Lajme

01.06.2018

Të hyrat e realizuara publike në buxhetin themelor të komunës së Gostivarit për kuartalin e parë të vitit 2018, krahasuar me të njëjtën periudhë të vitit të kaluar, shënojnë rritje për 13 për qind.

Në kuartalin e parë të vitit të kaluar janë realizuar 60.739.493 denarë, ndërsa në të njëjtën periudhë të këtij viti realizimi ka arritur në 68.502.722 denarë. Ndikim më të madh në këtë rritje, kanë arkëtimi i tatimit në pronë dhe i taksave komunale, respektivisht pjesa e tatimeve që varet nga angazhimi i administratës komunale dhe rritja e besimit të qytetarëve në institucionin Komunë.

“Te tatimi në pronë kemi rritje madje prej 42 për qind, respektivisht nga 11.770,673 denarë në kuartalin e parë të vitit të kaluar, në 16.719.149 denarë për kuartalin e parë të këtij viti. Rritje të dukshme kemi edhe tek pagesa e taksave komunale, në nivel 12 për qind, respektivisht nga 14.203.738 denarë në kuartalin e parë të viti 2017 në 15.909.149 denarë në kuartalin e parë të vitit 2018. Këto dy pozicione të të ardhurave nga tatimet, janë në fakt ato tek të cilat ka ndikim besimi i qytetarëve tek institucioni Komunë por edhe angazhimi i administratës komunale”, sqaron udhëheqësi i Sektorit për financa dhe buxhet, Sadri Elezi.

Nga Komuna e Gostivarit, bëjnë apel që qytetarët rregullisht t’i paguajë tatimet dhe taksat komunale, të cilat më pas u kthehen në formë të investimeve dhe shërbimeve për jetë më cilësore.

Shërbimi për informim

01.06.2018

Udhëheqësia e re komunale në krye me kryetarin Arben Taravari, vëmendje të veçantë i kushton diskutimit dhe dizajnimit të prioriteteve zhvilluese dhe sjelljen e perspektivës më të madhe në mbrojtjen e personave me nevoja speciale, me theks të veçantë fëmijët, që edhe ata të bëhen pjesë e barabartë e shoqërisë së përgjithshme,vend ky i cili me të drejtë atyre u takon.

Në këto gjashtë muaj të qeverisjes, ndonëse me bllokada dhe obstruksione të papara, punohet shumë në këtë drejtim, dhe tashmë janë krijuar kushtet për hapjen e një Qendre për fëmijët me autizëm në kuadër të godinës së Konviktit të nxënësve në Gostivar.

Vlen të theksohet me këtë rast edhe kontributi i pamohueshëm i drejtorit të Konviktit të nxënësve, Shpend Sulejmani dhe donatorëve të ndryshëm, bashkëqytetarë tanë.

Pritet që së shpejti, kjo qendër të vihet në funksion në bashkëpunim me partnerë, ekspertë të fushës.

Shërbimi për informim

29.05.2018

Me iniciativë të Misionit të OSBE-së në Shkup, sot u realizua një takim ndërmjet kryetarit të komunës Arben Taravari, kryeshefit të Sektorit të Punëve të Brendshme – Tetovë, Amir Dalipi dhe komandantit të Stacionit Policor – Gostivar, Gazi Abdurahimi.

Takimi u realizua në kabinetin e kryetarit Taravari dhe në prani të përfaqësuesve të Misionit të OSBE-së në Maqedoni.

Në takim u bisedua për tejkalimin e mosmarrëveshjeve të kohëpaskohshme të deritashme dhe vendosjen e një komunikimi dhe bashkëpunimi normal ndërmjet dy institucioneve. Të dyja palët ranë dakord se me bashkëpunim reciprok mund të arrihet shumë në përmirësimin e sigurisë në komunën e Gostivarit dhe realizimit efektiv të punëve dhe aktiviteteve të ndryshme të cilat i realizon Komuna e Gostivarit në territorin e saj.

“Për mosbashkëpunimin e deritashëm dhe mosmarrëveshjeve të ndryshme, ndoshta faji ka qenë i përbashkët. Por ne duhet të shohim para dhe t’i tejkalojmë këto probleme dhe në interes të qytetarëve të komunës së Gostivarit të vendosim një komunikim dhe bashkëpunim efektiv i cili do t’i japë edhe rezultatet e pritura”, theksoi kryetari Taravari në konferencën e përbashkët për shtyp pas takimit.

Në të njëjtën linjë ishte edhe deklarata e kryeshefit të SPB – Tetovë Amir Dalipi, i cili po ashtu e pranoi se ka pasur ngatërresa të caktuara, por se sot kanë ardhur që ato t’i tejkalojnë dhe të mos përsëriten në të ardhmen.

Shërbimi për informim

23.05.2018

Si pjesë e programit vjetor të Ndërmarrjes Publike “Komunalec”, projekti për ndërtimin e kanalizimit në fshatin Turçan i Madh është komplet i përgatitur dhe pritet marrja e lejes nga organet kompetente për fillimin e realizimit të tij.
Këtë ua kumtuan banorëve të fshatit Turçan i Madh, kryеtari i komunës ës Gostivarit , Arben Taravari dhe drejtori i NP “Komunalec”, Isak Lazami gjatë vizitës këtij fshati.

“ Sonte vendosëm të jemi në fshatin Turçan i Madh, për të bashkëbiseduar me banorët por edhe për ta promovuar fillimin e punimeve për ndërtimin e kanalizimit në këtë fshat. Me drejtorin e NP “Komunalec” u koordinuam që këto ditë të nisin punimet. Besojmë se brenda dy deri tre javëve të punimet të përfundojnë dhe në këtë fshat të jetë zgjidhur ky problem si një ndër problemet kryesore. Ky është premtim që ne e kemi bërë gjatë fushatës elektorale në zgjedhjet lokale të vitit 2017”, u shpreh kryetari Taravari.
Drejtori i NP ”Komunaleс”, Isak Lazami njoftoi se presin lejen nga organet kompetente dhe menjëherë të fillojë me punë.

“Ndërmarrja jonë e ka paraparë në program këtë kanalizim. Ky projekt ka kaluar në organet drejtuese të ndërmarrjes, konkretisht këtë e kemi pritur, përndryshe këtë premtim të kryetarit Taravari gjatë fushatës për ndërtimin e kanalizimi fekal në Turçanin e Madh dhe pjesa tjetër për në Llapushnik, do ta realizonim që më herët. Shpresojmë që leja nga organet kompetente do të arrijë sa më shpejtë dhe do të fillojmë me punimet ku brenda 3 javëve mendojmë të mbarojmë me kanalizimin”, theksoi Lazami.
Kryetari Taravari me bashkëpunëtorët e tij, vizitat nëpër vendbanime të ndryshme të komunës së Gostivarit, gjatë muajit të Ramazanit do t’i realizojë pas namazit të teravisë.

Shërbimi për informim

21.05.2018

Kryetari i komunës së Gostivarit, Arben Taravari dhe kryetari i komunës Sveta Nedelja të Kroacisë, Dario Zurovec nënshkruan të shtunën Kartën për Miqësi dhe Bashkëpunim ndërmjet dy komunave, me çka edhe zyrtarisht këta dy qytete u binjakëzuan.

Nënshkrimi i Kartës për miqësi dhe bashkëpunim, u bë në kuadër të seancës solemne të Këshillit të Komunës Sveta Nedelja me rastin e Ditës së Qytetit.

Kryetari i komunës së Gostivarit, Arben Taravari iu drejtua të pranishmëve dhe shprehu nderin e veçantë që Komuna e Gostivarit u bë partnere me Komunën Sveta Nedelja.

“Komuna Sveta Nedelja është një shembull i përkryer se si funksionimi i administratës komunale dhe bashkëpunimi me sektorin e biznesit, mund të krijojnë klimë për punë dhe jetë. Me binjakëzimin e dy komunave tona, jam i bindur se do të përfitojmë shumë nga përvojat e njëri tjetrit”, theksoi kryetari Taravari.

Ndërkaq kryetari i komunës Sveta Nedelja, Dari Zurovec nënvizoi se themelet e këtij bashkëpunimi janë realizuar falë konsulles së nderit të Republikës së Kroacisë në Shkup, znj, Vita Huzjan.

Binjakëzimi i dy komunave ka për qëllim krijimin e marrëdhënieve miqësore, kulturore, shoqërore dhe sipërmarrëse, si dhe përmirësimin e zhvillimit të bashkëpunimit ndërshtetëror të komuniteteve lokale në emër të demokracisë dhe unitetit.

Paraprakisht, në seancën e fundit të Këshillit të Komunës së Gostivarit, këshilltarët komunalë njëzëri sollën vendim për binjakëzimin e Komunës së Gostivarit me Komunën Sveta Nedelja.

Shërbimi për informim

18.05.2018

Kryetari i komunës së Gostivarit, Arben Taravari i cili  po qëndron për vizitë zyrtare në Republikën e Kroacisë, është pritur sot në Kuvendin e Republikës së Kroacisë në Zagreb nga deputetja shqiptare Ernina Lekaj Prljaskaj.

Ne takim ishin të pranishëm edhe kryetar i Këshillit Shqiptar te Zagrebit- Shuip Ziberi, këshilltar në Këshillin Shqiptar të Zagrebit – ing. Avni Osmani, dr. Shoip Shoipi, si dhe udhëheqësi i Sektorit për Zhvillim Ekonomik Lokal pranë Komunës së Gostivarit – Besim Dogani.

Në një atmosferë të ngrohtë miqësore u diskutua për gjendjen e shqiptarëve të cilët jetojnë dhe veprojnë në Kroaci, si dhe për përparimin e Kroacisë pas anëtarësimit në strukturat euro-atlantike.

Ermina Lekaj Prljaskaj është deputetja e parë shqiptare në Kuvendin e Kroacisë dhe krahas pakicës shqiptare në këtë shtet, përfaqëson edhe pakicën boshnjake, malazeze, maqedonase dhe sllovene.

Gjatë qëndrimit në Kroaci, kryetari Taravari vizitoi edhe Komunën Stara Nedelja, si dhe takoi shumë bashkatdhetarë tanë që jetojnë në Kroaci.

Shërbimi për informim