Kryetari Arben Taravari vizitoi shoqatën e personave me shikim të dëmtuar “Realiteti” nga Gostivari

20.01.2018

Kryetari i komunës së Gostivarit, Arben Taravari me bashkëpunëtorët e tij vizitoi Shoqatën e personave të verbër dhe me shikim të dëmtuar “Realiteti”. Fillimisht, kryetari i shoqatës Xhevat Fejzuli, falënderoi kryetarin Taravari që personalisht kërkoi të takojë anëtarët e kësaj shoqate, ndërsa më pas e njoftoi atë me aktivitetet që i zhvillon, si dhe me sfidat me të cilat ballafaqohet kjo shoqatë.

“Jemi një organizatë joqeveritare e cila nuk financohet nga shteti, por falë angazhimit tonë dhe njerëzve të vullnetit të mire, arrijmë që të realizojmë disa aktivitete të vogla dhe të ndihmojmë që anëtarët tanë të përballojnë sfidat e jetës. Shoqata jonë numëron 62 anëtarë dhe ne kemi një plan-program vjetor mjaft modest, me disa aktivitete të cilat nuk janë shumë të kushtueshme”, njoftoi Fejzuli kryetarin Taravari.

Ai falënderoi edhe drejtorin e ri të NP Komunalec, Isak Lazami, ku është e vendosur selia e kësaj shoqate, që ka mundësuar ata të shfrytëzojnë ngrohjen qendrore dhe se tregon interesimi për t’i ndihmuar ata.

Kryetari Taravari, kërkoi që të gjithë anëtarët e pranishëm të shpalosin problemet e tyre dhe lirshëm të kërkojnë ndihmë për çfarëdo kërkese të tyre.

“Jo vetëm kërkesat të cilat tani do t’i shpalosin këtu, por cilado qoftë nevojë që do t’ju paraqitet, lirisht na kontaktoni, qoftë mua si kryetar, qoftë shërbimet komunale, por edhe drejtorin e ndërmarrjes. Për gjithçka që është e mundur në kuadër të kompetencave tona, do t’ju ofrohet ndihmë. Do t’ju asistojmë me material zyre dhe me mbështetje tjetër logjistike. Do të angazhohemi që të organizojmë seminare dhe punëtori me profesionistë që merren me trajtimin e personave me shikim të dëmtuar. Në bashkëpunim edhe me sektorin privat do të mundësojmë të mbani edhe manifestime të ndryshme për të cilat ju do të shfaqni interesim”, theksoi Taravari.

Ndër kërkesat e anëtarëve të shoqatës ishin ato që personat me shikim të dëmtuar të lirohen nga pagesa e ujit, të vihet rend në trafik për të mos parkuar automjetet nëpër trotuare, ulja e tehoreve të trotuareve te kalimet për këmbësorë, ndërtimi rampave qasëse për personat me invaliditet, transport publik falas dhe kërkesa të tjera mjaft racionale.

Kryetari Taravari i siguroi ata se do të angazhohet që për të gjitha këto, në bashkëpunim edhe me Këshillin e Komunës dhe me institucionet tjera shtetërore, si dhe me sektorin privat, të gjendet një zgjidhje dhe të përmirësohet cilësia e jetës të personave me shikim të dëmtuar, por edhe të gjithë personave tjerë me nevoja speciale.

Shërbimi për informim

Shkollat komunale të Gostivarit, të përgatitura për gjysëmvjetorin e dytë

19.01.2018

Të gjitha shkollat fillore dhe të mesme komunale, fillimin e gjysëmvjetorit të dytë e presin të përgatitura. Te të gjitha shkollat është bërë pastrimi gjeneral, ndërsa në disa shkolla janë bërë edhe riparimet dhe intervenimet e domosdoshme.

Shkollat janë pastruar dhe riparuar varësisht nga nevoja dhe të gjitha janë të funrizuara me lëndë djegëse. Kështu që mund të themi se të përgatitur e presim fillimin e e gjysëmvjetorit të dytë. Nga ana tjetër, është bërë edhe përzgjedhja e mësimdhënësve sipas konkurseve të shpallura, me ç’rast jemi përpjekur që të mbajmë një kontinuitet të kuadrit arsimor dhe ta depolitizojmë arsimin në shkallë sa më të lartë. Përzgjedhja e kuadrove është bërë nga vetë kolektivi dhe këshillat e shkollave, ndërsa ne si komunë jemi përpjekur që të ndihmojmë në këtë proces. Është evidente se diku edhe ka lëshime, por shpresojmë që ato në të ardhmen të jenë sa më të pakta”, thekson udhëheqësja e Sektorit për arsim pranë Komunës së Gostivarit, Aslian Snopçe.

Ndryshe, sot u realizua një takim me drejtorët dhe zëvendësdrejtorët e shkollave fillore dhe të mesme komunale, me ç’rast ata morën instruksionet e nevojshme për punë, si dhe shpalosën nevojat për mbarëvajtje sa më të mirë të procesit edukativo-arsimor.

Shërbimi për informim

Kryetari Taravari në mbështetje të zhvillimit të çiklizmit në Gostivar

19.01.2018
Kryetari i komunës së Gostivarit Arben Taravari, takoi përfaqësuesit e Klubit të Çiklistëve “Adrenalin” nga Gostivari, me ç’rast u njoftua me aktivitete dhe sukseset e tyre.

Nënkryetari i KÇ “Adrenalin” Shpend Kalisi, e njoftoi kryetarin Taravari se ky klub tubon rreth vetes shumë anëtarë, në mesin e të cilëve ka edhe pjesëtarë të moshave më të reja, të cilët tashmë pas vetes kanë rezultate kulminante në nivel shtetëror. Me këtë rast ai veçoi rezultatet në nivel shtetëror të grupmoshës U13, kampionin Xhemaletin Qorbajrami dhe nënkampionin Daim Muharemi. Ajo që posaçërisht i bën ata krenarë është Ybejda Deva. si vajza e vetme në Maqedoni e cila garon në konkurrencë me meshkuj, po ashtu për grupmoshën U 13.

Kryetari Taravari i përgëzoi përfaqësuesit e KÇ “Adrenalin”, sidomos kampionët e vegjël për përkushtimin e tyre dhe sukseset që po shënojnë, duke ripërsëritur qëndrimin e tij për mbështetje të shoqatave dhe klubeve që kontribuojnë në rritjen e cilësisë së jetës rekreativo-sportive në komunën e Gostivarit. Në këtë drejtim ai i siguroi se do të mbështesë organizimin e një gare çikliste në Gostivar, për të cilën gjë ata kanë shfaqur interesim.
Shërbimi për informim

“E vërteta për BDI-në” – keqpërdorime të shumta edhe në NP “Parkingje publike dhe gjelbërime” – Gostivar

18.01.2018

Në kuadër të fushatës “E vërteta për BDI-në”, përfaqësuesit e Ndërmarrjes publike “Parkingje publike dhe gjelbërime” – Gostivar, sot në një konferencë për shtyp shpalosën keqpërdorimet e bëra në këtë ndërmarrje nga udhëheqësia e kaluar.

Konferencën për shtyp jua përcjellim në mënyrë integrale.

“Në kuadër të fushatës te filluar nga kryetari Arben Taravari ‘’E vërteta për BDI-në ‘’ sot do të fokusohemi në Ndërmarrjen Publike ’’Parkingjet publike dhe gjelbërimi” – Gostivar.

Në bazë të revizionit të brendshëm në këtë ndërmarrje, janë konstatuar disa shkelje dhe parregullsi procedurale:

– Borxhe të trashëguara në vlerë prej 5.250.452.00 apo 85.500 euro, borxhe që kanë ngelur për shkak të investimeve joproduktive ose jokapitale, por vetëm ndaj firmave që kanë fituar tenderët. Tatimi personal i rrogave i papaguar nga janari e deri ne shtator të viti 2017 në vlerë prej 501.485,00 denarë, është lënë pas dore për arsye të panjohura edhe pse ka pas mjete të mjaftueshme për pagesën e së njëjjtës.

-Kontrata e lidhur për partneritet privato-publik për parkim zonal me ndërmarrjen Duna Kompjuters SHPK Shkup e lidhur më datë 14.11.2014 me NP Komunalec dhe me aneks kontratën që ka trashëguar kjo ndërmarrje e lidhur me datë 06.10.2015 ku në këtë kontratë në nenin 9 është paraparë ndarja me 62% neto për Ndërmarrjen Publike dhe 38% neto për Duna Kompjuters SHPK, por gjatë gjithë kohës ndarja është bërë në bruto për arsye që nuk i dimë dhe nga kjo është dëmtuar buxheti i ndërmarrjes me nga 300.000 den (5000 euro) për çdo muaj që kanë shkuar në favor të Duna Kompjuters. E njëjta kontratë është nënshkruar nga vetë Ndërmarrja dhe është bërë shkelje nga e njëjta. Ne punojmë për eliminimin e këtyre parregullsive.

– Derisa në kuadër të Ndërmarrjes Publike funksionon edhe sektori për gjelbërimit (dhe kemi të sistemuar punëtor dhe posedojmë të gjitha mjetet e nevojshme për kryerjen e veprimtarisë për mirëmbajtjen e hapësirave të gjelbërimit) edhe pse posedojmë mjetet e nevojshme dhe punëtor, është hapur tender nga ana e ndërmarrjes publike për rregullimin hortikulturor dhe mirëmbajtjen e hapësirave të gjelbërimit, dhe e ka fituar një firmë private në vlerë prej 1.638.152 denarë më datë 24.04.2017, prej të cilave 638.152 denarë kanë qenë për furnizime dhe 1.000.000 denarë kanë qenë për mirëmbajtjen e hapësirave publike me gjelbërim, nga ku do të veçojmë se është fakturuar prerja e një druri për 15.500 denarë. Këtu është dëmtuar buxheti i NP diku rreth 1.000.000 denarë.

– Në parkingjet e tipit të mbyllur është punuar me bileta në dorë dhe pa llogari fiskale. Sa për krahasim, të hyrat mujore nga këto parkingje kanë qenë me një mesatare prej 15.000.00 denar,, ndërsa tani gjithçka është e fiskalizuar dhe të hyrat reale të atij parkingu janë me sa vijon: Nga 16 nëntori, dmth në gjysmën e dytë të muajit kur detyrën e mori udhëheqësia e re aktuale, janë regjistruar të hyra 33.000,00 denarë, për muajin Dhjetor 100.000.00 denarë dhe deri këto dy javë të para të janarit më datë 16.01.2018 është 129.290.00 denarë, që nënkupton se të ardhurat janë ritur për 660%. I mbetet ish drejtorit që të japë sqarim për se të hyrat kanë qenë aq të ulëta përderisa kapaciteti real i atyre parkingjeve flet ndryshe.”

Shërbimi për informim

Taravari: “BDI dhe LSDM nuk u solidarizuan, por vetëm zvoglëuan mjetet e buxhetit për një të tretat”

18.01.2018

Kryetari i komunës së Gostivarit, Arben Taravari në një prononcim për mediat në lidhje me konvokimin e seancës së Këshillit të Komunës së Gostivarit ku do të merret vendim për financim të përkohshëm, sqaroi se BDI dhe LSDM nuk janë solidarizuar me administratorët komunalë dhe punonjësit e arsimit, por se vetëm kanë kryer një obligim ligjor, e në fakt me vednimin e këtillë ata vetëm se për një të tretat zvogëlojnë mjetet e buxhetit për tremujorin e parë.

“Lexova një lajm prej BDI-së se ata paskan vendosur që të ndihmojnë procesin. Kjo nuk është e vërtetë, është obligim ligjor që në afat prej 15 ditësh pas marrjes së shkresës nga ana ime, të cilën ia dërgova më 4 janar, që ta kalojnë në këshill financimin e përkohshëm. Ata e prolonguan aq sa kanë mundur, pra, konvokuan seancën që ajo të mbahet më 24 janar me të vetmin qëllim që t’i bllokojnë deri në ditën e fundit të mundshme të gjitha proceset. Përndryshe, financimi i përkohshëm është dëmi më i madh që mund ta bëjnë ata si shumicë në Këshillin e Komunës së Gostivarit. Kjo shumicë prej 16 këshilltarësh nuk pranuan as të diskutohet mbi buxhetin. Do ta kisha pranuar sikur ata ta diskutonin buxhetin, por le ta dinë qytetarët e Gostivarit se ata asnjë mëshirë nuk bëjnë për të zhbllokuar diçka por thjeshtë bëjnë diçka që janë të detyruar ligjërisht ta bëjnë, ndërsa efektet negative nga ky vendim janë zvogëlimi i buxhetit për një të tretën e parave që mund t’i shfrytëzojmë si komunë”, theksoi kryetari Taravari.
Kryetari i komunës së Gostivarit tha se e vetmja arsye për këtë është se ata donë që të tregojnë se kinse askush tjetër nuk di të qeverisë përveç BDI-së dhe LSDM-së, e të cilët, në fakt, në politikën e Gostivarit tashmë i takojnë historisë.

Në pyetjen gazetareske nëse vallë qëllimi është që të shkohet në zgjedhje të jashtëzakonshme për këshill, Taravari u përgjigj se ai është i gatshëm dhe se i sfidon ta bëjnë një gjë të tillë, por se ata nuk pranojnë.

Kryetari Taravari, po ashtu, ceku se këshilltari nga radhët e LSDM-së e ka apostrofuar atë si frenuesin kryesor, me pretekstin se nuk ka planifikuar në buxhet mjete për varrezat ortodoske. “Ai këtë mund ta kërkonte sikur të diskutohej në seancë dhe nëse kërkesa do të ishte e arsyeshme, me siguri se do të pranohej”, potencoi Taravari.

Do të doja të përmendja me këtë rast,vazhdoi Taravari, se deri më tani për rreth dy muaj e gjysëm ne kemi arritur që të paguajmë gati se 400 mijë euro (rreth një të pestat e borxhit të Komunës, pa ndërmarrjet publike), por kjo dikujt i pengon dhe përmes zvogëlimit të buxhetit për një të tretat deri më 31 mars, ata duan që të na pengojnë në shënimin e rezultateve të mëtejshme.

Në pyetjen gazetareske se si i komenton akuzat nga ana e BDI-së pas çdo zbardhje të së vërtetës për BDI-në se ai duhet të fillojë të punojë, Taravari me përgjigje:

“Ne vazhdimisht punojmë dhe pjesë nga ajo që punojnë edhe e bëjmë publike, për t’i informuar qytetarët, paguajmë borxhe dhe me këtë tempo duhet të arrijmë që t’i paguajmë për një deri një vjet e gjysëm t’i paguajmë borxhet. Kur e bëjmë këtë ata na akuzojnë se bëjmë publicitet. Ne do vazhdojmë të zbardhim të gjitha abuzimet e bëra, sepse mendojmë se këtë ua kemi borxh qytetarëve të dinë se si janë harxhuar mjete e tyre. Ne duam që kjo të mbetet traditë dhe garniturat e ardhshme udhëheqëse të zbardhin punën tonë. Andaj, na mbetet neve si udhëheqësi komunale, mua personalisht dhe drejtorëve që të punojmë ndershëm, sepse do to vijë dita kur do të duhet të përgjigjemi nëse do të kemi keqpërodur detyrën”.

Shërbimi për informim

Në tre shkolla të Gostivarit do të mund të zbatohet “Koncepti për Arsim Ndërkulturor”

17.01.2018

Qendra e Dialogut Nansen Shkup, e shpalli listën e model-shkollave potenciale në të cilat do të zbatohet Koncepti për Arsim Ndërkulturor.

Thirrja publike u shpall nga ana e Qendrës së Dialogut Nansen Shkup në bashkëpunim me Ministrinë e Arsimit dhe Shkencës me qëllim të përzgjedhjes së 3 model-shkolla të reja. Në fazën e mëtejshme të selektimit do të shqyrtohen gjithsej tri shkolla fillore dhe të mesme në nivel shtetëror, prej të cilave një shkollë fillore dhe dy shkolla të mesme të komunës së Gostivarit.

“Shkolla Fillore Bahskimi do ta ketë mundësinë që të përfshihet në programet e Qendrës për trajnim Nansen dhe në realizimin e aktiviteteve të projektit duke aplikuar modelin Nansen. Ndërsa shkolla e mesme teknike dhe gjimnazi, në fazën e ardhshme do të vizitohen nga ana e Qendrës Nansen për të verifikuar informacionet dhe plani askional të cilat janë pjesë e aplikacionit, dhe në bazë të të cilave do të merret vendimi përfundimtar për përzgjedhjen e model-shkollave” thotë udhëheqësja e Sektorit të Arsimit, Aslian Snopçe.

Komuna e mbështet plotësisht arsimin ndërkulturor dhe do të bëjë gjithçka brenda mundësive të veta për realizimin e suksesshëm të këtij projekti në shkollat ​​fillore dhe të mesme publike në komunën e Gostivarit.

Shërbimi për informim

Tamponohet një rrugë në lagjen Mllaki

15.01.2018

Ndërmarrja publike “Komunalec” është duke realizuar një projekt në lagjen Mllaki, ku bëhet nivelimi dhe tamponimi i një rruge.

Kjo rrugë është me gjatësi prej 180 metrash dhe me gjerësi prej 3,5 metrash. Banorët e kësaj lagjeje ballafaqoheshin me baltë dhe pluhur, dhe ishte kërkesë e tyre që të intervenohet si një zgjidhje e përkohshme duke e shtruar me tampon këtë rrugë”, thekson drejtori i NP “Komunalec” – Gostivar, Isak Lazami.

Projekti në fjalë financohet në tërësi nga ana e NP “Komunalec”.

Shërbimi për informim

Kryetari Arben Taravari vizitoi Forinën – paralajmëron fillimin e realizimit të dy projekteve kapitale

12.01.2018

Kryetari i komunës së Gostivarit, i shoqëruar nga bashkëpunëtorët e tij, vizitoi sot fshatin Forinë, me ç’rast pas faljes së namazit të xhumasë, bashkëbisedoi me banorët e këtij fshati.

Siç e dini, rregullisht ditëve të marta pranoj qytetarë në zyrë, ndërsa prej sot fillojmë që çdo të premte të vizitojmë fshatra dhe lagje të ndryshme të komunës së Gostivarit, për të bashkëbiseduar me banorët lokalë në lidhje me të gjitha premtimet e dhëna para dhe gjatë fushatës. Do t’i regjistrojmë edhe një herë ato dhe do të shqyrtojmë shohim se çka dhe si do të mund ta realizojmë, respektivisht do të ndërmarrim hapa konkrete për realizimin e tyre”, theksoi Taravari.

Banorët e fshatit Forinë e njoftuan kryetarin e komunës në lidhje me problemet e natyrave të ndryshme me të cilat ata ballafaqohen.

Prej sfidave me të cilat do të ballafaqohemi për përmirësimin e cilësisë së jetës dhe zhvillimit lokal në fshatin Forinë, prioriteti do t’i japim rikonstruimit të rrugës Çajlë -Forinë. Realizimi i punëve ndërtimore në këtë aks rrugor do të fillojë shumë shpejtë, dhe kjo në saje të një granti. Ndërsa prioriteti i dytë, është është asfaltimi i një rruge në brendi të fshatit Forinë”, informon kryetari Taravari.

Kryetari i komunës së Gostivarit, po ashtu bëri me dije se të premten tjetër do ta vizitojë Lagjen e Re në qytetin e Gostivarit. Ndërsa pas dy javësh do të takojë banorët e fshatit Banjicë e Epërme.

Vizitat e këtilla do të realizohen kryesisht pas faljes së namazit të xhumasë.

Shërbimi për informim

Hapa konkrete për ndërtimin e rrugëve lokale në Tërnovë dhe Padalisht

11.01.2018

Kryetari i komunës së Gostivarit, Arben Taravari dhe Besim Dogani – udhëheqës i Zyrës për zhvillim ekonomik lokal, realizuna sot një takim pune me konsulentët Edin Mehmeti dhe Aleksandar Ivanovski.

Në takimin me konsulentët për mbikëqyrjen e projekteve të BE-së në kuadër të komponentit IPA, u bisedua në lidhje me dy projekte të rëndësishëm që duhet të realizohen në komunën e Gostivarit nëpërmjet EU IPA grantit, respektivisht ndërtimi i rrugëve lokale në fshatrat Padalisht dhe Tërnovë

Me ndërtimin e këtyre rrugëve synohet që në këtë pjesë të Malësisë së Gostivarit të krijohet biznes klimë e volitshme për zhvillim të agrikulturës, bujqësisë, pylltarisë dhe cilësisë së furnizimit me ujë, si dhe zhvillimit të turizmit dhe hotelierisë rurale.

Vlera e projektit për rrugët në fjalë pa TVSH është 7.314.814,80 denarë, në kundërvlerë 118.940 euro, ndërsa financimi bëhet tërësisht përmes EU IPA grantit.

Ndërtimi i këtyre rrugëve lokale në Tërnovë dhe Padalisht, është pjesë e programit zhvillimor të komunës së Gostivarit, të gjitha procedurat janë përfunduar, ndërsa punët ndërtimore do të nisin në pranverën e këtij viti.

Po ashtu, përfaqësuesit e ZHEL informuan konsulentët se në kuadër të projektit të dytë për përmirësimin e shërbimeve komunale MSIP 2 të shpallur nga Ministria e Financave, komuna tashmë ka dorëzuar projektet “Asfaltimi i rrugëve lokale f. Forinë – Çajlë e Vjetër” dhe “Ndërtimi i rrugës lokale në fshatin Turçani i Vogël deri në f. Turçan i Madh”, me vlerë 16,400.000,00 denarë.

Shërbimi për informim

Fushata “E vërteta për BDI-në”, zbardhen keqpërdorimet në NP “Komunalec” – Gostivar

11.01.2018

Udhëheqësit e Ndërmarrjes publike “Komunalec”, mbajti sot konferencë për shtyp me ç’rast në kuadër të fushatës “E vërteta për BDI-në”, shpalosi një pjesë të keqpërdorimeve të bëra në mandatin e shkuar nga kuadrot e BDI-së.
“Do t’ju njoftojmë sot vetëm me keqpërdorimet që janë bërë në Njësinë punuese Mekanizimi, ndërsa me keqpërdorimin në njësitë tjera të ndërmarrjes komunale do t’ju njoftojmë në press konferencat e radhës”, theksoi zëdhënësi i kësaj ndërmarrjeje Mirtezan Selimi.

Ai numëroi 13 keqpërdorime të bëra të cilat i ka konstatuar revizioni i brendshëm, dhe të cilat i dëshmojnë edhe vetë të punësuarit në këtë njësi të ndërmarrjes.
“Mungojnë thika për pastrim të borës, të cilat me dijeninë e ish udhëheqësisë së Komunës i ka marrë një firmë e afërt me ta. Një traktor për pastrimin e borës me gjithë thikën është marrë me urdhrin e ish drejtorit dhe tani gjendet në punëtorinë për mekanizmin në fshatin Zdunjë. Dy muaj para zgjedhjeve lokale është shitur një buldozer në gjendje të rregull i markës Tege Dreser. Një javë para zgjedhjeve është shitur edhe një eskavator ICB, ndërsa ish shoferi i drejtorit të ndërmarrjes ka marrë një kiper të markës Mercedes”, njoftoi Selimi.

Më pas ai njoftoi edhe për marrjen e automobilit Volvo në gjendje të rregullt të cilin po ashtu e ka shfrytëzuar një vjet e gjysëm ish shoferi i drejtorit, ndërsa e ka kthyer vetëm guacën (karrocerinë).
“Mungon edhe automobili Mercedes me ngjyrë të verdhë dhe një automobil i markës Honda Akord për të cilët nuk kemi dijeni se ku gjenden. Ndërsa një veturë Lada edhe sot e kësaj dite gjendet te një ish i punësuar në fshatin Reçan”, nënvizoi Selimi.

Ai më pas numëroi edhe disa makina pune, pronë e kësaj ndërmarrjeje, të cilat po ashtu mungojnë ose janë dhuruar në mënyrë të paligjshme.
“Makinën për shenjëzim të rrugëve e ka marrë ish udhëheqësi i Departamentit për komunikacion pranë Komunës së Gostivarit, kuadër i BDI-së. Po ashtu nuk kemi dijeni se ku gjendet freza për prerje të asfaltit, ndërsa mungojnë edhe mjete tjera pune për punë të përditshme. Në mënyrë të paligjshme, Stacionit të Policisë në Gostivar i janë dhuruar 29 piramida për bllokim të rrugës gjatë punimeve”, sqaroi Selimi.

Drejtori i ndërmarrjes, Isak Lazami njoftoi gazetarët se për momentin nuk mund të caktohet vlera e saktë për dëmin e shkaktuar, por se nga të dhënat e paraqitura, edhe vetë qytetarët mund të konstatojnë se bëhet fjalë për një dëm të madh, sidomos kur kihet parasysh gjendja e vështirë financiare-materiale e ndërmarrjes.

Lazami bëri po ashtu me dije se ata si ndërmarrje e kanë për obligim të detektojnë keqpërdorimet e bëra, ndërsa ftoi organet kompetente të hetuesisë dhe gjyqësisë që t’i kryejnë procedurat e mëtutjeshme në përputhje me ligjin.

Shërbimi për informim