Aksioni “Me zemër dhuro, një nxënës gëzo”, i gëzoi mbi 500 filloristë të komunës së Gostivarit

12.09.2019

Aksioni “Me zemër dhuro, një nxënës gëzo” rezultoi me donacione të shumta për nxënësit nga familjet me status të rrezikuar social.

Ky aksion u iniciua dhe u organizua nga Sektori për veprimtari publike pranë Komunës së Gostivarit, në bashkëpunim me shkollat fillore komunale, me dy supermarkete dhe me disa librari të qytetit.

Gjatë kësaj jave u bë shpërndarja e pajisjeve të grumbulluara shkollore, gjegjësisht të mbi 500 çantave dhe mjeteve të tjera shkollore.

Siç njofton përgjegjësja e Sektorit për veprimtari publike, znj. Aslian Snopçe, krahas prindërve të shumtë të cilët donuan pajisje shkollore, Këmbimorja Alpina 100 çanta, supermarketi ETC dhuroi 60 çanta, Beni Beton 50 çanta të mbushura me mjete shkollore, dhe Universiteti Vizion 50 çanta.

“Gostivarasit edhe njëherë në vepër e dëshmuan humanitetin dhe solidaritetin e tyre. Suksesi i këtij aksioni madje i tejkaloi pritshmëritë tona. Nuk është kjo hera e parë që në fillim të vitit shkollor të interesuarit të dhurojnë për nxënësit që vijnë nga familje me standard më të ulët ekonomik, por kjo mënyrë e organizimit ofron mundësi që sa më shumë individë dhe subjekte të bëhen pjesë e aksionit dhe donacionet të mbërrijnë tek të gjithë ata të cilët kanë nevojë. Prandaj, planifikojmë që edhe në fillimvitet e ardhshme shkollore të organizojmë aksione të këtilla”, thotë znj. Snopçe.

Që donacionet të mbërrijnë pikërisht te nxënësit që kanë më së shumti nevojë, kujdesen vetë shkollat fillore, si ato të qytetit ashtu edhe ato të vendbanimeve rurale.

Komuna e Gostivarit falënderon të gjithë prindërit dhe subjektet donatore, si dhe supermarkete dhe libraritë të cilët u bënë pjesë e këtij aksioni.

Shërbimi për informim

Dita e parë e vitit të ri shkollor në shkollat fillore komunale të Gostivarit filluan me solemnitete modeste

03.09.2019

Rreth 650 fëmijë, u ulën sot për të parën herë në bankat e shkollave fillore komunale të Gostivarit. Dita e parë e vitit të ri shkollor, si në shkollat e qytetit ashtu edhe në ato të mjediseve rurale, u shënuan me solemnitete modeste për çka krahas shkollave u përkujdes edhe Sektori i arsimit pranë Komunës së Gostivarit.

Përfaqësues të sektorit të arsimit, vizituan sot gati se të gjitha shkollat publike, me ç’rast të gjithë nxënësve të klasave të para u dhuruan nga një pako me vegla mësimore dhe me fletë-urimet që përcillnin mesazhe të ndryshme.

Në solemnitetin me rastin e pranimit të nxënësve të klasave të para në SHFK “Faik Konica” mori pjesë edhe kryetari i komunës Arben Taravari, i cili ua uroi fëmijëve nisjen e rrugëtimit të tyre për edukim dhe arsimim, si dhe shprehu përkrahjen e tij për kërkesat mësimdhënësve për kushte më të mira pune.

Fjalë rasti mbajti edh drejtoresha e shkollës znj. Sanije Durmishi.

Për disponimin e mirë të nxënësve, u kujdesën personat e angazhuar nga Komuna e Gostivarit, të veshur si personazhet e filmave të animuar.

Shërbimi për informim

Të rinjtë e Gostivarit do ta zbukurojnë parkun dhe shëtitoren te lumi Vardar

09.05.2019

Në kuadër të projektit “Integrimi i të rinjve në arsim” nxënës të dy shkollave të mesme dhe të një shkolle fillore të qytetit të Gostivarit, do të realizojnë një sërë aktivitetesh për rregullim plotësues dhe mirëmbajtje të parkut të qytetit dhe shëtitores te lumi Vardar.

Aktivitetet filluan sot, me ç’rast organizatorët u ndanë fanella dhe pajisje pune nxënësve të shkollës së mesme ekonomike dhe asaj teknike si dhe nxënësve të SHF “Bashkimi”. Në kuadër të projektit, nxënësit do të lyejnë ulëset te shëtitorja, do të bëhet shënimi i shtegut të biçikletave dhe shtegut të këmbësorëve, do të vendosen korniza për parkim të biçikletave përgjatë shëtitores, si dhe aktivitete tjera të ngjashme në drejtim të rregullimit dhe mirëmbajtjes së kësaj zone e cila mjaft frekuentohet nga qytetarët për të kaluar kohën e lirë, e sidomos nga gjeneratat më të reja.

Fillimin e aktiviteteve e përcolli dhe u kyç edhe vetë kryetari i komunës së Gostivarit, Arben Taravari i cili duke përshëndetur aktivitetin në fjalë shfrytëzoi nga rasti që të pranishmëve t’ua urojë 9 Majin – Ditën e Evropës.

“Fillimi i aktiviteteve në kuadër të këtij projekti koincidon me Ditën e Evropës, ditë kjo e një rëndësie të veçantë, e sidomos për ne të cilët synojmë që të bëhemi pjesë e familjes së madhe të BE-së. Uroj që sa më shpejtë ta festojmë këtë ditë si anëtarë të barabartë të familjes evropiane”, u shpreh Taravari.

Projekti “Integrimi i të rinjve në arsim” financohet nga USAID, ndërsa mbështetet edhe nga Komuna e Gostivarit dhe NP “Parkingje dhe gjelbërime”.

Shërbimi për informim

 

“Suksesi” i vetëm i ministrit të arsimit, marrja e ingerencave kryetarit të Gostivarit

05.04.2019

Përgjegjësja e arsimit pranë Komunës së Gostivarit, znj. Aslian Snopçe, në një konferencë për shtyp të mbajtur sot, theksoi se marrja për së dyti e ingerencave në arsim kryetarit të komunës, Arebn Taravari, tregon se ministri i arsimit gjatë punës së tij këtë e ka të vetmin “rezultat” dhe se nuk do të ishte habi që këtë ta bëjë edhe për të tretën herë pas shtatë muajsh, por këtë rast nuk do ta ketë sepse deri atëherë shumëçka do të ndryshojë në Gostivar.

Fjalën e saj në press-koferencë, jua japim në mënyrë integrale.     

“Të nderuar përfaqësues të mediave,

Fillimisht ju falënderoj për prezencën tuaj në këtë pres konferencë.

Nëpërmjet kësaj konference për shtyp, dëshirojmë t’ju informojmë se pas marrjes së kompetencave ne sferën e emërimit dhe shkarkimit të drejtorëve nga ana e ministrit të arsimit për të dytën herë, këto ditë pasoi edhe vazhdimësia e këtij vendimi politik. Imagjinoni, në mes të fushatës zgjedhore, ministri ia lejon vetes luksin që të shkarkojë drejtorët e emëruar nga ana e kryetari të komunës dhe  sjell vendim për kthimin e drejtorëve të vjetër partiakë.

Pra, ky është edhe një skandal në vazhdën e skandaleve që e kanë burimin pikërisht te Ministria e arsimit dhe shkencës. Për këtë, gjykimin ia lëmë vetë qytetarëve, ndërsa dokumentacioni respektiv do të dërgohet deri te Komisioni anti-korrupsion për konstatimin e kësaj parregullsie. 

Në vend që ministri të merret me problemet e shumta që e kanë mbuluar sferën e arsimit; në vend që të merret me sigurimin e mësimit në gjuhën shqipe gjë që është e garantuar me ligj; në vend që te merret me përmirësimin e teksteve shkollore ku ende shqiptarët figurojnë si popull i zbritur nga malet, ku në tekstet shkollore të muzikës të gjitha këngët janë në gjuhën maqedonase; në vend që të merret me eliminimin e tenderëve në katër sy që bëhen në ministrinë e tij; në vend që të merret me rritjen e kualitetit të Universiteteve shqiptare; në vend që të merret me zbulimin e skandaleve me diplomat nëpër Universitete; në vend që të merret me rritjen e fondeve investuese në sferat hulumtuese ku Maqedonia e zë vendin e fundit ëe rajon … ai vazhdon të merret vetëm me Gostivarin.

Do të ishte mirë që ai të merret me Gostivarin, por, për shembull, për rregullimin e çatise së shkollës Goce Dellçev ku fëmijët duhet të mbajnë ombrella në klasë. Ky ministër prej kur e ka marrë postin, preokupim kryesor e ka vetëm Gostivarin, por, ama, në aspekt tjetër. Është bërë famoz me marrjen e kompetencave në komunën e vetme urbane në këtë shtet, që nuk është nën udhëheqjen e pushtetit aktual.  

Ministri i arsimit në raportin e punës së tij do të ketë informatë vetëm për dy vendime kapitale. Informata e pare: marrja e kompetencave të kryetarit të zgjedhur përmes votës së lirë të qytetarëve, dhe e dyta: marrja për të dytën here e kompetencave të kryetarit të komunës në sferën e arsimit.

Ai është shumë “kreativ” me këto dy vendime të tij. Ngado që shkon lavdërohet pikërisht me këto vendime të marrjes së kompetencave.

Tani do të pasojë edhe një periudhë letargjie nga ana e Ministrisë qe e drejton ai. Por. jemi të bindur se pas shtatë muajve përsëri do të ketë një investim kapital nga ana e ministrisë së tij. Ai investim kapital do të jetë marrja për herë të tretë e kompetencave kryetarit të Gostivarit.

Fundja, tjetër gjë nuk ai din të bëjë. Megjithatë, nuk do ta ketë atë mundësi, pasi që së shpejti situata do të ndryshojë, dhe në Gostivar do të vijnë kohë të reja.”

Shërbimi për informim

Kryetari Taravari nuk ka bërë shkelje, vendimi i ministrit Ademi thjesht politik

20.02.2019

Në lidhje me marrjen e padrejtë të ingerencave në sferën e arsimit kryetarit të komunës së Gostivarit Arben Taravari, konferencë për shtyp mbajti udhëheqësja e Sektorit për veprimtari publike pranë Komunës së Gostivarit, Aslian Snopçe. Në këtë konferencë, znj. Snopçe përmes dokumentacionit përkatës argumentoi para mediave se shkelje të proceduarve për shkarkim dhe emërim të drejtorëve nga ana e kryetarit Taravari nuk ka pasur, dhe vendimin e ministrit të arsimit e cilësoi si vendim thjesht politik.

“Vendimi për marrjen e kompetencave për të dytën herë, nuk është i bazuar në ligj, por është vetëm një vendim politik. Inspektorati shtetëror i arsimit, pas inspektimit nëpër shkollat fillore, ka konstatuar se konkurset për emërimet e drejtorëve gjatë kohës kur kompetencat i ishin marrë komunës së Gostivarit, nuk ishin shpallur në bazë të ligjit, pra në tre gazeta ditore, por vetëm në dy gazeta”, theksoi në fillim të pres konferencës znj. Snopçe.

Ajo njoftoi se për këtë shkak kryetari Arben Taravari ka sjell aktvendim me të cilin shpall të pavlefshëm aktvendimet për zgjedhjen e drejtorëve, në të njëjtën mënyrë siç ka vepruar edhe ministri i cili tani sjell vendim për marrjen e kompetencave. Si rast konkret ajo ceku rastin në SHF “Përparimi” Çegran.

“Po ashtu edhe nga ana e Inspektoratit shtetëror të administratës është konstatuar se gjatë shpalljes së pavlefshme të aktvendimeve, kryetari i komunës së Gostivarit gjithnjë ka vepruar në bazë të ligjit dhe nuk ka konstatuar shkelje ligjore”, theksoi në vazhdimi përgjegjësja për arsim Aslian Snopçe

Ajo vuri në dukje se Komuna e Gostivarit, duke ditur qëllimet e ministrit të arsimit, me kohë ka informuar kryeministrin Zaev dhe ambasadat e shtatë vendeve më me ndikim në vendin tonë.

“Këto janë argumente të mjaftueshëm, për të cilat ju sigurojmë edhe dokumentacionin, se vendimi është thjesht politik”, theskoi në fund të konferencës znj.Snopçe.

Ministri i Arsimit dhe Shkencës, Arbër Ademi, ia ka marrë kompetencat kryetarit Taravari në pjesën për emërim dhe shkarkim të drejtorëve për periudhë prej nëntë muajsh.

Shërbimi për informim

Kryetari Taravari promovoi rinovimin e çerdheve publike në Gostivar

 

28.12.2018

 

Fëmijët e çerdheve publike të Gostivarit, me një program të shkurtër festuan ndërrimin e motmoteve. Në festën e tyre i shoqëroi edhe kryetari i komunës sl Gostivarit, Arben Taravari dhe udhëheqësja e Sektorit për veprimtari publike, Aslian Snopçe.

Kremtja e sotme e fëmijëve në çerdhen qendrore të IPKF “Gëzimi fëmijëror” përkonte edhe me promovimin e investimeve të fundit në këtë dhe në çerdhet tjera publike të qytetit të Gostivarit dhe tani të gjitha ato i plotësojnë kushtet e nevojshme për qëndrim ditor të fëmijëve.

Kryetari Arben Taravari ua uroi Vitin e Ri fëmijëve duke u dëshiruar shëndet dhe lumturi, si dhe u ndau dhurata simbolike.
Shërbimi për informim

U mbajt edicioni i parë i Festivalit Junior Fest

24.12.2018

Me mbështetje të Komunës së Gostivarit, në Qendrën për Kulturë në Gostivar u mbajt edicioni i parë i festivalit Junior Fest.

Festivali u organizua nga Shoqatës Kulturore Artistike “Sonata” me në krye drejtoreshë artistike të festivalit, këngëtaren Betime Zylali, e cila thotë se pas realizimit të suksesshëm të këtij edicioni, planifikon që këtë festival ta shndërrojë në festival tradicional.

Në Festivalin “Junior Fest 2018” morën pjesë 14 garues, ndërsa juria profesionale në përbërje: prof. Arifikmet Xhemaili dhe regjisorët Sulejman Rushiti dhe Olsen Poshka, përzgjodhën më të mirët.

Çmimi i parë nga juria dhe nga publiku i takoi Vesa Pollozhanit me këngën “Të falim dashurinë”, Çmimi i dytë u takoi Lina Demirit dhe Dea Sadikut, ndërsa Çmimi i tretë Besar Asanit, Florensa Shates dhe Tesa Selimit.

Shërbimi për informim 

“Mërgimtarët nga Zvicra” në bashkëpunim me Komunën e Gostivarit ndanë veshmbathje për fëmijët skamnorë

19.12.2018

Falë kontributit të fondacionit “Mërgimtarët nga Zvicra për Gostivarin”, sfidat e përballjes me acarin dimëror,  këtë vit nuk do të jenë shumë të vështira edhe për fëmijët të cilët nuk kanë arritur që me kohë të sigurojnë veshmbathje adekuate për këtë stinë.

Ky Fondacion  siguroi xhupa dimri për fëmijët skamnorë dhe për  fëmijët me aftësi të posaçme.  Bëhet fjalë për një aksion të përbashkët që ky Fondacion e realizon me Sektorin e Veprimtarive Publike pranë Komunës së Gostivarit, me të cilin përfshihen të gjitha shkollat fillore të qytetit dhe fshatrave përreth.

 Fillimisht shkollat përgatitën listat me nxënësit nevojtarë dhe në bazë të atyre listave u bë shpërndarja nëpër shkolla me ç’rast u mbajt llogarinë edhe për privatësinë.

Nga Sektori për Veprimtari Publike pranë Komunës së Gostivarit falënderojnë Fondacionin  “Mërgimtarët nga Zvicra për Gostivarin”, të cilët në kontinuitet kanë realizuar aksione të tilla të ngjashme dedikuar nxënësve të komunës së Gostivarit  si dhe paralajmërojnë vazhdimin e aksioneve të këtilla edhe në të ardhmen.

Shërbimi për informim

U rinovuan dy objektet më të mëdha të IPKF “Gëzimi Fëmijëror” në Gostivar

17.12.2018

Me mjete vetanake dhe me ndihmën e Komunës së Gostivarit, kanë përfunduar sot punimet për rikonstruktim të dy çerdheve më të mëdha që funksionojnë në kuadër të Institucionit Publik Kopshti i Fëmijëve “Gëzimi Fëmijëror” – Gostivar.

Në çerdhen kryesore “Pranvera” është bërë thuajse rikonstruktim i plotë i objektit me ç’rast janë riparuar nyjet sanitare, janë rregulluar lojëtoret – lyerja e mureve, vendosja e llaminatit dhe parketit të ri, është rinovuar salla – nxjerrja e llamperive dhe pllakave të keramikës, lyerja e mureve dhe vendosja e linoleumit. Është bërë komplet riparimi i ujësjellësit dhe ndriçimit të hapësirave të brendshme.  Po ashtu janë vendosur dyer të reja në nyjet sanitare dhe lojëtoret dhe janë vendosur perde të reja. Krahas kësaj së shpejti pritet që të vendosen edhe garderoberë të rinj për fëmijët dhe tabela për vizatim nëpër lojëtore.

Intervenime janë bërë edhe në çerdhen “Lulishtja” ku janë lyer hapësirat e brendshme të objektit dhe një pjese e fasadës, ndërsa është rregulluar edhe salla dhe është riparuar parketi ekzistues.

Për shkak të realizimit të punimeve, javëve të fundit çerdhet e lartpërmendura kanë punuar me kapacitet jo të plotë. Ndërsa prej  nesër të njëjtat do të vijojnë me punë në kushte normale. Komuna e Gostivarit dhe IPKF “Gëzimi Fëmijëror” falënderojnë prindërit për mirëkuptimin.

Shërbimi për informim

Festë e vërtetë për adhuruesit e librit, u hap Panairi “Gostivari 2018”

26.11.2018

Me një ceremoni rasti, sot në mënyrë solemne u hap Panairi i librit “Gostivari 2108”.

Bashkë-organizatorë të panairit, i cili njëherit është edhe i pari në këtë format në Gostivar, janë Komuna e Gostivarit dhe Shoqata e Botuesve Shqiptarë në Maqedoni.

Në prani të qindra vizitorëve në palestrën sportive “Rinia”, fjalim rasti mbajti kryetari i komunës së Gostivarit, Arben Taravari i cili mes tjerash theksoi, se mënyra më e mire për të zhvilluar imagjinatën është leximi, andaj apeloi që secili vizitor të blejë të paktën një libër.

“Dua që si mjek, neurolog, të dërgoj një mesazh. Mënyra më e mire për të zhvilluar imagjinatën, është leximi i librave. Shpresoj që masovikisht qytetarët e Gostivarit dhe rajonit më të gjerë do ta vizitojnë këtë panair dhe se do të blejnë të paktën nga një libër. Le t’i shmangim sa më shumë celularët dhe tabletet dhe sa më shumë kohë t’i kushtojmë leximit, sidomos gjeneratat e reja”, nënvizoi kryetari Taravari.

Panairi i librit “Gostivari 2018” do të jetë i hapur tri ditë, respektivisht deri të mërkurën. Do të prezantohen 14 shtëpi botuese nga Maqedonia dhe Shqipëria, me libra të autorëve shqiptarë dhe të huaj, vepra letrare bashkëkohore dhe klasike, letërsi profesionale, shkencore dhe beletristike, lektyra shkollore, enciklopedi dhe vepra nga sfera e kulturës dhe artit, të destinuar për të gjitha grupmoshat.

Shërbimi për informim

(më tepër…)