Investim mbi pesëdhjetë mijë (50,000) EUR. në Sh.F “Bashkimi”

Sot bashkë me ekipin vizituam SH.F “Bashkimi”, ku i pashë nga afër investimet të cilat janë kryer në këtë shkollë.

Bëhet fjalë për investim mbi pesëdhjetë mijë (50,000) EUR.
– Renovimi i sallës së sportit
– Renovimi i mësonjëtoreve të klasave të para
– Vendosja e shkallëve të reja
– Renovimi i tualeteve dhe zhveshtoreve

E faleminderoj Drejtorin dhe udhëheqësinë e shkollës “Bashkimi” për angazhimin në të mirë të shkollës!

Me respekt,
Arben Taravari – Kryetar i Komunës së Gostivar

Komuna e Gostivarit siguron pajisje të reja dhe moderne për çerdhet e qytetit

22.05.2020
Komuna e Gostivarit ka mobiluar me pajisje të reja çerdhet publike në qytet. Në përurimin e pajisjeve të reja i pranishëm ka qenë edhe kryetari i Komunës së Gostivarit Arben Taravari me bashkëpunëtorët e tij, i cili bëri me dije se vlera e këtij investimin arrinë në rreth 155 mijë euro.

“Kontrata për mobilimin e këtyre çerdheve është nënshkruar në dhjetor të vitit të kaluar dhe e kemi realizuar në afat kohor rekord, pra për tre muaj, konkretisht deri në muajin mars të këtij viti. Vlera e investimit kap shifrën e rreth 155.000 eurove, para të siguruara nga Banka Botërore, përmes projketit “Përkujdesja e fëmijëve të moshave parashkollore në çerdhe” dhe organizata “Sonce”, deklaroi kryetari i Komunës së Gostivarit, Arben Taravari, i cili bëri të ditur se në sajë të këtij projekti të suksesshëm, Komuna e Gostivarit ka fituar nga Banka Botërore edhe një grant prej 30.000 eurove, me të cilat para do të fillohet një projekt i ri gjatë muajit të ardhshëm.

Pajisjet e reja përbëhen prej mobilimit të ri për kuzhinat e çerdheve, banka, tavolina, shtretër dhe mjete didaktike. Paraprakisht, Komuna e Gostivarit realizoi edhe një sërë investimesh tjera në këto dy objekte, duke i rinovuar çatitë, dhe hapësirat e brendshme të tyre me mjete të siguruara nga buxheti komunal. Vlen të theksohet se Komuna e Gostivarit viteve të fundit përmes projekti për përmirësimin e shërbimeve komunale nga Banka Botërore ka përfituar mjete në vlerë prej 1,5 milion euro.

Shërbimi për informim

7 marsi/Taravari: I mbajmë në zemër te gjithë mësimdhënësit

Në këtë ditë të veçantë, edhe kryetari i Komunës së Gostivarit, Arben Taravari ndau një urim për mësuesit me rastin e 7 marsit.

“I mbajmë në zemër të gjithë Mësimdhënësit që me shpirtin e tyre ushqejnë trurin tonë!
Çdo ditë e vitit duhet të ishte 7 mars për të shprehur mirënjohjen ndaj Jush!
Gëzuar Festën!”

Komuna e Gostivarit shtron drekë solemne për mësimdhënësit e pensionuar shqiptarë

6 MARS, 2020

Me rastin e 7 marsit, ditës së mësuesit shqiptarë, Komuna e Gostivarit ka organizuar drekë solemne për të gjithë mësimdhënësit e pensionuar shqiptar të Gostivarit.

Ata u pritën nga vetë kryetari i komunës së Gostivarit, Arben Taravari. Dreka e shtruar në restorant “Ignatia”, ishte e dyta e këtij lloji, pasi komuna këtë organizim e bëri më 7 mars edhe vitin e kaluar.

Kryetari Taravari, mësimdhënësit e pensionuar i ka cilësuar më meritorët e kombit. Të pranishmit i ka përshëndetur edhe përgjegjësja e sektorit të arsimit pranë komunës së Gostivarit, Aslian Snopçe.

Para të pranishmëve, nxënësja Hana Durmishi, e cila ishte njëra nga gjashtë nxenëset fituese në garën e organizuar nga Komuna e Gostivarit për nder të mësuesit shqiptar, lexoi esenë e saj fituese.

Mësimdhënësi në pension, Ismet Beqiri ka përshëndetur të pranishmit në emrin e kolegëve të tij.

Komuna e Gostivarit ka ndarë dy mirënohje gjatë kësaj ceremonie, një për koreografin Haki Mulliqi nga Kosova, i angazhuar në Sh.K.A Jahi Hasani dhe një për këtë shoqëri, pasi të njejtit kishin pergatitur një koregrafi për këtë ditë tek Qendra për Kulturë në Gostivar.

Manifestimi nuk u mbajt pasi në vendin tonë ka ndalesë për tubime publike per shkak të virusit korona.

Në fund të takimit, për të pranishmit u ndanë fotografi nga takimi i 7 marsit të vitit të kaluar.

Në takimin e sivjetshëm merrnin pjesë 200 mësimdhënës shqiptar të pensionuar ndër vite.

Shërbimi për informim

Pasqyra e librave që mungojnë në gjysëmvjetorin e dytë në shkollat fillore dhe të mesme komunale në Gostivar

06.03.2020

Imërlije Saliu nga Sektori i arsimit pranë Komunës së Gostivarit, në konferencën e sotme për shtyp dha pasqyrë të detajuar për mungesën e teksteve shkollore në shkollat fillore dhe të mesme.

Përmbajtjen e pres conferences jua përcjellim në mënyrë integrale:

Edhe pse ka gati një muaj e gjysëm prej kur ka filluar gjysëmvjetori i dytë, në shkollat fillore komunale të Gostivarit, mungesa e teksteve nga klasat e para deri në të nëntat, në të tri gjuhët, është shumë e madhe. Nga të dhënat zyrtare nga gjithsej 10 shkollat fillore të komunën së Gostivarit, rezulton se mungojnë 9.506 tekste shkollore për të gjitha lëndët dhe të gjitha klasat. Njëlloj si atëherë kur reaguam në gjysëmvjetorin e parë, edhe në ktë gjysëmvjetor, mungesë më të madhe të librave kemi tek klasat e gjashta – gjithsej 3.838 tekste, klasat e shtata 1.026 dhe klasat e nënta 1.561 tekste shkollore. Sa u përket lëndëve mësimore 809 libra mungojnë të gjuhës shqipe, 289 tekste mungojnë nga gjuha Angleze, ndërkaq ka mungesë të madhe të lëndës së gjeografisë gjithsej 1007, histori 580 tekste. Po ashtu kemi mungesë të theksuar edhe të librave nga lëndët e arsimit teknik, arsimit figurativ, muzikës, informatikës, siç i kemi pasqyruar në tabelat e më poshtme për çdo shkollë.

Me të njëjtin problem ballafaqohen edhe shkollat e mesme. Të dhënat që kemi marrë janë mjaft shqetësuese. 8.610 libra mungojnë në shkollën e mesme komunale të mjekësisë, 2.453 libra në shkollën e mesme teknike, ndërsa në gjimnaz mungojnë shumë pak tekste shkollore, vetëm 64 libra. Shkolla e mesme ekonomike na ka ofruar vetëm emrat e librave që mungojnë pa mos e shoqëruar me numra konkret, por megjithatë shqetëson fakti se janë të radhitura mbi 15 lëndë mësimore. Sa u përket shkollave të mesme analiza është bërë për të gjitha vitet, prej vitit të parë deri në vitin e katërt dhe për të tri gjuhët mësimore.

Sektori i arsimit pranë Komunës së Gostivarit e sheh si mjaft shqetësues faktin që edhe në gjysëmvjetorin e dytë është vazhduar me të njëjtin avaz si në gjysëmvjetorin e parë dhe mungesa e librave është mjaftë e theksuar. Nga kjo situate ata që humbin më së shumti janë nxënësit për këtë arsye iniciativa jonë është që të informojmë opinionin publik si dhe kërkojmë nga ministria e arsimit që të marë masa konkrete ku sot kemi dërguar edhe zyrtarisht kërkesë deri te ky institucion. Ne shpresojmë në përgjigje pozitive nga ana e Ministrisë për këtë vit akademik shkollor si dhe kërkojmë që prej shtatorit, respektivisht prej fillimit të vitit të ri shkollor 2020/2021, shkollat tona të mos përballen me problem të kësaj natyre.

Shërbimi për informim

Komuna e Gostivarit me takime për rritje të sigurisë dhe vendosjen e rendit në shkollat e mesme

Komuna e Gostivarit, policia, punonjës social, drejtorë të shkollav të mesme, nxënës e prindër çdo të premte bëhen bashkë për të diskutuar problemet me të cilat ballafaqohen shkollat e mesme të Gostivarit dhe mënyrën për zgjidhjen e të njejtave. Këtë të premte nikoqir i këtij takimi ishte shkolla e mesme teknike. Aslian Snopçe, përgjegjëse e sektorit për veprimtari publike pranë Komunës së Gostivarit, tha se kjo iniciativë rrjedhë nga komuna. Ajo tha se këto takime do të organizohen çdo javë derisa të mbarojë viti shkollor.
Pjesmarrësit në këtë të ashtuquajtur Këshill profesional, kanë konstatuar se shpejtë kanë ardhur edhe rezultatetet e para.

Policia sqaroi se aktualisht është duke punuar me disa projekte mbi sigurinë nëpër shkolla, ndërsa çdo sugejrim i ri që do të dalë nga këto takime, ata janë të gatshëm ta shndërrojnë në projekt në dobi të shkollave.

Komuna e Gostivarit shpërblen nxënësit më të mirë të Gostivarit

Komuna e Gostivarit ka ndarë nga pesë mijë denarë për pesë nxënësit më të mirë të Gostivarit shpallja e të cilëve u bë me 23 dhjetor, në ditën e Komunës së Gostivarit. Fjolla Zendeli, Kostanca Bilibiloska, Nusejba Hanxhi, Behra Beqiri dhe Ilina Dimitrievska shpërblimin e kanë pranuar nga vetë kryetari i Komunës së Gostivarit, Arben Taravari, i cili të njejtat i priti në kabinetin e tij.

Ai me këtë rast nënvizoi se kjo është hera e parë që pushteti lokal i Gostivarit shpërblen nxënësit më të mirë, ndërsa nga ky vit, do të ketë edhe dhjetë bursa për po aq nxënës nga territori i Gostivarit.

Fjolla Zendeli, u zgjodh nxënësja më e mirë te shkolla e mesme e gjimnazit te paralelet shqiptare, Kostanca Bilibiloska, te po e njejta shkollë te paralelet me mësim në gjuhën maqedonase, Nusejba Hanxhi, te shkolla e mesme e mjekësisë te paralalelet me mësim në gjuhën turke, Behra Beqiri nga shkollat fillore me mësim te paralaelet në gjuhën shqipe, e cila vjen nga shkolla fillore “Faik Konica” e fshatit Debresh dhe Ilina Dimitrievska te paralelet me mësim në gjuhën maqedone te shkollat fillore, e cila vjen nga shkolla fillore “Goce Dellcev”. Ata kanë falenderua kryetarin Taravari dhe Komunën e Gostivarit për këtë vlerësim, duke shtuar se kjo do të jetë një stimul shtesë gjatë jetës së tyre për të korrur sukses të reja.

Kjo ishte hera e parë në qytetin e Gostivarit, që bëhet përzgjedhja e nxënësve më të mirë të shkollave fillore dhe të mesme publike. Për përzgjedhjen e nxënësve më të mirë, komuna e Gostvarit formoi edhe një komision pesë antarësh në përbërje të dy mësimdhënësve shqiptarë, një mësimdhënësi maqedonas dhe një të nacionalitetit turk dhe udhëheqëses së Sketorit për Arsim pranë Komunës së Gostivarit, Aslian Snopçe.

Aksioni “Me zemër dhuro, një nxënës gëzo”, i gëzoi mbi 500 filloristë të komunës së Gostivarit

12.09.2019

Aksioni “Me zemër dhuro, një nxënës gëzo” rezultoi me donacione të shumta për nxënësit nga familjet me status të rrezikuar social.

Ky aksion u iniciua dhe u organizua nga Sektori për veprimtari publike pranë Komunës së Gostivarit, në bashkëpunim me shkollat fillore komunale, me dy supermarkete dhe me disa librari të qytetit.

Gjatë kësaj jave u bë shpërndarja e pajisjeve të grumbulluara shkollore, gjegjësisht të mbi 500 çantave dhe mjeteve të tjera shkollore.

Siç njofton përgjegjësja e Sektorit për veprimtari publike, znj. Aslian Snopçe, krahas prindërve të shumtë të cilët donuan pajisje shkollore, Këmbimorja Alpina 100 çanta, supermarketi ETC dhuroi 60 çanta, Beni Beton 50 çanta të mbushura me mjete shkollore, dhe Universiteti Vizion 50 çanta.

“Gostivarasit edhe njëherë në vepër e dëshmuan humanitetin dhe solidaritetin e tyre. Suksesi i këtij aksioni madje i tejkaloi pritshmëritë tona. Nuk është kjo hera e parë që në fillim të vitit shkollor të interesuarit të dhurojnë për nxënësit që vijnë nga familje me standard më të ulët ekonomik, por kjo mënyrë e organizimit ofron mundësi që sa më shumë individë dhe subjekte të bëhen pjesë e aksionit dhe donacionet të mbërrijnë tek të gjithë ata të cilët kanë nevojë. Prandaj, planifikojmë që edhe në fillimvitet e ardhshme shkollore të organizojmë aksione të këtilla”, thotë znj. Snopçe.

Që donacionet të mbërrijnë pikërisht te nxënësit që kanë më së shumti nevojë, kujdesen vetë shkollat fillore, si ato të qytetit ashtu edhe ato të vendbanimeve rurale.

Komuna e Gostivarit falënderon të gjithë prindërit dhe subjektet donatore, si dhe supermarkete dhe libraritë të cilët u bënë pjesë e këtij aksioni.

Shërbimi për informim

Dita e parë e vitit të ri shkollor në shkollat fillore komunale të Gostivarit filluan me solemnitete modeste

03.09.2019

Rreth 650 fëmijë, u ulën sot për të parën herë në bankat e shkollave fillore komunale të Gostivarit. Dita e parë e vitit të ri shkollor, si në shkollat e qytetit ashtu edhe në ato të mjediseve rurale, u shënuan me solemnitete modeste për çka krahas shkollave u përkujdes edhe Sektori i arsimit pranë Komunës së Gostivarit.

Përfaqësues të sektorit të arsimit, vizituan sot gati se të gjitha shkollat publike, me ç’rast të gjithë nxënësve të klasave të para u dhuruan nga një pako me vegla mësimore dhe me fletë-urimet që përcillnin mesazhe të ndryshme.

Në solemnitetin me rastin e pranimit të nxënësve të klasave të para në SHFK “Faik Konica” mori pjesë edhe kryetari i komunës Arben Taravari, i cili ua uroi fëmijëve nisjen e rrugëtimit të tyre për edukim dhe arsimim, si dhe shprehu përkrahjen e tij për kërkesat mësimdhënësve për kushte më të mira pune.

Fjalë rasti mbajti edh drejtoresha e shkollës znj. Sanije Durmishi.

Për disponimin e mirë të nxënësve, u kujdesën personat e angazhuar nga Komuna e Gostivarit, të veshur si personazhet e filmave të animuar.

Shërbimi për informim

Të rinjtë e Gostivarit do ta zbukurojnë parkun dhe shëtitoren te lumi Vardar

09.05.2019

Në kuadër të projektit “Integrimi i të rinjve në arsim” nxënës të dy shkollave të mesme dhe të një shkolle fillore të qytetit të Gostivarit, do të realizojnë një sërë aktivitetesh për rregullim plotësues dhe mirëmbajtje të parkut të qytetit dhe shëtitores te lumi Vardar.

Aktivitetet filluan sot, me ç’rast organizatorët u ndanë fanella dhe pajisje pune nxënësve të shkollës së mesme ekonomike dhe asaj teknike si dhe nxënësve të SHF “Bashkimi”. Në kuadër të projektit, nxënësit do të lyejnë ulëset te shëtitorja, do të bëhet shënimi i shtegut të biçikletave dhe shtegut të këmbësorëve, do të vendosen korniza për parkim të biçikletave përgjatë shëtitores, si dhe aktivitete tjera të ngjashme në drejtim të rregullimit dhe mirëmbajtjes së kësaj zone e cila mjaft frekuentohet nga qytetarët për të kaluar kohën e lirë, e sidomos nga gjeneratat më të reja.

Fillimin e aktiviteteve e përcolli dhe u kyç edhe vetë kryetari i komunës së Gostivarit, Arben Taravari i cili duke përshëndetur aktivitetin në fjalë shfrytëzoi nga rasti që të pranishmëve t’ua urojë 9 Majin – Ditën e Evropës.

“Fillimi i aktiviteteve në kuadër të këtij projekti koincidon me Ditën e Evropës, ditë kjo e një rëndësie të veçantë, e sidomos për ne të cilët synojmë që të bëhemi pjesë e familjes së madhe të BE-së. Uroj që sa më shpejtë ta festojmë këtë ditë si anëtarë të barabartë të familjes evropiane”, u shpreh Taravari.

Projekti “Integrimi i të rinjve në arsim” financohet nga USAID, ndërsa mbështetet edhe nga Komuna e Gostivarit dhe NP “Parkingje dhe gjelbërime”.

Shërbimi për informim