“Freski kuranore” për mërgimtarët e Gostivarit

25.07.2018

Në kuadër të manifestimit “Mirësevini mërgmitarë” mbrëmë në amfiteatrin veror në Gostivar, u mbajt Koncerti me ilahi “Freski kuranore”.

Aktivitetit u realizua nga Sektori i Femrës Myslimane” në bashkëpunim me Komunën e Gostivarit.

Në ngjarje morën pjesë myftiu i Gostivarit Shaqir ef. Fetahu me bashkëpunëtorët e tij, zëdhënësi i komunës së Gostivarit Jasin Demiri dhe udhëheqësja e Sektorit për veprimtari publike Aslian Snopçe.

Kuran lexuan mr. Ensar Sinani dhe prof. Imer Alili, monolog mbajti Hafsa Rushiti, ndërsa ilahi interpretuan Korri i Myftinisë, Alja Xhemaili, Azra Rushtii dhe Esra Ameti.

Manifestimi “Mirësevini Mërgimtarë” mbahet nën patronazhin e Komunës së Gostivarit, Arben Taravari dhe me mbështetje financiare edhe të Ministrisë së Kulturës.

Sonte në agjendë është eventi “Natë e veçantë për fëmijë të veçantë” që do të mbahet po ashtu në amfiteatrin veror me fillim në ora 18:00, ngjarje kjo që u kushtohet fëmijëve me nevoja speciale dhe që ka edhe karakter humanitar.

Shërbimi për informim

“Dance ballet” bashkoi fëmijët e çerdheve të Gostivarit

24.07.2018

Në kuadër të Verës kulturore në Gostivar e cila mbahet nën moton Mirë se vini mërgimtarë”, dje u realizua Dance ballet për fëmijë, ku performuan fëmijët që frekuentojnë çerdhet publike në komunën e Gostivarit, si dhe çerdhen private “STAR”, të të gjitha nacionaliteteve.

Mysafir special në këtë event ishte Lina Demiri – fituese e disa çmimeve në Festivale të këngës për fëmijë, ndërsa performoi edhe grupi i baletit Dance studio i udhëhequr nga Sarita Selmani.

Për argëtim më të mirë të fatosave gostivaras, në event u paraqitën edhe disa maskota: Elsa, Kluoni dhe Pirati Xhimi.

Në kuadër të Ditëve të Mërgimtarëve, do të mbahet edhe një event tjetër për fëmijë, ndërsa sonte në program është Koncerti me ilahi, që do të realizohet në amfiteatrin e hapur në Gostivar me fillim në ora 20:30.

Shërbimi për informim

Fushata senzibilizuese “Ti je një luledielli“ edhe në Gostivar

24.07.2018

Prezantuesja e njohur shqiptare Albana Osmani, udhëheqëse e fushatës senzibilizuese “Ti je një luledielli”, ishte në vizitë në Komunën e Gostivarit me ç’rast u prit nga kryetari i komunës së Gostivarit, Arben Taravari dhe anëtarët e kabinetit të tij.

“Jam krenarе që Gostivari bëhet pjesë e kësaj fushate senzibilizuese dhe ftoj qytetarët e Gostivarit në përgjithësi dhe biznesmenët në veçanti, që t’i bashkëngjiten kësaj nisme. Uroj që kjo iniciativë të ketë sukses dhe së shpejti ky mision të shtrihet edhe në Gostivar dhe në Maqedoni dhe tu ndihmohet fëmijëve që vuajnë nga sëmundjet e gjakut. I dimë kushtet shumë të dobëta në të cilat trajtohen fëmijët me sëmundje të këtij lloji, si në vendin tonë ashtu edhe në shtetet e rajonit, andaj mendoj se ky mision duhet të përkrahet dhe të zgjerohet që këtyre fëmijëve tu mundësohet një trajtim adekuat mjekësor”, theksoi Taravari.

Albana Osmani theksoi se është e kënaqur me rrjedhën e kësaj fushate në Maqedoni dhe se është shumë e lumtur që në stafin e saj ka edhe një person nga Gostivari.

“Do të përpiqemi të bëjmë gjithçka nga ana njerëzore, ndërsa pjesa tjetër le të mbetet në duart e Zotit. Do të ftoja qytetarët e Gostivarit të porosisin nga një bluzë dhe të kontribuojnë për të ndihmuar këta fëmijë. Kontributi juaj do të shkojë qind për qind për këta fëmijë”, theksoi Albana Osmani.

Bluza të fushatës senzibilizuese “Ti je një luledielli“ mund të porositen në zyrën e Agram Construction në Gostivar.
Kryetari i komunës së Gostivarit, Arben Taravari bleu fanelle për administratorët komunalë, duke përkrahur kështu këtë nismë dhe duke inkurajuar qytetarët e Gostivarit që edhe ata të kontribuojnë në kë të drejtim. Mjetet e grumbulluara shkojnë për trajtimin mjekësor të fëmijëve të prekur nga sëmundjet e gjakut, kanceri dhe leukemia që trajtohen në Klinikën e Onkologjisë pranë Qendrës Klinike Universitare “Nënë Tereza” – Shkup.

Shërbimi për informim

Gjatë fundjavës, në Gostivar u realizuan dy aktivitete në kuadër të “Ditëve të Mërgimtarëve”

23.07.2018

Edhe fundjava që lamë pas kaloi në shenjën e manifestimit “Ditët e Mërgimtarëve” në organizim të Komunës së Gostivarit dhe me mbështetje të Ministrisë së Kulturës.

Të shtunën në Qendrën për Kulturë u shfaq premiera e filimit të metrazhit të shkurtër “Real firends” (Shokët e vërtetë) në regji të regjisorit të ri gostivaras Alban Fetai, kun ë rolij kryesor u shfaq aktori I mirënjohur kosovar Çun Lajçi. Premierën e ndoqën minsitri I cultures Asaf Ademi, zëdhënësi i Komunës së Gostivarit Jasin Demiri, myftiu i Gostivarit Shqair ef. Fetahu dhe personalitete të tjera nga jeta shoqërore.

E diela ishte e rezervuar për argëtimin e të rinjve. Në amfiteatrin veror te shëtitorja e lumit Vardar, u organizua një Aheng multietink (Multiethnic Party), ku dixhejë të nacionaliteteve të ndryshme bënë muzikë për të argëtuar rininë e Gostivarit.

Dita e sotme u kushtohet fëmijëve. Në ora 18:30, në amfiteatrin veror do të organizohet “Dance ballet me fëmijë”.

Shërbimi për informim

Kryetari Taravari priti anëtarët e AKVP Besa, i përgëzoi për prezantimin e suksesshëm në Festivalin në Koxhaeli të Turqisë

20.07.2018

Kryetari i komunës së Gostivarit, Arben Taravari priti sot në kabinetin e tij anëtarët e Ansamblit “Besa” nga Gostivari, të cilët më 14 dhe 15 korrik, morën pjesë në Festivalin “Vlerat e Harruara” në komunën Kartepe të krahinës Koxhaeli të Turqisë.

Kryetari i Ansamblit, Imran Miniri dhe koreografi Dilaver Sulejmani, njoftuan kryetarin Taravari se kanë pasur një paraqitje të mirë në këtë festival, ku janë shfaqur me dy valle dhe me dy këngë popullore. Ata falënderuan kryetarin Taravari për mbështetjen materiale të deritashme për realizim të aktiviteteve të parapara, e sidomos përshëndetën gatishmërinë e tij që mbështetja të jetë e vazhdueshme dhe akoma më e madhe, dhe se kjo për ta është një stimul që sa më shumë të kontribuojnë për kulturën shqiptare në Gostivar.

Duke i përgëzuar për punën që bëjnë, kryetari Taravari tha se “Besa” ka qenë dhe vazhdon të mbetet një emblemë e Gostivarit dhe se ajo u takon të gjithë gostivarasve, andaj duhet që të gjithë së bashku t’ia kthejmë shkëlqimin që e ka pasur dikur.

Më gëzon fakti që shumica e anëtarëve janë të rinj, dhe se Besa do të vazhdojë të jetojë brez pas brezi dhe të kultivojë vlerat kulturore artistike të shqiptarëve të Gostivarit e më gjerë. Do ta keni përkrahjen time të vazhdueshme gjatë gjithë mandatit, dhe shpresoj se edhe të tjerët të cilët do të vijnë në krye të Komunës, do të vazhdojnë ta mbështesin Besën edhe materialisht edhe moralisht, sepse Besa është e të gjithë neve”, theksoi kryetari Arben Taravari.

Kryetari i AKVP “Besa”, Imran Miniri , ia dorëzoi kryetarit Taravari Mirënjohjen e ndarë për Komunën e Gostivarit nga organizatorët e festivalit në Koxhaeli, ndërsa të gjithë anëtarët bënë fotografi të përbashkëta me kryetarin Taravari duke mbajtur në dorë mirënjohjet për pjesëmarrje në festival dhe Pllaketën për performancë të suksesshme.

Shërbimi për informim

Përzgjidhet projekti më i mirë ideor për ndërtimin e akua-parkut në Gostivar

20.07.2018

Në përputhje me konkursin e shpallur përmes sistemit elektronik për prokurime publike, në të cilin kërkohej zgjidhje ideore për ndërtimin e një akua-parkut me përmbajtje përcjellëse, një komision i veçantë pranë Komunës së Gostivarit, si zgjidhje më e mirë ideore upërzgjodhi projektin e Shoqërisë për arkitekturë, urbanizëm dhe inxhinieri Tetrakstis Kristijkan Shpknjp eksport-import Shkup.

Me realizimin e këtij projekti, Gostivari në një të ardhme të afërt do të ketë në dispozicion sipërfaqe ujore prej mbi dy mijë metra katrorë.

Në projekt është planifikuar që akua-parku të ketë pishina, toboganë spiral, toboganë të shpejtë, pishinë me valë, lumë përtac, pishinë të cekët për fëmijët deri më katër vjeç dhe pishinë për fëmijë të moshës prej 4 deri më 14 vjeç.

Ndërtimi i akua-parkut do të jetë ekonomik dhe nuk do ta ngarkojë buxhetin komunal pasi që i gjithë realizimi do të jetë sipas parimit të partneritetit publiko-privat.

Krahas mjediseve teknike, parkingut, zhveshtoreve dhe tualeteve, në këtë kompleks do të funksionojnë një restorant dhe një kafiteri.

Lokacioni është Bllokun Urban 16 në zonën e cila është e dedikuar për aktivitete sportive dhe rekreative, ku tashmë ekzistojnë terrene sportive, përkatësisht në bregun e djathtë të lumit Vardar në lagjen Dutllëk ndërmjet dy stadiumeve të futbollit.
Prtet që projekti në fjalë të realizohet gjatë vitit 2019.

Shërbimi i informacionit

Koncert multietnik në kuadër të Ditëve të Mërgimtarëve

18.07.2018

Mbrëmë në amfiteatrin e hapur pranë lumit Vardar në Gostivar, u mbajt një koncert multietnik me këngë zbavitëse.

Aktiviteti u realizua në kuadër të Ditëve të Mërgimtarëve nën moton “Mirë se vini mërgimtarë” e që realizohet nën patronazhin e kryetarit të Komunës së Gostivarit dhe me mbështetje edhe të Ministrisë së Kulturës.

Nën moderimin e këngëtarit të njohur gostivaras Ardit Stafai, në koncert performuan Da Lee&Band, Ebrar Mazar, Kristijan dhe Sepçe Ismaili, repektivisht nga një këngëtar shqiptar, turk, maqedonas dhe rom.

“Qëllimi i këtij koncerti është që krahas asaj që mërgimtarëve tua bëjmë sa më të pasur jetën kulturore-zbavitëse derisa qëndrojnë në vendlindje, edhe të kultivojmë dhe promovojmë respektin e ndërsjellë dhe bashkëjetesën ndërmjet grupeve të ndryshme etnike që jetojnë në territorin e komunës së Gostivar, e që është ndër shenjat dalluese të këtyre hapësirave ndër shekuj”, theksoi Jasin Demiri – një nga koordinatorët e manifestimit Ditët e Mërgimtarëve.

Shërbimi për informim

 

Sanohen rrugët e dëmtuara në fshatin Forinë

19.07.2018

Në vazhdën e aktiviteteve për sanimin e rrugëve të dëmtuara në territorin e komunës së Gostivarit, Ndërmarrja publike “Komunalec” – Gostivar, po bën sanimin e rrugëve në brendi të fshatit Forinë.

Krahas arnimit të pjesëve të dëmtuara të asfaltit nëpër rrugët e fshatit, bëhen edhe intervenime të caktuara në rrugën rajonale Gostivar-Çegran në pjesën që kalon përgjatë fshatit Forinë.

Nga kjo ndërmarrje njoftojnë se do të intervenohet edhe në lagjen Tullana të Gostivarit, ku po ashtu ka pjesë të dëmtuara të asfaltit, ndërsa në pjesët tjera të qytetit sanimi i rrugëve, respektivisht mbushja dhe arnimi i gropave goditëse, do të vazhdojë pas kthimit të mërgmitarëve tanë në shtetet evropiane, kur edhe ulet fluksi i komunikacionit.

Shërbimi për informim

 

U shfaq komedia “Ëndrra e shtatë studentëve”, shkëlqyen aktorët e rinj

18.07.2018

Mbrëmë në Qendrën për Kulturë në Gostivar, u shfaq komedia “Ëndrra e shtatë studentëve” regji të regjisorit të njohur nga Kërçova Qëndrim Riani, ndërsa rolet i interpretuan aktorët e sapodiplomuar të artit dramatik pranë Universitetit të Tetovës.

Komedia e bazuar në romanin e William Shakespeare “Ëndrra e një nate vere”, ishte pjesë e agjendës së aktiviteteve në kuadër të manifestimit “Ditët e mërgimtarëve” që realizohet nën patronazhin e kryetarit të komunës së Gostivarit, Arben Taravari dhe me mbështetje edhe të Ministrisë së Kulturës

Duartrokitjet e shumta dhe të qeshurat e vazhdueshme të publikut, ishin vlerësimi më i mirë për cilësinë e komedisë dhe talentin e aktorëve të rinj profesionist nga Gostivari Tetova dhe Kumanova: Ajshe Useini, Abduallah Osmani, Sabina Memishi, Taulant Destani,, Faton Ibrahimi dhe Shpresa Hashimi, të cilët në shumë raste improvizuan me qëllim që humori i tyre t’i përshtatet publikut gostivaras, me ç’rast me aktrimin dhe improvizimet shkëlqeu aktorja nga Gostivari, Ajshe Useini.

Sot në agjendën e “Ditëve të Mërgimtarëve” është Koncerti Multietnik që do të mbahet në amfiteatrin e hapur në shëtitoren e lumit Vardar, me fillim në ora 19:00.

Shërbimi për informim

Në Gostivar do të hapet Qendër për Aktivitete Rinore

Nënshkruhet Memorandumi për Bashkëpunim me organizatë Democracy Lab

18.07.2018

Kryetari i Komunës së Gostivarit, Arben Taravari dhe drejtori ekzekutiv i Organizatës joqeveritare Democracy Lab, Sefer Selimi, nënshkruan Memorandum bashkëpunimi që synon hapjen e një Qendre për Aktivitetet Rinore në Gostivar.

Projekti do të implementohet nga ana e Democracy Lab ndërsa do të financohet nga Komuna e Gostivarit dhe Ambasada e SHBA-ve në Shkup.

Qendra në fjalë synon thellimin e bashkëpunimit dhe mirëbesimi ndërmjet komuniteteve të ndryshme që jetojnë në Gostivar, do të thyhen paragjykimet dhe do të promovohet multietniciteti.

Pas nënshkrimit të Memorandumit, kryetari i komunës së Gostivarit Arben Taravari tha se kjo nismë fisnike meriton të përkrahet.

“Fillimisht kjo Qendër do të kofinancohet nga Democracy Lab dhe Komuna e Gostivarit, ndërsa pas disa vitesh do të vazhdojë të financohet nga Komuna e Gostivarit”, theksoi Taravari.

Ndërkaq, Sefer Selimi – drejtor ekzekutiv i Democracy Lab sqaroi se në kuadër të Qendrës do të iniciohen programe, trajnime dhe kurse të ndryshme me qëllim të krijimit të një gjeneratave të re të qytetarëve aktivë të cilët do të jenë të aftë të njohin të drejtat dhe përgjegjësitë e tyre si qytetarë.

Qendra për Aktivitetet Rinore, selinë do ta ketë në rrugën që çon për te spitali i përgjithshëm në Gostivar.

Shërbimi për informim