Gostivarasit e mi të dashur!

Sot është dita e fundit e një viti të cilin ditëm ta përballojmë së bashku, pavarësisht pengesave që kishim rrugës!

Uroj që për vitin e ri 2019, të jemi shumë më mirë se këtë vit dhe jam i sigurt se do të jemi, pasi që ditë më të mira pritet të vijnë!

Duke ju shtrënguar duart Ju Uroj Gëzuar Vitin e Ri!

Shëndet dhe mbarësi të gjithëve!

Kamion i ri IVECO për grumbullim të mbeturinave – donacion nga Turqia për Komunën e Gostivarit

29.12.2018

Në shërbim të Ndërmarrjes Publike “Komunalec” është vendosur një kamion i ri për mbledhjen e mbeturinave. Bëhet fjalë për një donacion që vjen nga Unioni i Komunave Turke, përfaqësues të të të cilit qëndruan sot në Komunën e Gostivarit për të bërë pranim dorëzimin e këtij donacioni.

Mysafirët u pritën nga kryetari i komunës, Arben Taravari i cili me këtë rast i falënderoi donatorët, duke  nënvizuar se bëhet fjalë për një dhuratë e cila i është premtuar gjatë vizitës së tij të fundit në Ankara.

“Falënderoj sinqerisht Unionin e Komunave Turke, pasi që prej kur unë jam kryetar  komunës kemi pasur disa donacioni prej Rpeublikës së Turqisë, dy auto-ambulanca të reja të tipit Mercedes, tash na mbërrit kamioni i ri për grumbullimin dhe bartjen e mbeturinave i tipit Iveco, po ashtu i ri, ndërsa shpresojmë në maj të pranojmë edhe një kamion tjetër më të madh. Shumë shpejt, ndoshta në janar, si donacion nga Turqia do të ndërtojmë një lojtore të madhe në një pjesë të parkut të qytetit”, nënvizoi kryetari Taravari.

Ushtruesi i detyrës sekretar i Unionit të Komunave Turke, Ahmet Kazan tha se ideja e këtij donacioni vjen pas konsultimit me kryetarin e komunës, i cili e ka theksuar nevojën për një kamion për bartjen e mbeturinave

“Dëshiroj të ju përcjell përshëndetjet e popullit turk si dhe të falënderoj kryetarin e komunës së Gostivarit për mikpritjen. Kohë më parë Arben Taravari na njoftoi se komuna që drejton ai e ka të nevojshëm një kamion për bartjen e mbeturinave dhe ne si Unionin i Komunave Turke u munduam që kësaj kërkese t‘i përgjigjemi për një kohë sa më të shkurtër. Donacioni në fjalë vjen në kuadër të një programi vjetor në nivel të Ballkanit. Ne si popull kemi një lidhshmëri të ngushtë me popullatën e Gostivarit, andaj shpresojmë se marrëdhëniet e mira mes nesh, të vijojnë edhe në të ardhmen” tha Ahmet Kazan.

Ndërkaq, drejtori i NP “Komunalec”, Isak Lazami, tha se donacioni në fjalë do të ndikojë në përmirësimin e cilësisë së shërbimeve duke nënvizuar se do të vijojnë me përpjekjet që të sjellin edhe kamionë tjerë që do të vendosen në shërbim të ngarkim-shkarkimit të hedhurinave.

Shërbimi për informim

Kryetari Taravari promovoi rinovimin e çerdheve publike në Gostivar

 

28.12.2018

 

Fëmijët e çerdheve publike të Gostivarit, me një program të shkurtër festuan ndërrimin e motmoteve. Në festën e tyre i shoqëroi edhe kryetari i komunës sl Gostivarit, Arben Taravari dhe udhëheqësja e Sektorit për veprimtari publike, Aslian Snopçe.

Kremtja e sotme e fëmijëve në çerdhen qendrore të IPKF “Gëzimi fëmijëror” përkonte edhe me promovimin e investimeve të fundit në këtë dhe në çerdhet tjera publike të qytetit të Gostivarit dhe tani të gjitha ato i plotësojnë kushtet e nevojshme për qëndrim ditor të fëmijëve.

Kryetari Arben Taravari ua uroi Vitin e Ri fëmijëve duke u dëshiruar shëndet dhe lumturi, si dhe u ndau dhurata simbolike.
Shërbimi për informim

Kryetari Arben Taravari u ndau dhurata fëmijëve në Qendrën Ditore

27.12.2018

Në vigjilje të ndërrimit të motmoteve, kryetari i komunës së Gostivarit, Arben Taravari, vizitoi fëmijët në Qendrën ditore të fëmijëve me nevoja speciale, me ç’rast u ndau atyre pako për Vitin e Ri.

“Është kënaqësi e veçantë që në vigjilje të Vitit të Ri, bashkë me bashkëpunëtorët e mi, të ndajmë disa çaste të lumtura me fëmijët dhe personat të cilët më së shumti dinë t’i gëzohen jetës, edhe pse përballen me sfida të shumta”, theksoi Taravari.

Krahas dhuratave që ua bëri kryetari Taravari fëmijëve në Qendrën Ditore, Komuna e Gostivarit siguroi pako të Vitit të Ri edhe për rreth 300 fëmijë të tjerë.

“Sot ndamë pako të Vitit të Ri edhe në paralelet speciale në SHF Ismail Qemali dhe SHF M.K.Ataturk, si dhe në Shoqatën e personave me shikim të dëmtuar Realiteti dhe Shoqatën e shurdhmemecëve Qetësia. Në ditët në vijim do të ndajmë dhurata edhe për fëmijët romë dhe fëmijët nga familjet ekonomikisht të rrezikuara. Me ndarjen e këtyre pakove, dërgojmë një mesazh se për këta persona institucionet dhe shoqëria duhet të kenë një kujdes të veçantë”, theksoi Afërdita Hamza – përgjegjëse për çështje sociale pranë Komunës së Gostivarit.

Ndryshe, nesër në ora 13:00 në sheshin e qytetit në Gostivar do të mbahet program i pasur festiv për fëmijë, me ç’rast kryetari Taravari dhe anëtarët e Forumit Rinor të Komunës së Gostivarit, fëmijëve kalimtarë të rastit, do tu ndajnë edhe dhurata simbolike për Vitin e Ri.

Shërbimi për informim

Prej 1 deri 20 janar parkingjet e shkollave në Gostivar, të hapura për qytetarët

27.12.2018

Për shkak se kapaciteti i parkingjeve publike në qytetin e Gostivarit, nuk i përmbush nevojat gjatë qëndrimit të mërgimtarëve në vendlindje, kryetari i komunës së Gostivarit, Arben Taravari edhe këtë vit solli vendim që shkollat fillore dhe të mesme komunale t’i hapin portat dhe të mundësojnë që parkingjet e tyre të shërbejnë si parkim publik falas.

Parkimi i automjeteve në parkingjet e shkollave do të jetë i mundur prej 1 deri më 20 janar, respektivisht përderisa zgjat pushimi dimëror i nxënësve.

“E gjithë kjo bëhet me qëllim që bashkatdhetarëve tanë tu mundësojmë kushte më të mira gjatë qëndrimit të tyre në vendlindje. Shfrytëzoj nga rasti që edhe njëherë tu dëshiroj mirëseardhje dhe të kalojnë çaste të lumtura me familjarët, miqtë dhe shokët e tyre, si dhe tu uroj Vitin e Ri 2019”, thekson kryetari Taravari.

Rikujtojmë se pranë Komunës së Gostivarit, prej kur kryetar është Arben Taravari, gjatë pushime verore dhe festave të fundvitit, funksionon Zyra për Mërgimtarët, si dhe organizohen dhe mbështeten aktivitete të ndryshme të cilat në fokus kanë bashkëqytetarët tanë që punojnë dhe jetojnë jashtë vendit.

Shërbimi për informim

Nesër në Gostivar do të mbahen turne në shah, futboll dhe basket

26.12.2018

Qendra për Bazë të Përbashkët (CFCG) me përkrahje të Ambasadës së Britanisë dhe Ambasadës së Holandës në Shkup, në bashkëpunim me Komunën e  Gostivarit realizon projektin “Fuqizimi i qëndrueshmërisë kundër ekstremizmit të dhunshëm të komuniteteve lokale në Maqedoni” me ç’rast të enjten (27.12.2018) do të organizohen ngjarje sportive dhe kulturore ku do të përfshihen elemente të bashkëpunimit, komunikimit dhe lidhjes së fëmijëve me përkatësi të ndryshme etnike.

Në ora 12:00 në sallën sportive të SHFK “Goce Dellçev” do të zhvillohet Turneu në shah, në ora 13:00 në sallën sportive të SHFK “M.K. Ataturk” do të zhvillohet Turneu në futboll të vogël, ndërsa në orë n 14:00 në sallën sportive të SHFK Isail Qemali” do të zhvillohet Turneu në basket.

Organizatorët kanë paraparë dhurata simbolike për pjesëmarrësit, ndërsa rekuizitat sportive që do të përdoren gjatë aktiviteteve do tu dhurohen shkollave.

Shërbimi për informim

 

U mbajt edicioni i parë i Festivalit Junior Fest

24.12.2018

Me mbështetje të Komunës së Gostivarit, në Qendrën për Kulturë në Gostivar u mbajt edicioni i parë i festivalit Junior Fest.

Festivali u organizua nga Shoqatës Kulturore Artistike “Sonata” me në krye drejtoreshë artistike të festivalit, këngëtaren Betime Zylali, e cila thotë se pas realizimit të suksesshëm të këtij edicioni, planifikon që këtë festival ta shndërrojë në festival tradicional.

Në Festivalin “Junior Fest 2018” morën pjesë 14 garues, ndërsa juria profesionale në përbërje: prof. Arifikmet Xhemaili dhe regjisorët Sulejman Rushiti dhe Olsen Poshka, përzgjodhën më të mirët.

Çmimi i parë nga juria dhe nga publiku i takoi Vesa Pollozhanit me këngën “Të falim dashurinë”, Çmimi i dytë u takoi Lina Demirit dhe Dea Sadikut, ndërsa Çmimi i tretë Besar Asanit, Florensa Shates dhe Tesa Selimit.

Shërbimi për informim 

Vihet sërish në funksion Zyra e Mërgimtarëve

24.12.2018

Me rastin e qëndrimit të mërgimtarëve në vendlindje, Komuna e Gostivarit e vë sërish në funksion Zyrën e Mërgimtarëve. Zyra e Mërgimtarëve, që gjendet në hapësirat e Qendrës për Shërbime Komunale në katin përdhes të objektit të Komunës së Gostivarit, do të punojë prej sot (24.12.2018) deri më 07.01.2019, edhe atë çdo ditë pune prej në ora 08:00 deri në ora 19:00.

Në këtë zyrë, mërgimtarët do të mund të marrin të gjitha informatat e duhura për shërbimet komunale, si dhe të udhëzohen se cilave institucione duhet tu drejtohen për zgjidhjen e kërkesave të tyre. Duke pasur parasysh se afati për dorëzimin e kërkesave për legalizim të objekteve të ndërtuara pa leje skadon më 31.12.2018, apelojmë deri te të gjithë qytetarët ta shfrytëzojnë këtë mundësi të fundit ligjore.

Shërbimi për informim

“Mërgimtarët nga Zvicra” në bashkëpunim me Komunën e Gostivarit ndanë veshmbathje për fëmijët skamnorë

19.12.2018

Falë kontributit të fondacionit “Mërgimtarët nga Zvicra për Gostivarin”, sfidat e përballjes me acarin dimëror,  këtë vit nuk do të jenë shumë të vështira edhe për fëmijët të cilët nuk kanë arritur që me kohë të sigurojnë veshmbathje adekuate për këtë stinë.

Ky Fondacion  siguroi xhupa dimri për fëmijët skamnorë dhe për  fëmijët me aftësi të posaçme.  Bëhet fjalë për një aksion të përbashkët që ky Fondacion e realizon me Sektorin e Veprimtarive Publike pranë Komunës së Gostivarit, me të cilin përfshihen të gjitha shkollat fillore të qytetit dhe fshatrave përreth.

 Fillimisht shkollat përgatitën listat me nxënësit nevojtarë dhe në bazë të atyre listave u bë shpërndarja nëpër shkolla me ç’rast u mbajt llogarinë edhe për privatësinë.

Nga Sektori për Veprimtari Publike pranë Komunës së Gostivarit falënderojnë Fondacionin  “Mërgimtarët nga Zvicra për Gostivarin”, të cilët në kontinuitet kanë realizuar aksione të tilla të ngjashme dedikuar nxënësve të komunës së Gostivarit  si dhe paralajmërojnë vazhdimin e aksioneve të këtilla edhe në të ardhmen.

Shërbimi për informim