Ekonomistët e rinj nga Gostivari në trajnim dyjavor në Zvicër

04.12.2017
Një grup prej gjashtëmbëdhjetë nxënësish dhe dy supervizorë nga Shkolla e Mesme Ekonomike “Gostivar” janë në trajnim dyjavor në Zvicër. Qëndrimi realizohet në kuadër të projektit Implementimi i Konventës për të Drejtat e Fëmijës, organizuar nga Koalicioni i organizatave rinore SEGA, në të cilin shkolla është përfshirë që nga viti 2012.

Në kuadër të këtij projekti në shkollë me sukses funksionon bashkësia e shkollës dhe Fëmija Avokat, që punojnë në mbrojtjen e të
drejtave të fëmijëve, kundër-diskriminimin dhe multikulturalizmin dhe përmirësimin e kushteve për realizimin e mësimit në shkollë.

Shkëmbimi ndërkulturor mbahet në fshatin e fëmijëve Pestalozzi, Trogen, ndërsa grupi i SHMEK “Gostivar” prej 16 nxënësve është zgjedhur si rezultat i punës së deritashme aktive”, informuar nga shkolla.

Qëllimi i shkëmbimit ndërkulturor studentët të fitojnë njohuri dhe aftësi për të drejtat e fëmijëve, parimet e dialogut ndërkulturor dhe komunikimit, anti-diskriminimit dhe mirëkuptim të ndërsjellë, respekt dhe vlerat e tolerancës mes kulturave të ndryshme.

Shërbimi për informim

Komuna e Gostivarit e shënoi Ditën ndërkombëtare të personave me nevoja speciale

04.12.2017

Me rastin e 3 dhjetorit – Ditës ndërkombëtare të personave me nevoja specialenjë delegacion i Komunës së Gostivarit vizitoi Qendrën ditore për përkujdesje të fëmijëve me nevojaspeciale dhe paralelen speciale në SHF “Ismail Qemali”, duke ndarë dhurata simbolike për fëmijët që i frekuentojnë ato.

Përgjegjësja e Sektorit për veprimtari publike, znj. Aslijan Snopçe tha se komuna e Gostivarit, ashtu siç dëshmoi që në ditët e para të këtij mandati, do të kujdeset në kontinuitet për këtë kategori personash dhe se  bashkëpunim të ngushtë me aktorët relevantë në shoqëri, do të mund të arrihet shumë në përmirësimnn e cilësisë së jetesës së personave me nevoja speciale, e sidomos fëmijëve.

Është kjo hera e parë që ne si përfaqësues të udhëheqësisë së re të Komunës së Gostivarit, e vizitojmë Qendrën ditore dhe paralelet për fëmijët me nevoja speciale. Ashtu siç dëshmuam që në ditët e para të mandatit, do të bashkëpunojmë ngushtë dhe në kontinuitet me të gjithë faktorët relevantë në shoqëri për përmirësimin e cilësisë së jetesës së personave me nevoja speciale. U ndamë dhurata simbolike fëmijëve dhe me këtë deshëm të dërgojmë mesazh se ata nuk janë harruar nga institucionet dhe se përkujdesja për ta do të jetë permanente”, deklaroi znj. Aslijan Snopçe.

Nga Qendra ditore për fëmijë me nevoja speciale, falënderuan përfaqësuesit e komunës për vizitën dhe mbështetjen, si dhe shprehën gatishmëri për bashkëpunim dhe organizim të aktiviteteve me mbështetje të Komunës së Gostivarit.

Në këtë drejtim, me iniciativë të Komunës së Gostivarit, së shpejti në Qendrën ditore do të organizohet një program kulturor-zbavitës.

Shërbimi për Informim

Kryetari Taravari do të mbajë fjalim në Samitin e Brukselit

23.11.2017

Kryetari i komunës së Gostivarit Arben Taravari do të marrë pjesë në Samitin vjetor evropian që do të mbahet më 5 dhe 6 dhjetor
në Bruksel. Në këtë Samit, kryetari Arben Taravari do të mbajë fjalim në temë “Ballkani Perëndimor në udhëkryq – Sfidat e reja, ndryshimi i dinamikës”.

Në Samitin e Brukselit, do të marrë pjesë edhe kryeministri i Shqipërisë, z. Edi Rama. Samiti organizohet në bashkëpunim me Konrad-Adenauer Stiftung, UNDP-në dhe United States European Comman (EUCOM) me mbështete të Këshillit Rajonal për Bashkëpunim (RCC), Komisioni Evropian dhe Rockefeller Brothers Fund.

Ndryshe, samiti mbahet në vigjilie të miratimit të strategjisë së re të Komisionit Evropian për zgjerim në rajon, i paraparë të mbahet në fillim të vitit 2018.

Shërbimi për informim

Takim informativ me drejtorët dhe ndihmës drejtorët e shkollave publike

01.12.2017

Në mjediset e Komunës së Gostivarit, përfaqësues të administratës komunale realizuan një takim informativ me drejtorët dhe ndihmës drejtorët e shkollave fillore dhe të mesme.

Në takim, drejtuesit e shkollave u infromuan në lidhje me mënyrën e financimit të shkollave, menaxhimin dhe hapat konkret që duhet ndërmarrë për mbarëvajtje sa më të sukseshme të procesit edukativo-arsimor dhe aktivitete jashtëmësimore.

Përgjegjësja për arsim pranë Komunës së Gostivarit, znj. Aslijan Snopçe i informoi të pranishmit se komuna do tu jep mbështetje maksimale institucioneve arsimore, por do të rrisë edhe kontrollin dhe do të kërkojë sukses në menaxhim.

Drejtorët e rinj do të kenë mbështetjen tonë të plotë, por do të duhet të bashkëpunojnë edhe me drejtorët e vjetër që të shfrytëzojnë përvojën e tyre. Do të përcillet vazhdimisht puna juaj dhe do të kërkohet rezultat konkret. Me përkushtim të udhëheqësive të shkollave, kuadrit arsimor dhe të punësuarve të tjerë, do të rritet edhe interesimi i prindërve dhe komunitetit që të ndihmohen shkollat për të krijuar kushte më të mira. Është me rëndësi që të mos bëhen shpenzime të kota dhe mjetet e kursyera të shfrytëzohen për investime apo aktivitete të dobishme”, theksoi znj. Snopçe.

Për mënyrën e financimit të shkollave, si dhe buxhetin për vitin 2017 dhe buxhetin që planifikohet për vitin 2018, të pranishmit i njoftoi përgjegjësi për financa pranë Komunës së Gostivarit, Sadri Elezi, i cili shprehu gatishmëri për bashkëpunim dhe asistencë shkollave për çdo informatë në lidhje me financat, ku së shpejti do të punësohet një ekonomist në Komunë, i cili do të merret ekskluzivisht me çështjen financiare të shkollave fillore dhe të mesme.

Përvoja pozitive nga menaxhimi i sukseshëm me institucione arsimore në vendet e zhvilluara, drejtuesve të shkollave u shpalosi Jasin Demiri.

Komuna e Gostivarit do t’i përkushtojë një rëndësi të veçantë arsimit, për këtë arsye edhe ka hapur një kënd të veçantë në web faqen zyrtare, respektivisht këndi “Departamenti i arsimit”.

Në këtë kënd të posaçëm të web faqes, do të jepen të gjitha informatat e nevojshme për shkollat e Gostivarit, andaj kërkojmë prej jush që të na njoftoni për çdo aktivitet në shkollën tuaj që ato t’i pasqyrojmë në faqen e internetit”, tha Agon Fejza, web administrator i faqes së Komunës.

Në fund të takimit, u zhvillua një bashkëbisedim i frytshëm ndërmjet drejtuesve të shkollave dhe përfaqësuesve të Komunës në drejtim të tejkalimit të problemeve.

Shërbimi për informim

NP “Komunalec”: Punohet intensivisht për tejkalimin e problemit me ujin e pijshëm në Debresh

01.12.2017

Si pasojë e rreshjeve të vërshueshme të shiut, sidomos gjatë natës së mbrëshme në rajoin e Pollogut, uji nga burimi, mbërrin i turbullt në rezervuarin nga i cili furnizohet një pjesë e fshatit Debresh.
Shkaku i kësaj, furnizimi me ujë për momentin është ndërprerë në këtë fshat, ndërsa ekipet mobile të NP “Komunalec”, me mbështjetje edhe të Qendrës Rajonale për Menaxhim me Kriza dhe Drejtorisë për Mbrojtje dhe Shpëtim, punojnë intensivisht në drejtim të tejkalimit sa më të shpejtë të problemit.

“Për shkak të natyrës së problemit, nuk mund të vlerësojmë me saktësi se sa kohë do të nevojitet për tejkalimin e tij. Por ne do të angazhohemi në maksimum që kjo të ndodhë sa më shpejtë. Deri në tejkalimin e problemit, do të sigurojmë ujë të pijshëm për banorët nga cisternat e Njësisë së zjarrfikësve”, thotë Isak Lazami, drejtor i NP Komunalec.

Komuna e Gostivarit dhe NP “Komunalec”, kërkojnë mirëkuptim nga banorët e fshatit Debresh.

Shërbimi për informim

Konsultime për fazën e dytë të projektit për përmirësim të furnizimit me ujë në komunën e Gostivarit

01.12.2017
Konsulentë të angazhuar nga Sekretariati Shtetëror për Çështje Ekonomike (SECO), në kuadër të Programit për ujësjellës dhe kanalizim, zhvilluan një takim pune me drejtorin e Ndërmarrjes Publike “Komunalec”, Isak Lazami dhe bashkëpunëtorët e tij.

Në kuadër të mbështetetjes që Komuna e Gostivarit e merr nga KfW Bank për hartimin e një Master Plani për furnizim me ujë, u propozua që të realizohet një pako e pranueshme masash të cilat do të financohen nga ana e KfW Bank dhe SECO në Hapin 2 të Fazës 2, me ç’rast nga SECO është shprehur qëllimi për të siguruar mjete financiare për investime plotësuese.

Nga Ndërmarrja publike, shprehën gatishmëri për bashkëpunim me konsulentët me qëllim të realizimit sa më të sukseshëm të fazave të mbetuar të projektit në fjalë.

Shërbimi për informim

Janë siguruar 120 mijë euro për ndërtimin e rrugëve lokale në Padalisht dhe Tërnovë

27.11.2017

Në kuadër të programit për zhvillim të infrastrukturës rurale të financuar nga Bashkimi Evropian dhe bashkëfinancuar nga buxheti kombëtar, Komuna e Gostivarit siguroi fonde në vlerë prej 120.000 euro. Programin e implementon Ministria e Financave, ndërsa i njëjti administrohet nga Banka Botërore.

Komuna e Gostivarit fitoi të drejtën për të shfrytëzuar BE grant në lartësi prej 90.000 euro për ndërtimin e dy rrugëve lokale, njëra në fshatin Padalisht dhe tjetra në fshatin Tërnovë. Vlera e përgjithshme e projekteve është 120.000 euro dhe të njëjtit bashkëfinancohen nga buxheti kombëtar në vlerë prej 30.000 euro.

Pritet që me ndërtimin e këtyre rrugëve të përmirësohet komunikacioni në këto vendbanime dhe të njëjtit të lidhen më mirë me qytetin e Gostivarit. Përfitimet nga këto projekte drejtpërdrejt do t’i ndjejnë të gjithë banorët e komunës së Gostivarit dhe do të mundësohen kushte më të sigurta për qarkullimin e këmbësorëve dhe automjeteve.

Shërbimi për informim

 

NP “Parkingjet publike dhe gjelbërimi” aksion për krasitjen e drunjve dhe pastrimin e shtartit të luimit në fshatin Debresh

29.11.2017

Në vigjilie të stinës së dimrit, Ndërmarrja publike “Parkingjet publike dhe gjelbërimi”, është para përmbylljes së aksionit për krasitjen e drunjve në sipërfaqet publike në qytetin e Gostivarit.

“Për momentin jemi duke punuar në krasitjen e drunjve në parkun e vogël të qytetit dhe aksioni tashmë është në fazën përfundimtare. Do t’i shfrytëzojmë në maksimum ditët me mot të përshtatshëm për punë, që gjelbrimin dhe drunjtë t’i sjellim në një gjendje të kënaqshme”, thotë drejtori i kësaj ndërmarrjeje, Muzafer Zulbeari.

Nga ana tjetër, po kjo ndërmarrje ka ndërmarrë aksion edhe për pastrimin e shtratit të lumit përreth Xhamisë në fshatin Debresh. Nga kjo ndërmarrje njoftojnë se askioni i këtillë ndërmerret shkaku se i njëjti ka qenë përplot me hedhurina dhe se aksioni i këtillë ka qenë një kërkesë e banorëve të fshatit.

Aksione për pastrimin e shtretërve të lumenjve nëpër fshatrat e komunës së Gostivarit, do të realizohen në kontinuitet, varësisht nga nevoja.

Shërbimi për informim

Me ekspozitën “Çmimi i Nëntorit” dhe koncertin “Paqe e miqësi nëpërmjet tingujve” u përmbyllën manifestimet për Ditën e Pavarësisë në Gostivar

29.11.2017

Ekspozita tradicionale mbarëkombëtare  “Çmimi i Nëntorit”, e cila organizohet nga ana e SHAFM “Draudacum” nga Gostivari dhe me koncertin “Paqe e miqësi nëpërmjet tingujve” me mjeshtër eminent të skenës muzikore shqiptare nga Elbasani, ishin aktivitetet përmbyllëse të organizuara në Gostivar për shënimin e Ditës së Flamurit, e që u mbështetën nga Komuna e Gostivarit.

Dy eventet kushtuar 28 Nëntorit, i përcollën një numër i madh i qytetarëve të Gostivarit, si dhe përfaqësues të Komunës së Gostivarit.

Në mungesë të kryetarit Taravari, fjalë përshëndetëse në ndarjen e Çmimit të Nëntorit, mbajti këshilltari komunal dr. Besim Memedi,i cili mes tjerash theksoi:

“Fëmija që fle rritet, ndërsa një popull që fle vdes, thoshte Ismail Qemali. Kjo ngjarje kulturore, tregon se ne nuk jemi popull i cili fle. Më lejoni që të përcjell përshëndetjet e kryetarit Arben Taravari, i cili për arsye objektive nuk mund të marrë pjesë fizikisht, por është prezent me shpirt. 28 Nëntori është një ditë të cilën e kemi festuar dhe do të vazhdojmë ta festojmë si më të shtrenjtën e ditëve. Gëzuar ditën e Pavarësisë, Shqipëri! Gëzuar Ditën e Flamurit, shqiptarë! Gëzuar 28 Nëntorin! Sinqertisht, Arben Taravari”, përcolli urimet e kryetarit Taravari, këshilltari komunal dr. Besim Memedi.

Në koncertin “Paqe e miqësi nëpërmjet tingujve”, me drejtor organizativ këngëtarin nga Gostivari Hajdar Hajdari, publiku gostivaras pati rastin të kënaqet me tingujt e këngës shqipe, por edhe të muzikës ballkanike për të përcjell mesazhin e paqes, tolerancës dhe miqësisë ndërmjet popujve.

Shërbimi për informim

Drejtorët e shkollave u emëruan për profesionalizmin e tyre, e jo për përkatësinë partiake

29.11.2017

Falënderojmë degën e BDI-së në Gostivar që shqetësohet se si i kryejmë punët ne në Komunë. Vetëm se këta të BDI-së janë peng i së shkuarës dhe duke qenë se në kohën e tyre vendimet e tyre i merrte vetëm një njeri, ende mendojnë se autokracia vazhdon! Jo! Kemi lajme të mira edhe për BDI-në. Vendimet tek ne nuk merren vetëm nga kryetari i komunës, z. Arben Taravari, por nga të gjithë njerëzit kompetentë të autorizuar nga ligji, së bashku me kryetarin. Iku koha e diktatorëve! Në këtë kontekst sqarojmë opinionin e shqetësuar të BDI-së, se të gjitha veprimet e punësimit janë ndërmarrë në pajtim me profesionalizmin dhe jo si në kohën e shkuar që njerëzve ju shikohej përkatësia partiake, e jo kualifikimi profesional.

Dhe sado që në Gostivar të gjithë e njohim njëri-tjetrin, si duket këta të BDI-së nuk e dinë se zonja Shpresa Useini nuk është kryetare e Forumit të Gruas të Aleancës për Shqiptarët, e që do të ishte nder dhe kënaqësi po të ishte, pasi kjo zonjë është një mësuese e cila prej vitesh punon me profesionalizëm të lartë në Shkollën fillore “Ismail Qemali” dhe ishte kolektivi i kësaj shkolle ai që e propozoi për të qenë në detyrën e dhënë në këtë institucion.

Kryetare e Forumit të Gruas e Aleancës për Shqiptarët është znj. Afërdita Mislimi Hamza, për të cilën jemi krenarë që e kemi në radhët e grupimit tonë. Kështu pra, dega e BDI-së në Gostivar, për çdo paqartësi mund të kontaktojë me personat përgjegjës pranë Komunës, që herën tjetër mos të duken gënjeshtarë.

Faleminderit,

Komuna e Gostivarit – Shërbimi për informim