Pasqyra e librave që mungojnë në gjysëmvjetorin e dytë në shkollat fillore dhe të mesme komunale në Gostivar

06.03.2020

Imërlije Saliu nga Sektori i arsimit pranë Komunës së Gostivarit, në konferencën e sotme për shtyp dha pasqyrë të detajuar për mungesën e teksteve shkollore në shkollat fillore dhe të mesme.

Përmbajtjen e pres conferences jua përcjellim në mënyrë integrale:

Edhe pse ka gati një muaj e gjysëm prej kur ka filluar gjysëmvjetori i dytë, në shkollat fillore komunale të Gostivarit, mungesa e teksteve nga klasat e para deri në të nëntat, në të tri gjuhët, është shumë e madhe. Nga të dhënat zyrtare nga gjithsej 10 shkollat fillore të komunën së Gostivarit, rezulton se mungojnë 9.506 tekste shkollore për të gjitha lëndët dhe të gjitha klasat. Njëlloj si atëherë kur reaguam në gjysëmvjetorin e parë, edhe në ktë gjysëmvjetor, mungesë më të madhe të librave kemi tek klasat e gjashta – gjithsej 3.838 tekste, klasat e shtata 1.026 dhe klasat e nënta 1.561 tekste shkollore. Sa u përket lëndëve mësimore 809 libra mungojnë të gjuhës shqipe, 289 tekste mungojnë nga gjuha Angleze, ndërkaq ka mungesë të madhe të lëndës së gjeografisë gjithsej 1007, histori 580 tekste. Po ashtu kemi mungesë të theksuar edhe të librave nga lëndët e arsimit teknik, arsimit figurativ, muzikës, informatikës, siç i kemi pasqyruar në tabelat e më poshtme për çdo shkollë.

Me të njëjtin problem ballafaqohen edhe shkollat e mesme. Të dhënat që kemi marrë janë mjaft shqetësuese. 8.610 libra mungojnë në shkollën e mesme komunale të mjekësisë, 2.453 libra në shkollën e mesme teknike, ndërsa në gjimnaz mungojnë shumë pak tekste shkollore, vetëm 64 libra. Shkolla e mesme ekonomike na ka ofruar vetëm emrat e librave që mungojnë pa mos e shoqëruar me numra konkret, por megjithatë shqetëson fakti se janë të radhitura mbi 15 lëndë mësimore. Sa u përket shkollave të mesme analiza është bërë për të gjitha vitet, prej vitit të parë deri në vitin e katërt dhe për të tri gjuhët mësimore.

Sektori i arsimit pranë Komunës së Gostivarit e sheh si mjaft shqetësues faktin që edhe në gjysëmvjetorin e dytë është vazhduar me të njëjtin avaz si në gjysëmvjetorin e parë dhe mungesa e librave është mjaftë e theksuar. Nga kjo situate ata që humbin më së shumti janë nxënësit për këtë arsye iniciativa jonë është që të informojmë opinionin publik si dhe kërkojmë nga ministria e arsimit që të marë masa konkrete ku sot kemi dërguar edhe zyrtarisht kërkesë deri te ky institucion. Ne shpresojmë në përgjigje pozitive nga ana e Ministrisë për këtë vit akademik shkollor si dhe kërkojmë që prej shtatorit, respektivisht prej fillimit të vitit të ri shkollor 2020/2021, shkollat tona të mos përballen me problem të kësaj natyre.

Shërbimi për informim

Historike, realizim 98.2% të Buxhetit të Komunës së Gostivarit gjatë vitit 2019-të!

Komuna e Gostivarit ka arritur realizim rekord të Buxhetit të saj gjatë vitit që lamë pas. Kryetari Arben Taravri theksoi se realizimi ka qenë historik me 98,2 %. Kjo përqindje ndodh për herë të parë në 29 vite pluralizëm në Gostivar.

“Me rebalancin e Buxhetit të vitit 2019-të ne kishim vlerë të planifikuar të parave me një miliard e 25 milion denarë dhe realizimi i këtij buxheti është një miliard e shtatë milion denarë, ose në përqindje 98,2 %. Mendojë se është një prej rekordeve që është arritur këto 29 vite nga Komuna e Gostivarit, por edhe si vlerë pasi asnjëherë nuk ka pasur një miliard as në të hyra e sa në të dalat e realizimit të Buxhetit. Në llogarinë themelore të Buxhetit të Komunës së Gostivarit kanë qenë të planifikuara 376 milion denarë dhe janë realizuar gjithsejt 382,4 milion denarë që nënkupton se e kemi tejkaluar edhe përqindje prej 100 %. Të hyrat si te Buxheti themelor edhe te ai i konsoliduar në shumë absolute dhe në përqindje paraqet një rekord të cilin nuk e ka pasur asnjëherë komuna ynë”, deklaroi kryetari i Komunës së Gostivarit, Arben Taravari.

Duke bërë krahasime mes viteve 2014-2017 dhe viteve 2018-2019, kryetari Taravari tha se palifikimi dhe realizimi janë mbresëlënës, për çka Komuna e Gostivarit është zgjedhur si komuna më transparente në vend.

“Kemi realizim shumë më të lartë gjatë viteve 2018/2019 në krahasim me mesataren e viteve nga 2014-ta deri në 2017-tën. Investimet kapitale në vitin 2018/2019 i kemi 20 % më shumë në krahasim me vitet 2014-të dhe 2017-të. Ne kemi qenë parti opozitare me të gjitha obstruksionet, me mospasjen e shumicës në Këshill i kemi këto rezultate financiare. Kemi rënie të harxhimeve komunale, shërbimet kontraktuese kanë rënë deri 50 % në krahasim me mesataren 2014/2017, rritja e transfere në organizatat jo qeveritare është 13 milion denarë, apo dhjetë milion më shumë se mesatarja e viteve 2014/2017. Prandaj, nuk është e rastësishme që kemi lëvdata edhe prej ambasadave dhe miqve tanë që jemi një prej komunave e cila ka raporte dhe relacione shumë të mira me shoqërinë civile. Poashtu, jemi komuna më transparente në RMV, e dini se në Pollog u zgjodhëm më transparetja që përsëri kjo vjen si rezultat i punëve tona të përbashkëta për këto dy vite e gjysëm”, deklaroi më tej i pari i Gostivarit, Arben Taravari.

Krahasuar me komunat tjera të vendit, konkretisht 15 për të cilat ka të dhëna, Komuna e Gostivarit është më e mira në realizimin e planifikimit të investimeve kapitale. Këto të dhëna u bënë të ditura gjatë séancës e 23 të Këshillit të Komunës së Gostivarit e cila u mbajtë sot.

U mbajt ligjëratë mbi parandalimin e koronavirusit

04.03.2020

Dr. Fadil Cana – specialist infektolog në Klinikën universitare për sëmundje infektive në Shkup, mbajti sot në sallën e Këshillit të Komunës së Gostivarit, ligjëratë mbi parandalimin e koronavirusit.

Përfaqësues nga shkollat fillore dhe të mesme, institucionet lokale, administrate komunale si dhe të pranishëm të tjerë u informuan mbi karakteristikat e koronavirusit të ri Covid-19, rrezikshmërisë, përhapjes së shpejtë të tij, shkallës së mortalitetit, me theks të veçantë masat e nevojshme për parandalim të tij.

Dr. Cana nënvizoi se duhet bërë distinksion ndërmjet thashethemeve, miteve dhe fakteve dhe se nuk duhet bërë panik të panevojshëm, por njëkohësisht paralajmëroi për probabilitetin e lartë të shpalljes së pandemisë shkaku asaj se kjo epidemi është përhapur në më shumë shtete dhe në disa kontinente.

Për domosdoshmërinë e ngritjes së vetëdijes dhe forcimin e parandalimit të përhapjes së koronavirsuit, infektologu Fadil Cana në ligjëratën e tij, e potencoi faktin se madje edhe shtete me sistem shëndetësor shumë më të avancuar se vendi ynë siç është Italia, ballafaqohen me mungesën e aparateve dhe mjeteve të tjera, respektivisht me kapacitetet e nevojshme për, diagnostikim dhe trajtim të personave të prekur nga koronavirusi.

Shërbimi për informim

 

Ligjëratë mbi masat e parandalimit të koronavirusit

03.03.2020

Nesër (e mërkurë) me fillim në ora 12:00 në sallën e Këshillit të Komunës së Gostivarit, dr. Fadil Cana – specialist në Klinikën universitare të sëmundjeve infektive në Shkup, do të mbajë ligjëratë në lidhje me atë se çka është koronavirusi dhe cilat janë masat më efikase për parandalimin e përhapjes së tij.

Ftojmë qytetarët për pjesëmarrje.

Shërbimi për informim

Në Gostivar u përurua themelimi i Shoqatës së prindërve të fëmijëve me çrregullime të spektrit autik “Blue Piuzzle”.

03.02.2020

Komuna e Gostivarit ka dhënë një kontribut të madh dy vitet e fundit në drejtim të ndihmesës së personave me pengesa në zhvillim dhe fëmijëve autik. Kështu do të vazhdojmë edhe në të ardhmen.

Para prindërve të fëmijëve të spektrit autik të qytetit tonë, premtova se së shpejti do të themelojmë edhe Qendrën e parë për autizëm dhe personat me pengesa në zhvillim.

Qendra parashihet të funksionojë te ish objekti i kolexhit “Jahja Kemal” në Gostivar, dhe do të jetë qendra e parë e këtij lloji në rajon.

Një qendër e tillë ka qenë premtim elektoral nga ana jonë, besojë në kapacitetet tona që sa më parë e njejta të fillon me punë. Realizimi sajë, do të ishte puna më e madhe e bërë gjatë mandatit katër vjeçar. Ky institucion do të jetë më i depolitizuari në vendin tonë.

Për më pak se dy muaj janë trajtuar 120 qen endacakë

25.02.2020

Komuna e Gostivarit shënon rekord në trajtimin e qenve endacakë në vitin 2020. Për më pak se dy muaj janë trajtuar 120 qen endacakë, që nënkupton kapjen, vakcinimin, sterilizimin, vendosjen e çipit dhe transportin e tyre.

Qentë e trajtuar nuk paraqesin më rrezik për qytetarët, meqë të njëjtin nuk janë agresiv dhe njëherit nuk mund as të shumohen. Nga ana tjetër, një pjesë e qenve të trajtuar përkujdesen në dy stacionarët ekzistuese, ndërsa planifikohet që edhe një objekt i ish kazermës në Banjicë të Poshtme të adaptohet për shelter qendër dhe me këtë të rritet kapaciteti për përkujdesje të qenve endacakë.

Njoftojmë se qentë e përkujdesur në qendrën shelter mund t’i adoptojnë qytetarët e interesuar dhe me këtë gjest edhe ata të fitojnë një shok besnik por edhe të kontribuojnë për zgjidhjen e problemit m qentë endacak.

Vlen të theksohet se Komuna e Gostivarit është ndër komunat e rralla në vend që ka qendër shelter për qentë e pastrehë dhe avancon në luftën për zgjidhjen e këtij problemi, por se ky është një problem i cili nuk mund të zgjidhet vetëm në nivel të komunës dhe kërkon strategji të përbashkët në nivel të rajonit të Pollogut por edhe të shtetit në përgjithësi.

Shërbimi për informim

Shqyrtohen mundësitë për rritjen e efikasitetit të komunës në aspektin fiskal dhe planifikimi i projekteve

25.02.2020

Kryetari i komunës së Gostivarit, Arben Taravari, priti sot drejtorin ekzekutiv të financave publike të USAID për Maqedoni, John Yates, me të cilin shqyrtuan mundësitë për rritjen e efikasitetit të komunës në aspektin fiskal dhe planifikimin e projekteve.

Në takimin ku morën pjesë edhe shefi I kabinetit Valbon Limani dhe përgjegjësi I ZHEL-it, Besim Dogani, kryetari Taravari e njoftoi drejtorin Yates me sukseset dhe sfidat me të cilat ballafaqohet komuna e Gostivarit në fushën e vjeljes së taksave komunale, ekzekutimin e buxhetit dhe implementimin e projekteve.

“Prej kur e kam pranuar detyrën e kryetarit të komunës së Gostivarit, shënojmë rritje në vjeljen e taksave komunale në nivel prej 15%, ekzekutimi i buxhetit krahasuar me planifikimin arrin në lartësi prej rreth 95%, si dhe kemi realizuar projekte të shumta kapitale kryesisht me mjete vetjake por edhe si donacione nga organizatat ndërkombëtare dhe vendet mike të shtetit tonë”, theksoi kryetari Taravari.

Kryetari i komunës së Gostivarit, potencoi nevojën për decentralizim të mirëfilltë fiskal me çka do të rriten mundësitë e njësive të vetëqeverisjes lokale për efikasitet më të madh në planifikimin e buxhetit dhe investimet kapitale, sidomos duke pasur parasysh se komunat janë institucionet të cilat më së miri janë të njoftuara me nevojat reale të qytetarëve të saj.

Drejtori John Yates u ndal në bashkëpunimin  e mundshëm për aplikim të përbashkët në thirrjen publike të USAID-it, me ç’rast njoftoi kryetarin dhe bashkëpunëtorët e tij për katër komponentët e asistencës teknike që ofrohen përmes kësaj thirrjeje me vlerë prej 5 deri më 7 milion dollarë amerikanë.

Ai e vuri theksin në rritjen e nivelit të vjeljes së taksave komunale, përmirësimin e planifikimit të projekteve, rritjen e buxhetit të komunës dhe nevojën për decentralizim fiskal.

Shërbimi për informim

Komuna e Gostivarit me takime për rritje të sigurisë dhe vendosjen e rendit në shkollat e mesme

Komuna e Gostivarit, policia, punonjës social, drejtorë të shkollav të mesme, nxënës e prindër çdo të premte bëhen bashkë për të diskutuar problemet me të cilat ballafaqohen shkollat e mesme të Gostivarit dhe mënyrën për zgjidhjen e të njejtave. Këtë të premte nikoqir i këtij takimi ishte shkolla e mesme teknike. Aslian Snopçe, përgjegjëse e sektorit për veprimtari publike pranë Komunës së Gostivarit, tha se kjo iniciativë rrjedhë nga komuna. Ajo tha se këto takime do të organizohen çdo javë derisa të mbarojë viti shkollor.
Pjesmarrësit në këtë të ashtuquajtur Këshill profesional, kanë konstatuar se shpejtë kanë ardhur edhe rezultatetet e para.

Policia sqaroi se aktualisht është duke punuar me disa projekte mbi sigurinë nëpër shkolla, ndërsa çdo sugejrim i ri që do të dalë nga këto takime, ata janë të gatshëm ta shndërrojnë në projekt në dobi të shkollave.

Kumtesë nga Këshilli organizativ i Marshit Përkujtimor

Qytetarë të nderuar,

Me kënaqësi të madhe ju njoftojmë se Marshi Memorial për nder të viktimave të aksidentit rrugor te Llaskërca, kaloi mirë dhe i tejkaloi pritjet tona.

Në marsh morën pjesë qindra qytetarë nga Gostivari dhe qytete të tjera nga i gjithë vendi, prej të cilëve një pjesë në mënyrë simbolike, rreth njëqind përshkuan një ose dy etapa, ndërsa 46 pjesëmarrës marshuan nga fillimi deri në fund në rutën e gjatë 53 km në kohëzgjatje prej 11:30 orë. Vlen të theksohet se edhe një numër i konsiderueshëm nga gjinia më e bukur morën pjesë në marsh, 6 prej të cilave e përshkuan rutën e tërë, ndërsa rreth dhjetë përshkuan një apo dy faza të saj, kurse morën pjesë edhe persona të lënduar në këtë tragjedi, si dhe anëtarë të familjeve të viktimave.

Ajo që më së shumti na gëzon, është fakti se si gostivaras dëshmuam edhe një herë se jemi gjithnjë të bashkuar, si në të mirë ashtu edhe në të keqe, pa marrë parasysh përkatësinë kombëtare, fetare, politike, sociale apo çfarëdolloj përkatësie tjetër. Shpresojmë që arritëm të dërgojmë mesazh të fuqishëm deri tek institucionet shtetërore për ndërmarrje të masave për rritjen e sigurisë në trafikun rrugor, si dhe për ndërgjegjësimin e pjesëmarrësve në komunikacion për vozitje të kujdesshme dhe respektim të rregullave, që tragjedi të tilla të mos na përsëriten në të ardhmen. .

I shprehim falënderim Komunës së Gostivarit dhe kryetarit Arben Taravari për mbështetjen e plotë materiale dhe logjistike, si dhe Ministrinë e Punëve të Brendshme për asistencën policore gjatë gjithë marshimit.

Gjithsesi, falënderim i madh për mediat lokale, rajonale dhe kombëtare, për mbulimin e kësaj ngjarje shumë të rëndësishme.

Besojmë se ky marsh do të bëhet tradicional dhe do të përfshihet në agjendën e aktiviteteve të Komunës së Gostivarit, me çka do të përmirësohet niveli i organizimit por edhe masiviteti i pjesëmarrjes.

Këshilli organizativ

 

Sqarim në lidhje me fushën e patinazhit në Gostivar

15.02.2020

Të nderuar qytetarë,

Ju njoftojmë se një periudhë të caktuar kohore, fusha e patinazhit nuk ka qenë në funksion për të vetmen arsye kushtet atmosferike.

Në fakt, fushat e patinazhit janë të projektuara që të mund të jenë funksionale vetëm kur temperaturat maksimale ditore sillen nën 8 gradë Celzius. Për fatin tonë të mirë ose të keq, temperatura të tilla gjatë këtij dimri kemi pasur shumë pak ditë, dhe në ato pak ditë kjo fushë jo vetëm që ka qenë funksionale por edhe atë e kanë shfrytëzuar shumë të rinj dhe fëmijë të shoqëruar nga prindërit e tyre.

Sa i përket akuzave të pabaza të degës së BDI-së në Gostivar, kinse janë zhdukur patinat me të cilat Agjencia për Rini dhe Sport e ka furnizuar Sallën Sportive në Gostivar, ua bëjmë me dije edhe atyre edhe secilit që shpreh dyshimin më të vogël se ato gjenden në mjediset e sallës sportive dhe se kush të dojë mund të vërtetohet në këtë (fotografitë që mund t’i shihni janë bërë gajtë ditës së sotme). Po ashtu, akuza se patinazhi nuk vihet në përdorim që të shfrytëzohet për parkim të automjeteve, lëre që është e pavërtetë por është edhe tejet e palogjikshme sepse sipërfaqja që zen patinazhi, pavarësisht është në funksion ose jo, s’do mend se nuk mund të shfrytëzohet për parkim.

Ndryshe, asnjë prej tetë fushave të patinazhit në qytetet tjera të Maqedonisë nuk ka qenë në funksion gjatë ditëve të ngrohta, ku njëra prej tyre në vetëm 25 kilometra larg, në Tetovë, nuk është shfrytëzuar për asnjë çast, ndërsa kjo komunë udhëhiqet pikërisht nga një ndër kuadrot më të ekspozuara të partisë e cila akuzon pa bazë – BDI.

Megjithatë, bazuar në parashikimet e sinoptikëve, prej ditës së mërkurë do të ulen temperaturat dhe shpresojmë se të gjithë ata që e adhurojnë dimrin dhe duan të argëtohen në kushte dimri, do të kenë rasti që të bëjnë patinazh në këtë fushë, e cila nuk ka pësuar asnjë dëmtim dhe është e gatshme për tu rivënë në funksion.

Shërbimi për informim