Në qytetin e Gostivarit dhe në disa fshatra, u shënua Dita botërore e pastrimit

21.09.2019

Administrata komunale, disa fshatra ku janë aktive bashkësitë lokale, organizatat ekologjike dhe qytetarë që kujdes për mjedis të shëndoshë jetësor, u përfshinë në aksionin e organizuar nga Komuna e Gostivarit për shënimin e Ditës botërore të pastrimit.

Pastrimit të sipërfaqeve publike iu bashkëngjit edhe kryetari i komunës së Gostivarit, Arben Taravari i cili së bashku me administratorët, aktivistët dhe qytetarët tjerë mblodhën mbeturinat nëpër rrugë dhe sipërfaqe tjera publike të qytetit.

“Qëllimi i këtij aksioni është ngritja e vetëdijes së qytetarëve për të mbajtur një ambient të pastër dhe të shëndoshë. Ndërmarrja publike i kryen rregullisht obligimet e veta, por për të pasur një qytet më të pastër, duhet të gjithë qytetarët të kujdesen të mos hedhin mbeturina dhe në mënyra të ndryshme, siç është edhe ky aksion i sotëm të kontribuojnë për një mjedis më të pastër dhe më të bukur. Siç e shihni janë përfshirë edhe disa shoqata që në fokus kanë mbrojtjen e mjedisit jetësor, si dhe disa bashkësi lokale, por fatkeqësisht drejtorët e shkollave nuk u bashkëngjitën dhe nuk mundësuan që ky aksion të jetë më masovike dhe të mbjellin dashurinë për pastërti te gjeneratat të cilat më së shumti kanë nevojë për këtë”, deklaroi kryetari Taravari.

Kryetari i shoqatës GV Eko, Ahmet Sallmani tha se pastërtia publike jo vetëm që ndikon pozitivisht në shëndetin tonë, por edhe i jep një pamje më të bukur qytetit. Ndërsa kryetarja e organizatës joqeveritare IGI, Sunçica Gjurçinoska tha se në këtë ditë secili prind duhej sot të marrë fëmijët e vet në këtë aksion sepse shprehitë për mjedis të pastër dhe të shëndetshëm krijohen që nga fëmijëria e hershme.

Kryetari Taravari vizitoi edhe Çajlën, ku u mirëprit nga kryetari i bashkësisë lokale, Sinan Elezi i cili e njoftoi atë për mbarëvajtjen e aksionit. Taravari përgëzoi Elezin për organizimin e shkëlqyer dhe rezultatet që shënon kjo bashkësi lokale në përgjithësi.

Shërbimi për informim

 

Instalohet linjë ujësjellësi në Zonën VI në Gostivar

14.08.2019

Këtyre ditëve në vijim janë punimet për instalimin e një linje ujësjellësi në Zonën VI, ku disa amvisëri nuk kanë qenë të kyçura në rrjetin e ujësjellësit të qytetit.

“Kemi të bëjmë me një linjë të re ujësjellësi për në gjatësi prej 210 metrash, ku deri më tash 4 amvisëri nuk janë të përfshira në sistemin e furnizimit me ujë të pijshëm nga ujësjellësi i qytetit. Në këtë pjesë, sipas planit urbanistik do të ndërtohen edhe objekte tjera banimi kështu që ata prej në fillim ështjen e furnizimit me ujë do ta kenë të zgjidhur”, thekson drejtori teknik i NP “Komunalec” – Faton Abdullai.

Ndryshe, bëhet fjalë për një projekt të financuar nga Komuna e Gostivarit e që e realizon NP “Komunalec”, me një kosto prej rreth 330.000 denarë.

Komuna e Gostivarit angazhohet që të sigurojë kushte elementare infrastrukturore për të gjithë qytetarët e saj, pavarësisht nëse ata jetojnë në pjesën qendrore të qytetit, periferi apo vendbanime rurale.

Shërbimi për informim              

Do të asfaltohet një krah i rrugës së Dibrës, në Lagjen e Re

12.08.2019

Me mjete të siguruara nga buxheti I Komunës së Gostivarit, në vijim janë punët përgatitore për asfaltimin e një krahu të rrugës së Dibrës përballë Kolegjit privat “Jahja Kemal”.

Rruga ka një gjatësi prej 183 metra, ndërsa gjerësi mesatare prej 8 metrash.

“Edhe pse kjo pjesë e qytetit është e banuar prej disa dekadash, deri më tani nuk ka qenë e asfaltuar. Ky projekt është pjesë e Programit zhvillimor të Komunës së Gostivarit dhe financohet me mjete të buxhetit komunal. Projekti peshon 1.627.012 denarë, në bazë të lejes për ndërtim PA1 nr.18-112, ndërsa punimet i realizon ndërmarrja Magnum Trans-R, sipas kontratës 24-2217/17”, thekson Besim Dogani nga Zyra e ZHEL-it pranë Komunës së Gostivarit.

Vlen të theksohet se disa ditë para fillimit të punimeve për asfaltimin e kësaj rruge, përfundoi rikonstruktimi i plotë i rrugës Sllobodan Peposki, në pjesën qendrore të qytetit.

Shërbimi për informim

Punohet intensivisht në zgjerimin e rrjetit të kanalizimit në disa fshatra të komunës së Gostivarit

17.08.2019

Komuna e Gostivarit nëpërmjet Ndërmarrjes publike për veprimtari komunale “Komunalec” – Gostivar, është duke zgjeruar rrjetin e kanalizimit në disa fshatra, me ç’rast qasje në kanalizim do të kenë edhe rreth 10 për qind e popullsisë së përgjithshme të komunës së Gostivarit.

Në fshatin Çajlë, është duke u ndërtuar rrjet kanalizimi me gjatësi të përgjithshme 3022 ku pas përfundimit të punimeve, të gjitha amvisëritë e këtij fshati do të kenë qasje në kanalizim.

Para përfundimit janë punimet për ndërtim të kanalizimit në fshatin Banjicë e Epërme, me gjatësi prej 3199 metra, me çka ky fshat i cili deri më tani nuk ka pasur fare linjë kanalizimi, i tëri do të përfshihet me rrjet kanalizimi.

Nga ana tjetër, vazhdojnë punimet për ndërtimin pjesës së fundit të kanalizimit në fshatin Turçan i Madh, ndërsa këtyre ditëve ka filluar edhe ndërtimi i kanalizimit në një pjesë të lagjes Banjeshnicë të Gostivarit, në gjatësi prej 180 metra.

Pas përfundimit të ndërtimit të rrjetit të kanalizimit në fshatin Zdunjë, në vijim është sjellja e rrugës në gjendjen e mëparshme, respektivisht bëhet asfaltimi i pjesëve të dëmtuara të rrugës gjatë realizimit të punimeve.

“Kjo nënkupton se rreth 10% e popullsisë të komunës së Gostivarit, të cilët deri më tani nuk kanë qenë të kyçura në rrjetin e kanalizimit, tashmë ose janë lidhur ose do të lidhen së shpejti. Planifikojnë që në të ardhmen e afërt të vazhdojë zgjerimi i rrjetit të kanalizimit edhe në disa fshatra fushore të komunës ku në pjesë të caktuara mungon kanalizimi, siç është rasti me fshatin Raven, si dhe në disa lagje të qytetit ku kanalizimi mungon vetëm nëpër disa rrugica”, thotë Isak Lazami – drejtori i NP “Komunalec”.

Kjo ndërmarrje, aktualisht punon edhe në instalimin e një linje të re ujësjellësit në fshatin Çajlë, me gjatësi prej 450 metrash.

Shërbimi për informim

 

NJOFTIM: Të premten do të bëhet dezinsektimi i parë nga toka në territorin e komunës së Gostivarit

09.07.2018

Njoftohen qytetarët se më datë 12.07.2018 (e premte), do të bëhet dezinsektimi i parë nga toka në territorin e Komunës së Gostivarit për zhdukjen e mushkojave të rritura dhe dëmtuesve të tjerë.

Dezinsektimi do të kryhet në mbrëmje pas orës 24:00 deri në orët e hershme të mëngjesit, vetëm në kushte të mira atmosferike.

Lokacionet në të cilat do të bëhet dezinsektimi nga toka janë me sa vijon:
Rr. “Zhivko Brajkoski” – Parku i i qytetit nga ana e majtë e lumit Vardar, rr. “M.Ç Filiposki” – Parku i qytetit nga ana e djathtë e lumit Vardar, Spitali i qytetit, rr. “JNA” deri te udhëkryqi i Zdunjës, shtrati i lumit Vardar në atarin e fshatit Raven, kanali prej udhëkryqit të Zdunjës – Zona e VI – Maleardi – rr. Boris Kidriç – rr.Beliçica deri në lagjen Fazaneria- vendbanimi Banjicë – bulevari i Vëllezërit Gjinoski, përmes Sheshit të qytetit deri në dalje të qytetit kah fshati Çajlë e deri tek lumi Jahorkë në fshatin Forinë .

Në rast të kohës me shi ose me erë të fortë dezinsektimi do të anulohet për ditën e ardhshme ose për ndonjë ditë tjetër me kushte më të mira atmosferike.
Për dezinsektim do të përdorët Aurodil i tretur në bazë të prospekteve të prodhuesit për përdorim, edhe atë 50 ml / 5 l.

Luten kultivuesit e bletëve që të marrin masat e duhura mbrojtëse, që do të thotë të strehojnë bletët në kutitë e tyre, të sigurojnë sasi të nevojshme të ujit për mbajtjen e bletëve të mbyllura minimum 5-6 orë pas trajtimit të territorit.

Dezinsektimin do ta kryejë SHPTSHP “PLANT MEDIKA”.

Shërbimi për informim

NJOFTIM

17.05.2019

Të nderuar qytetarë,

Ju njoftojmë se nesër (e shtunë) në ora 8:00, do të fillojnë punët ndërtimore për rikonstruktim të rrugës “Sllobodan Peposki” – Gostivar, që lidh rrugën për te Spitali me rrugën e Dibrës.

Rikonstruktimi përfshin gërvishtje dhe mënjanim të asfaltit ekzistues dhe shtruarjen e asfaltit të ri.

Përderisa do të zgjasin punimet, qarkullimi i automjeteve dhe këmbësorëve do të zhvillohet në kushte të vështirësuara, ndërsa në periudha të caktuara kohore do të jetë në ndërprerje.

Komuna e Gostivarit ju falënderon për mirëkuptimin.

Shërbimi për informim

Komuna e Gostivarit u pajis me automjet për grumbullimin e qenve endacakë

13.05.2019

Si komunë e cila avancon në menaxhimin me qentë endacakë në rajonin e Pollogut, sot Komuna e Gostivarit u pajis me një automjet të specializuar për këtë dedikim. Automjeti vjen si donacion në kuadër të një projekti të finansuar nga BE ndërsa dhe implementuar nga  UNDP në bashkëpunim me Qendrën për Zhvillim të Rajonit Planor të Pollogut për zgjidhje afatgjate të problemit me qentë e pastrehë.

Automjetin, kryetarit të komunës së Gostivarit Arben Taravari, ia dorëzoi drejtori i Qendrës për Zhvillim të Rajonit Planor të Pollogut – Fatmir Saiti, të cilin pas regjistrimit Komuna do t’ia dorëzojë Ndërmarrjes Publike “Komunalec”.

Pas pranim-dorëzimit të automjetit, kryetari Taravari dhe drejtori Saiti mbajtën konferencë për shtyp.

“Në drejtim të zgjidhjes afatgjate të problemit me qentë e pastrehë, Komuna e Gostivarit ka bërë disa hapa të rëndësishëm, duke hapur strehimore dhe duke vaksinuar dhe sterilizuar 240 qen endacakë deri më tani. Falë një projekti me UNDP së shpejti do të hapim edhe një strehimore me kapacitet trefish më të madh se kjo ekzistuese dhe shpresojmë se atëherë do të arrijmë një situatë të volitshme. Me këtë rast falënderoj drejtorin e Qendrën për Zhvillim të Rajonit Planor të Pollogut, z. Fatmir Saiti që vlerësoi punën tonë të deritashme dhe përzgjodhi komunën e Gostivarit që t’ia ndajë këtë donacion”, theksoi Taravari.

Drejtori Fatmir Saiti, njoftoi se automjeti i specializuar ka kapacitet për bartje të 10 qenve endacakë dhe se i njëjti, në fakt është i dedikuar për rajonin e Pollogut, por derisa të vihet në funksion një qendër rajonale për menaxhimin me qentë endacakë, i njëjti i dorëzohet Komunës së Gostivarit si komunës e cila deri më tani avancon në menaxhimin me këtë problem.

Kryetari Taravari dhe drejtori Saiti, në konferencë për shtyp u përgjigjën edhe në pyetje të shumta të gazetarëve, me ç’rast njoftuan se së shpejti do të fillojë asfaltimi i rrugës për te deponia Rusino dhe se problemet rreth shpronësimit në atë rrugë janë para përfundimit. Ndërsa në të ardhmen do të ndërtohet edhe një rrugë tjetër prej te deponia deri te rruga magjistrale Gostivar-Kërçovë, që kamionët me mbeturina që vijnë nga komunat tjera, të mos kalojnë nëpër qytet.

Shërbimi për informim

Riparime në shkollën e mesme teknike në Gostivar

08.05.2019

Në Shkollën e Mesme Teknike “Gostivar” janë në vijim punimet për përmirësimin e kushteve.

Me mjete të siguruara nga Ministria e Arsimit dhe Shkencës, bëhet riparimi i pullazit të dëmtuar të sallës sportive, ndërsa bëhen edhe intervenime tjera me mjete vetanake të shkollës.

Në vijim është rikonstruktimi i sistemit të ngrohjes qendrore, respektivisht vendosja e dy kaldajave të kombinuara për djegie me dru dhe me pellet.

Po ashtu vendosen edhe kamera sigurie brenda dhe jashtë objekteve të shkollës.

Shërbimi për informim

NJOFTIM

08.05.2019

I njoftojmë qytetarët se nesër (e enjte) do të fillojnë punët ndërtimore për asfaltimin e një krahu të rrugës “Boge Veljanoski” në lagjen Karagaç, me gjatësi prej 365 m dhe gjerësi 5 m.

Përderisa do të zgjasin punimet, qarkullimi i automjeteve dhe këmbësorëve do të zhvillohet në kushte të vështirësuara, andaj lusim qytetarët për mirëkuptim.

Me respekt,

Shërbimi për informim – Komuna e Gostivarit

Fillojnë aktivitetet për rregullimin oborreve të disa shkollave

07.05.2019

Këtyre ditëve, Komuna e Gostivarit në bashkëpunim me Ndërmarrjen publike “Parkingjet publike dhe gjelbërimi” kanë bërë rregullimin oborreve të disa shkollave fillore dhe të mesme në qytet dhe në fshatin Debresh.

Me këtë aktivitet u përfshinë SHF “Ismail Qemali”, SHF “Bashkimi”, SHF “Faik Konica”- f. Debresh, Shkolla e mesme ekonomike dhe Shkolla e mesme teknike.

Aktivitetet e këtilla do të vazhdojnë edhe në shkollat tjera komunale dhe Kopshtet e fëmijëve në Gostivar.

Shërbimi për informim