgjithësi.

Shërbimi për informim

Javën e ardhshme hapet Zyra për Mërgimtarët pranë Komunës së Gostivarit

04.07.2019

Më 15 korrik (e hënë), do të fillojë me punë Zyra për Mërgimtarët pranë Komunës së Gostivarit.
Zyra do të qëndrojë e hapur deri më 23 gusht, për tu rihapur sërish në muajin dhjetor kur mërgimtarët tanë do të kthehen sërish në vendlindje për të kaluar pushimet.

Zyra për Mërgimtarët do të funksionojë në formën e “Sistemit një sportel”, ndërsa orari i punës do të zgjasë prej në ora 08:00 deri në ora 20:00, çdo ditë pune.

Hapja e kësaj zyre bëhet me qëllim që mërgimtarëve tanë tua lehtësojmë deri në maksimumin e mundshëm procedurat administrative pranë Komunës.

Zyra për Mërgimtarët gjendet në Qendrën për Shërbime Komunale, në katin përdhes të selisë së Komunës së Gostivarit.

Shërbimi për informim