Festë e vërtetë për adhuruesit e librit, u hap Panairi “Gostivari 2018”

26.11.2018

Me një ceremoni rasti, sot në mënyrë solemne u hap Panairi i librit “Gostivari 2108”.

Bashkë-organizatorë të panairit, i cili njëherit është edhe i pari në këtë format në Gostivar, janë Komuna e Gostivarit dhe Shoqata e Botuesve Shqiptarë në Maqedoni.

Në prani të qindra vizitorëve në palestrën sportive “Rinia”, fjalim rasti mbajti kryetari i komunës së Gostivarit, Arben Taravari i cili mes tjerash theksoi, se mënyra më e mire për të zhvilluar imagjinatën është leximi, andaj apeloi që secili vizitor të blejë të paktën një libër.

“Dua që si mjek, neurolog, të dërgoj një mesazh. Mënyra më e mire për të zhvilluar imagjinatën, është leximi i librave. Shpresoj që masovikisht qytetarët e Gostivarit dhe rajonit më të gjerë do ta vizitojnë këtë panair dhe se do të blejnë të paktën nga një libër. Le t’i shmangim sa më shumë celularët dhe tabletet dhe sa më shumë kohë t’i kushtojmë leximit, sidomos gjeneratat e reja”, nënvizoi kryetari Taravari.

Panairi i librit “Gostivari 2018” do të jetë i hapur tri ditë, respektivisht deri të mërkurën. Do të prezantohen 14 shtëpi botuese nga Maqedonia dhe Shqipëria, me libra të autorëve shqiptarë dhe të huaj, vepra letrare bashkëkohore dhe klasike, letërsi profesionale, shkencore dhe beletristike, lektyra shkollore, enciklopedi dhe vepra nga sfera e kulturës dhe artit, të destinuar për të gjitha grupmoshat.

Shërbimi për informim

(më tepër…)

Çerdhet, shkollat fillore dhe të mesme publike të komunës së Gostivarit, të përgatitura për sezonin e ngrohjes

21.10.2018

Të gjitha shkollat fillore dhe të mesme, si dhe kopshtet e fëmijëve të komunës së Gostivarit janë të furnizuara me lëndë djegëse dhe prej nesër do të fillojë edhe ngrohja e tyre.

Një pjesë e shkollave kanë rezerva nga viti i kaluar, ndërsa tek ato ku lëndët djegëse mungonin, të premten ka përfunduar furnizimi qoftë me naftë qoftë me dru.

“Në shumicën e objekteve shkollore në komunën e Gostivarit funksionon ngrohja qendrore me naftë, ndërsa vetëm në disa shkolla në zonat rurale për ngrohje shfrytëzohet druri. Pjesa më e madhe e shkollave kishin rezerva nga viti i kaluar, ndërsa aty ku mungonte nafta ose drutë , furnizimi përfundoi të premten dhe lirisht mund të themi se jemi të përgatitur për të startuar të hënën me ngrohje, kur sipas parashikimeve do të ulen edhe temperaturat”, njofton Aslian Snopçe – udhëheqëse e Sektorit të arsimit pranë Komunës së Gostivarit.

Vlen të theksohet se para pak ditësh përfundoi edhe instalimi i ngrohjes qendrore në shkollën periferike në fshatin Zdunjë, ndërsa planifikohet që ngrohje qendrore të instalohet edhe në ato pak shkolla ku ajo mungon.

Ndërkaq, tash në prag të sezonit të reshjeve të shiut dhe borës, si problem mbetet pullazi i SHF “Goce Dellçev”, për çka Komuna e Gostivarit ka përfunduar të gjitha procedurat e nevojshme dhe pritet miratimi dhe financimi nga ana e Ministrisë së Arsimit.

Shërbimi për informim

Çerdhet për fëmijë në Forinë dhe Raven janë gati, pritet pëlqimi prej Ministrisë së dikasterit

02.10.2018

Komuna e Gostivarit ka përfunduar me obligimin e saj për përgatitjen e dy Qendrave për zhvillim të hershëm fëmijëror, për grupmoshën prej 3 deri më 5 vjeç, në fshatin Forinë dhe në fshatin Raven, si pjesë e grantit të përfituar nga UNICEF-i në vlerë prej rreth 18 mijë euro.

Në bazë të memorandumit të nënshkruar për bashkëpunim me UNICEF-in, Komuna e Gostivarit mori përsipër që të kofinancojë 10 mijë euro, me çka u përmbushën të gjitha kushtet e nevojshme për mësonjëtoret që do të funksionojnë në kuadër të godinave ekzistuese shkollore.

Për çerdhet në fjalë, vijojnë procedurat për marrjen e Pëlqimit nga ana e Ministrisë së Punës dhe Politikës Sociale, pas çka të njëjtat do të vihen edhe në funksion.

Nga Sektori për Veprimtari Publike, njoftojnë se Komuna e Gostivarit do të angazhohet që përmes granteve dhe mjeteve të veta buxhetore, të hapë sa më shumë qendra të këtilla dhe me përkujdesje dhe edukim të përfshihen edhe fëmijët e moshës parashkollore në fshatrat tjera përfshirë këtu edhe zonat më të thella rurale.

Shërbimi për informim

Kryetari Taravari mori pjesë në “Stafetën e Barazisë”

24.09.2018

Komuna e Gostivarit në bashkëpunim me organizatat joqeveritare “Bashkarisht mundemi” nga Gostivari, “Vera” nga Strumica dhe Qendra e resurseve të Prindërve të fëmijëve me nevoja të posaçme, organizuan aktivitetin e quajtur  “Stafeta e Barazisë”.

Ishte kjo stafeta e katërt me radhë e fëmijëve me nevoja speciale, ku morën pjesë kryetari i komunës së Gostivarit Arben Taravari, kryeparlamentari Talat Xhaferi, aktivistë, vullnetarë, nxënës, artsitë të ndryshëm dhe qytetarë të tjerë.

Pjesëmarrësit në këtë event, përmes këtij aktiviteti dhanë mbështetjen e tyre dhe i dërguan mesazh shoqërisë në të cilën jetojmë se edhe fëmijët me nevoja speciale janë pjesë e shoqërisë, dhe se të gjithë jemi të barabartë,

“Ndërgjegjëshmëria është gjithëpërfshirje. Unë personalisht dhe Komuna e Gostivarit gjithnjë do të jemi në krah të fëmijëve me nevoja të veçanta. Ata janë pjesë e pandashme e shoqërisë sonë dhe meritojnë pëkrushtim sa më të madh që të jenë edhe pjesë e barabartë e shoqërisë dhe të shjijojnë jetën si bashkëmoshatarët e tyre”, theksoi kryetari Taravari.

Shërbimi për informim

Aslian Snopçe: Veprimet e fundit të degës së BDI-së në Gostivar konfirmojnë se qëllimi i heqjes së kompetencave në arsim ishte thjesht politik

05.08.2018

Udhëheqësja e Sektorit të Arsimit, Aslian Snopçe mbajti konferencë për shtyp në lidhje me veprimet e fundit të nëndegës së BDI-së në Gostivar, prej nga kërkojnë që drejtorët e dhunshëm të shkollave fillore dhe të mesme të Gostivarit nga radhët e tyre, dokumentacionin zyrtar ta dorëzojnë në zyrën e degës së partisë.

Përmbajtjen e konferencës për shtyp, ua përcjellim në mënyrë integrale.

nderuara media,

Pres konferenca e sotme ka për qëllim të informimit të opinionit në Gostivar dhe më gjerë se filloi të jetësohet plani ogurzi i projektuar nga ana e Ministrisë për arsim, për shkatërrimin e arsimit në qytetin e Gostivarit.

Ky plan fillimisht nisi të realizohet me marrjen e kompetencave të komunës së Gostivarit për gjoja mosrespektim të procedurave ligjore. Se plani ka qenë i thurur mirë, dëshmon fakti që në vend të periudhës kohore 6 mujore që ka qenë praktikë në të kaluarën, komunës së Gostivarit kompetencat iu morën për 9 muaj. S’do mend se konkluzioni është shumë i thjeshtë. Të pengohet kryetari në planifikimin strategjik në sferën e arsimit, duke u pamundësuar të ndikojë për një mbarëvajtje të shëndoshë në këtë sferë, pasi që strategjitë dhe planet bëhen pikërisht në prag të fillimit të vitit shkollor. Veprimet e degës së BDI-së në Gostivar dëshmojnë atë për të cilën ne kemi tërhequr vërejtjen disa herë. Qëllimi ka qenë pastër politik.

Kjo u dëshmua dje. Të gjithë gostivarasit panë se si drejtorët e emëruar nga ana e ministrit për arsim marrin urdhra partiake duke u detyruar që dokumentacionet e shkollave ti dorëzojnë në selinë partiake të BDI-së. A ka mjerim më të madh se kjo? A ka poshtërim më të madh për arsimin, bile edhe për drejtorët e partiak? Normalisht që kjo bëhet edhe me koordinim me ministrin e arsimit. Ministri thotë mos përhapni të pavërteta për skandalin 5.3 milion Euro për marrëveshjen në 4 sy jashtë procedurave të rregullta. E pyesim ministrin se si do ta mbulon këtë skandal të ri nënçmimit të drejtorëve të emëruar nga ana e tij?

Prandaj, është koha e fundit që të hiqet dorë prej strategjisë mirë të koordinuar nga ana e qeverisë, ku fatkeqësisht realizues është ministri shqiptar i arsimit që ka për qëllim katandisjen e arsimit në Gostivar.

Në vend që të ketë investime, në vend që të mbizotërojnë vlerat, në këtë kohë ku rinia me të madhe shpërngulet nga atdheu, BDI-ja e degradon edhe atë shpresë të vogël të shoqërisë, e që është arsimi i shëndosh I gjeneratave të reja.

Komuna e Gostivarit në krye me kryetarin Taravari, dëshmoi më së miri se si menaxhohet pa e politizuar sferën e arsimit. Ju kujtojmë të gjithëve se punësimet u bënë me konkurs të rregullt, dhe prej 150 vendeve me kontratë në vepër, u intervenua vetëm në 30 raste ku kryesisht kishin të bënin me moskompetencë të kuadrit. Forma e fundit me të cilën veprojnë drejtorët e emëruar, tregon një tendencë eklatante të politizimit në këtë sferë. E ftojmë qeverinë që në këto kohëra ku me të madhe trumbetohet me Eurointegrimet, të heqë dorë nga arsimi në Gostivar. Në Evropë janë parime krejtësisht të tjera. Nuk mundet me gojën plotë të thuash jemi për Evropë, e nga ana tjetër të veprosh ashtu siç u veprua dje ndaj drejtorëve partiak të BDI-së. Nuk mund të jesh për Evropë dhe për 6 muaj mos te kthesh përgjigje ndaj kërkesës së komunës për transformimin e vendeve të punës.

Ne si komune nuk bëmë selektim partiak siç kane bërë dhe po bëjnë ata të BDI-së. Ne parashtruam kërkesë për mbi 40 punëtorë. Mospërgjigja, mbajtja në sirtar të dokumentacionit me kërkesë valide nga komuna, e demonstron qëllimin dhe bashkëveprimin nga ana e Ministrisë në këto skandale. I bëjmë ftesë publike prokurorit publik dhe inspektorëve arsimorë të bëjnë hetimet përkatëse në lidhje me fshehjen e përgjigjes me qëllim të degradimit dhe fshesës së kuadrit arsimor në Gostivar. Sipas informacioneve që posedojmë, në të kaluarën përgjigjet e kësaj natyre janë realizuar brenda një afati prej 3 javësh. Brenda kësaj periudhe, Komisioni për transformimin e vendeve tri here ka parashtruar kërkesën për transformim dhe ende nuk kemi marrë asnjë përgjigje.

I ftojmë qytetarët që të bëjnë durim. Strategjia jonë e depolitizimit s’ka çare pa mos u implementuar. Kompetencat na u morën, por ata pas dy muajve do të kthehen. Së bashku me vullnetin e pathyeshëm të qytetarëve të Gostivarit do t’ia dalim mbanë. Më lejoni që t’i bëjmë me dije të gjithë gostivarasve, të gjithë punëtorëve arsimorë, mësuesve, arsimtarëve, profesorëve që të mos brengosen. Në Gostivar, arsimi, prej 22 nëntorit, një herë e përgjithmonë do të vendoset në binarë të shëndoshë. Nuk do të ketë favorizime, nuk do të ketë diferencime. Do të eliminohet një herë e përgjithmonë partizimi në institucionet arsimore. Projekti ynë “Gostivari i pari” , ashtu siç efektuohet në aspektet infrastrukturore të komunës, njësoj do të efektuohet edhe në arsim. Atë do ta dëshmojmë së shpejti.

Ne ditët në vijim do të dalim edhe me shifrat konkrete për fshesën e bërë nga ana e drejtorëve partiakë të BDI-së me urdhër të shefave te tyre lokalë (për çka e dhamë dëshminë e mësipërme) dhe me pëlqimin direkt të ministrit për arsim.

Shërbimi për informim

Fondacioni “Mërgimtarët nga Zvicra për Gostivarin” dhuron çanta dhe mjete mësimore – aksionit i bashkëngjitet edhe Komuna e Gostivarit dhe Këmbimorja “Alpina”

04.09.2018

Fondacioni “Mërgimtarët nga Zvicra për Gostivarin” ka donuar çanta dhe mjete mësimore për 100 nxënës me status të rrezikuar social. Aksioni i tyre gjet mbështetjen edhe nga Komuna e Gostivarit, me ç’rast “Alpina” siguroi çantat ndërsa Komuna mjetet mësimore edhe për 100 nxënës të tjerë. Dyqind çanta dhe mjetet e nevojshme mësimore janë të dedikuara për nxënësit e ciklit të ulët shkollor, respektivisht prej klasës së parë deri në klasën e pestë të shkollës fillore, të cilët vijnë nga familjet me status të rrezikuar social, si dhe për nxënësit me nevoja speciale.

“Janë mërgimtarët, ata të cilët nuk rreshtin kurrë së dërguari mall, dashuri dhe përkujdesje për të gjithë ne që jetojmë këtu. Këtë e dëshmojnë me mënyra shumë fisnike duke mbështetur me mjete shkollore të gjithë ata fëmijë që nuk kanë mundësitë e duhura për të nisur vitin e ri shkollor. Gjesti i tyre është një akt humanizmi dhe patriotizmi. Kësaj nisme të tyre iu bashkëngjit edhe pronar i Këmbimores ”Alpina”, z. Zlfet Idrizi të cilin po ashtu e falënderoj”, thotë kryetari i komunës së Gostivarit, Arben Taravari.

Komuna e Gostivarit inkurajon dhe i mbështet të gjithë ata të cilët në mënyra të ndryshme tregojnë në vepër humanitetin e tyre, e sidomos kur ndihma dhe kontributi i tyre u dedikohet fëmijëve.

Shërbimi për informim

Fituesja e çmimit mansion në olimpiadën e shkollave të mesme në Nju Jork, Gentiana Jashari në vizitë te kryetari Taravari

26.06.2018

Kryetari i komunës së Gostivarit, Arben Taravari pranoi në kabinetin e tij nxënësen Gentiana Jashari, fituese të çmimit mansion në olimpiadën Genius – International High School Environmental Project në Nju Jork.

“Gjithmonë kam thënë se njerëzit e kulturës dhe sportit janë ambasadorët më të mirë të një populli dhe kombi nëpër botë. Gentiana ka korrur sukses në një kompeticion ndërkombëtar me karakter kulturor dhe arsimor. Kjo na bën krenar sepse ajo ka përfaqësuar atje qytetin dhe komunën tonë. Në këto shtatë-tetë muaj, komuna në bazë të mundësive ka ndihmuar kulturën dhe sportin në Gostivar dhe do të vazhdojmë ta bëjmë këtë edhe në të ardhmen”, theksoi kryetari Taravari.

“Falënderoj kryetarin e komunës Arben Taravari, Këshillin e komunës, administratën komunale dhe mërgimtarët e fshatit Çajlë për mbështetjen materiale. Po ashtu falënderoj Ebrar Mazarin dhe Bastri Ristemin për incizimin e këngës, si dhe mentoren time profesoreshën Besa Xhaferi Sadiki. Unë në Nju Jork nuk prezantova vetëm vetveten apo shkollën time, por prezantova gjithë Gostivarin dhe përcolla mesazhet e mia për mbrojtjen e mjedisit jetësor. Jam e lumtur që gjithë ai angazhim në fund u kurorëzua edhe me sukses”, tha Gentiana Jashari.

Në olimpiadën në New York morën pjesë nxënës prej 72 vendeve të ndryshme të botës, të cilët garuan me 729 projekte. Kolegji Jahja Kemal – Maqedoni garoi me 62 projekte duke siguruar një medalje të artë, tre medalje të argjendta dhe katër të bronzta.

Gentiana Jashari e cila është nxënëse e vitit të dytë në kolegjin Jahja Kemal në Gostivar, u kurorëzua me çmimin mansion në kategorinë e artit, e cila u prezantua me hitin New Rules të këngëtares shqiptare me famë botërore Dua Lipa dhe me një ese për senzibilizimin e popullatës për mbrojtjen e mjedisit jetësor dhe ndërtimin e një fabrike për riciklim të mbeturinave në Gostivar.

Shërbimi për informim

Kryetari Arben Taravari promovoi këndet e reja për fëmijë

04.06.2018

Kryetari i komunës së Gostivarit Arben Taravari, sot doli në terren për të parë si rrjedhin punimet për ndërtimin e këndeve të reja për fëmijë.

Së pari ai u ndal te këndi i fëmijëve përballë Gjyqit në Gostivar, ku ky kën i ri i fëmijëve tash më është në funksion, e më pas vizitoi edhe shkollën fillore në fshatin Debresh ku në rrjedhë është vendosja e rekuiziteve te klëndi i ri i fëmijëve në oborrin e këlsaj shkolle.

Katër prej gjithsej gjashtë lokacioneve ku do të vendosen rekuizite, janë kënde të reja fëmijësh, ndërsa vetëm dy prej tyre kanë ekzistuar prej më herët dhe tani rekuizitat e vjetra do të zëvendësohen me rekuizita të reja.

“Planifikuam ndërtimin e katër këndeve për fëmijë si dhe ndërrim e rekuzitave të vjetar me të reja , në dy kënde ekzistuese. Shpresoj se brenda dy javëve do t’i përfundojmë katër kënde për fëmijë. Mendoj se fëmijët meritojnë argëtim dhe rekreacion të këtillë dhe se këto duhet të zgjerohen. Do mundohemi që në periudhën e ardhshme të ndërtojmë edhe disa të reja”, theksoi kryetari Taravari.

Banorët e fshatit Derbresh shprehen të kënaqur me angazhimin e kryetarit Taravari për investime edhe në mjediset rurale.

“Falënderojmë kryetarin për këtë investim shumë të qëlluar këtu në fshatin tonë. Këtë investim do ta shfrytëzojnë fëmijët e fshatit në këtë shkollë. Fshati Debresh deri më sot nuk ka pasur asnjë kënd të këtillë. Po ashtu falënderojmë kryetarin Taravari edhe për investimet tjera të cilat planifikon t’i realizojë në fshatin tonë”, shprehet, Senad Hasani – banor i fshatit Debresh.

Për rregullimin e këndeve të fëmijëve Komuna e Gostivarit ka ndarë nga buxheti i saj rreth 2,3 milion denarë, ndërsa punët pritet të përfundojnë brenda këtij muaji.

Shërbimi për informim

Konvikti i nxënësve në Gostivar, një storje suksesi

28.05.2018

Falë angazhimit personal të drejtorit Shpend Sulejmani, mbështetjes parezerv të Komunës së Gostivarit dhe kryetarit Arben Taravari, donacioneve nga personat fizikë dhe juridikë, Konvikti i nxënësve – Gostivar, prej një objekti i cili më shumë ngjasonte në objekt të braktisur, është shndërruar në një konvikt të cilit ia kanë zilinë institucionet e ngjashme në vend dhe më gjerë.

Në këtë konvikt janë krijuar të gjitha kushtet për је komfore dhe për realizimin e aktiviteteve jashtëshkollore të nxënësve të cilët janë të vendosur në të.

Vlen të theksohet se në këtë konvikt, vendosja e portës frontale mundëson siguri të plotë të nxënësve që frekuentojnë atë.

Shërbimi për informim

Mbledhje koordinative për shkolla të sigurta

18.05.2018

Në kuadër të projektit “Shkolla të sigurta”, të financuar nga OSBE-ja, e që implementohet në gjashtë komuna në Maqedoni, në Gostivar u mbajt mbledhje koordinative në të cilën u diskutua plani njëvjeçar i detyrave dhe aktiviteteve.

Në mbledhjen koordinative morën pjesë përfaqësues të OSBE-së në Maqedoni, shërbimet profesionale të shkollave të mesme komunale, mësimdhënës dhe përfaqësues të Sektorit për arsim pranë Komunës së Gostivarit.

Tema të cilat u diskutuan ishin lufta kundër dhunës, ekstremizmit dhe abuzimeve tjera nëpër shkolla, ndërsa u përcaktua edhe agjenda e aktiviteteve për periudhën njëvjeçare, respektivisht trajnimet me profesorët dhe nxënësit, punëtoritë dhe aktivitete tjera.

Shërbimi për informim