Lajme

Program festiv për fëmijët me nevoja speciale nga Gostivari

22.12.2017

Me iniciativë të kryetarit të Komunës së Gostivarit, me mbështetje të restorantit “Vita Abi” dhe në bashkëpunim me Qendrën ditore, paralelet speciale, këngëtarëve dhe sportistëve gostivaras, sot u organizua një drekë e përbashkët e shoqëruar me program festiv për fëmijët me ngecje në zhvillim.

“E organizuam këtë event modest por shumë domethënës, që të shoqërohemi me këta fëmijë, të bashkëbisedojmë me edukatorеt e tyre, të kuptojmë se cilat janë nevojat për edukimin dhe arsimimin e këtyre fëmijëve, dhe të shohim se çka mundemi ne si Komunë të ndihmojmë për të krijuar kushte më të mira. Po ashtu erdhëm që tua urojmë edhe festat e fundvitit dhe si Komunë tu ndajmë dhurata të vogla të mundësuara nga pronari i restaurantit Albis”, theksoi kryetari i komunës së Gostivarit, dr. Arben Taravari.

Alsijan Snopçe – udhëheqëse e Sektorit për veprimtari publike pranë Komunës së Gostivarit, shpjegoi se në këtë ngjarje marrin pjesë nxënësit dhe edukatorët nga Qendra ditore për fëmijë me nevoja speciale dhe nga paralelet speciale të shkollave fillore “Ismail Qemali” dhe “M.K. Ataturk”.

“Me iniciativën e kryetarit vendosëm që ta realizojmë këtë aktivitet me qëllim që sa më shumë t’i sоcializojmë këta fëmijë, sepse trajtimi adekuat dhe socializimi atyre shumë u ndihmon në jetë. Do të desha të falënderoj me këtë rast restorantit “Vita Abi”, pronari i të cilit vazhdimisht ka ndihmuar njerëzit në nevojë dhe ka mbështetur shumë aktivitete me karakter social”, theksoi znj. Aslijan Snopçe.

Fëmijët patë rastin që të ndjekin një performancë nga karateistët e vegjël gostivaras të përgatitur nga kampioni evropian i karatesë Berat Jakupi, i bënte të qeshin maskota “Qenushi”- aktorja Vjollca Baftiu Zylbehari, ndërsa për disponimin e tyre u kujdesën këngëtarët Hajadar Hajdari – Dali dhe Betime Јакупи.

Nga Qendra ditore dhe paralelet speciale, falënderuan të gjithë ata të cilët kontribuuan për këtë aktivitet dhe shprehën shpresë për bashkëpunim më të madh në të ardhmen.

Shërbimi për informim

22/12/2017 in Arsim, Lajme

Bëhet hapi i parë për bashkëpunim të mirëfilltë ndërmjet Komunës së Gostivarit dhe sektorit joqeveritar

Kryetari i komunës së Gostivarit Arben Taravari, ftoi në takim përfaqësues të të gjitha organizatave joqeveritare që veprojnë në Gostivar. Ftesës iu përgjigjën gati se të gjitha organizatat, shoqatat dhe shoqëritë aktive që merren me sfera të ndryshme të jetës shoqërore.

Në takim, përfaqësuesit e OJQ-ve njoftuan kryetarin me punën dhe misionin e tyre si dhe me aktivitetet kryesore që kanë realizuar gjatë funksionimit të tyre. Nga kryetari Taravari, ata morën garanci se do ta kenë mbështetje të plotë nga ana e tij dhe bashkëpunëtorëve të tij dhe se kjo çështje do të standardizohet me hapa dhe veprime konkrete

Takimi u shfrytëzua për caktimin e një kornize për bashkëpunim të mirëfilltë ndërmjet Komunës dhe organizatave joqeveritare, me ç’rast nga të dyja palët u hodhën ide që të krijohet një trup i përbashkët koordinativ për bashkëpunim.

U ra dakord që si përfaqësues i Komunës së Gostivarit të caktohet Besim Dogani nga Zyra për ZHEL dhe implementim të projekteve, ndërsa nga sektori joqeveritar, drejtori ekzekutiv i ADI-t, Lulzim Haziri.

Po ashtu, kryetari Taravari u zotua se prej vitit të ardhshëm do të caktohet pozicion i veçantë në buxhetin komunal për mbështetje financiare të sektorit joqeveritar, si dhe se në ueb faqen zyrtare të Komunës së Gostivarit do të vendosen linqet e të gjitha OJV-ve lokale.

Në fund të takimit, u organizua një koktej rasti, ku kryetari të pranishmëve ua uroi edhe festat e fundvitit.

Shërbimi për informim

22/12/2017 in Lajme

“Stop gjuhës së urrejtjes” – shpërblehen veprat më të mira

Në Shkollën e Mesme Teknike Komunale “Gostivar” u hap dje ekspozita me fotografi të nxënësve të shkollave të mesme me temë “Jeto në harmoni me të tjerët”.

Aktiviteti është pjesë e projektit preventiv-edukativ “Thuaji JO gjuhës së urrejtjes”, bartës të të cilit janë Komuna e Gostivarit, Sektori për preventivë pranë SPB-Tetovë dhe OSBE-ja.

Në ekspozitë u gjetën njëzet fotografi të nxënësve nga të gjitha shkollat ​​e mesme publike të Gostivarit.

“Toleranca ndërmjet grupeve të ndryshme etnike është një temë shumë delikate. Ne si gostivaras e kultivojmë atë, dhe duhet edhe para të rinjve të tregojmë se sa e rëndësishme është ajo. Ky është pikërisht qëllimi i kësaj ekspozite”, tha Aslian Snopce nga Sektori i Arsimit pranë Komunës së Gostivarit.

Në hapjen e ekspozitës fjalë rasti pati edhe drejtori i shkollës teknike, Gajur Izairi, i cili theksoi: “Ndonjëherë mund të themi pa vetëdije ndonjë fjali ose fjalë e cila do të ofendonte dikë. Fotot e nxënësve bartin mesazh të fortë se çfarë është gjuha e urrejtjes, dhe se çfarë mirëkuptimi dhe toleranca “.

Autorët e veprave më të suksesshme, sipas përzgjdhjes të komisionit të posaçëm, morën çmime dhe mirënjohje nga organizatorët.

Më herët, në kuadër të të njëjtit projekt, nëpër shkolla u organizuan punëtori dhe ligjërata në temën përkatëse.

Shërbimi për informim

22/12/2017 in Arsim, Lajme

Dhjetë kryetarë komunash turke, u mirëpritën nga kryetari Arben Taravari

Sekretari i Lidhjes së Komuanve Turke dhe dhjetë kryetarë të komunave të ndryshme të Turqisë, vizituan sot komunën e Gostivarit, me ç’rast u mirëpritën nga kryetari Taravari.

Kryetari I komunës së Gostivarit, Arben Taravari theksoi se është një nder i veçantë për qytetarët e Gostivarit, që një kaq shumë kryetarë komunash mike nga Turqia, të vizitojnë komunën, gjë që dëshmon se bahskëpunimi dhe mbështetja nga qeveria dhe populli turk, do të vazhdojë në nivel akoma më të lartë n ëtë ardhmen.

“Falënderoj kryetarët e komunave për vizitën dhe për mbështetjen e deritashme, ku do të veçoja investimin në shkollën fillore Kemal Atarturk, që promovuam sot. Ua urova atyre ditën e arsimit turk dhe shpreha kënaqësinë time që kjo ditë, sivjet për herë të parë dhe gjithmonë në të ardhmen do të shënohet duke valavitur flamuri turk, për çka kemi edhe vendimin e Këshillit të Komunës me konsensus të plotë, respektivisht me mbështetjen e të gjithë 31 këshilltarëve komunalë, shqiptarë, maqedonas, turq dhe romë”, deklaroi Taravari.

Skkretari i Lidhjes së Komuanve Turke, Hayrettin Güngör tha se takimet e këtilla në të ardhmen do të jenë më të shpeshta dhe së bashku do të pronovjnë akoma më shumë projekte të rëndësishme.

“Falënderoj kryetarin e komunës së Gostivarit dhe bashkëpunëtorët e tij për mikpritjen e ngrohtë dhe vëllazërore. Ai më premtoi se bashkëpunimi mes nesh do të vazhdojë edhe më tutje. Ne këtu nuk ndjehemi të huaj për shkak se vijmë tek vëlllezërit tanë. Jam i bindur se komuna e Gostivarit dhe komunat tjera të Maqedonisë, nëse ne do të kishin ndonjë nevojë, do të na mbështetnin, andaj edhe ne i bëjmë me shumë vullnet këto vizita dhe ju siguroj se do të shihemi në përurime të shumë projekteve tjera këtu në Gostivar”, theksoi Güngör.

Me rastin e Ditës së arsimit turk, në përputhje me vendimin e Këshillit, sot para komunës, brenda në komunë dhe në rrugët e qytetit të Gostivarit, u vendos flamuri turk krahas atij shtetëror dhe flamurit kombëtar shqiptar.

Shërbimi për informim

 

21/12/2017 in Lajme

Në Ditën e Arsimit Turk, u promovua rikonstruktimi i plotë i SHF “M.K. Ataturk” – Gostivar

21.12.2017

Me rastin e Ditës së arsimit turk në Maqedoni, me një solemnitet madhështor në prani të funksionarëve të lartë shtetërorë nga Turqia dhe Maqedonia, u bë sot promovimi i rikonstruktimit të plotë të Shkollës fillore “Mustafa Kemal Ataturk” në Gostivar.

Inaugurimin, me prerje simbolike të shiritit, e bënë kryetari i komunës së Gostivarit, Arben Taravari dhe zv/kryeministri i parë i Turqisë Hakan Çavuşoğlu.

Në hollin e shkollës, para nxënësve të shkollës dhe prindërve, fjalë përshëndetëse mbajtën kryetari i komunës së Gostivarit Arben Taravari, zv/kryeministri i parë i Turqisë Hakan Çavuşoğlu, presidenti i TIKA-s Serdar Çam, minsitri në Qeverinë e Maqedonisë Adnan Kahil dhe drejtori i SHF “M.K. Ataturk” Nuredin Oktaj, ndërsa të pranishëm ishin edhe shumë personalitete tjerë të lartë nga jeta politike dhe shoqërore e Turqisë dhe Maqedonisë.

Në fjalën përshëndetëse, kryetari Arben Taravari falënderoi qeverinë turke dhe Agjencinë TIKA për suportin e plotë për rikonstruktimin e kësaj shkolle si dhe të projekteve tjera në komunën e Gostivarit. Ai po ashtu, në fjalën e tij, u ndal më shumë në bashkëjetesën në komunën e Gostivarit, e sidomos në afërsinë e popullit shqiptar me atë turk, duke veçuar kështu personalitete historikë që kanë kontribuar për të dy popujt.

“Një nga etnitë që jeton dhe ndërton përditë Gostivarin është pikërisht ajo turke, ndaj përkujtimi dhe festimi i kësaj date është një privilegj dhe kënaqësi për ne. Kështu fati e ka dhënë që këtu në Gostivar të jemi në rrethana të bashkëjetesës dhe ndaj në emër të gjithë qytetarëve të Gostivarit, në emrin e Komunës së Gostivarit dhe në emrin tim uroj Gëzuar Ditën e arsimit, respektivisht të alfabetit Turk! Qoftë Turqia një mike e mirë për ne! Qofshin gjithnjë shkronjat e këtij alfabeti shenja që formojnë fjalë paqeje dhe respekti!”, nënvizoi Taravari.

Në frymën e marrëdhënieve të mira ndëretnike, bashkëpunimit dhe tolerancës, ishin edhe diskutimet e folësve tjerë në këtë solemnitet, si dhe programi artistik i nxënësve të të tria nacionaliteteve që ndjekin mësimin në këtë shkollë në gjuhën turke, shqipe dhe maqedonase.

Në shenjë respekti për bashkëpunimin mes komunës dhe shkollës, kryetari Taravari dhe drejtori Nuredin shkëmbyen pllaketa me simbolin e institucioneve që ata i drejtojnë.

Pas mbarimit të ceremonisë, të pranishmit përshkuan ambientet e rinovuara të shkollës, e cila pas rikonstruktimit konsiderohet si një ndër shkollat me kushte më të mira në nivel nacional.

Rikonstruktimi i plotë i kësaj shkolle u bë falë financimit nga ana e Agjencisë Turke për Bashkëpunim dhe Koordinim TIKA, ndërsa vlera e projektit ishte 700 mijë euro.

Shërbimi për informim

21/12/2017 in Arsim, Lajme

Kryetari Taravari, priti në kabinetin e tij ambasadoren e Turqisë në Shkup, Tylin Erkal Kara

Kryetari i komunës së Gostivarit, Arben Taravari, priti dje në kabinetin e tij ambasadoren e Republikës së Turqisë në Shkup, znj. Tylin Erkal Kara.

Në takimin miqësor, kryetari Taravari dhe ambasadorja e Turqisë biseduan rreth bashkëpunimit të ngushtë ndërmjet shtetit turk dhe komunave të Turqisë me komunën e Gostivarit, me ç’rast u konstatua se ky bashkëpunim duhet jo vetëm të vazhdojë por akoma më shumë të thellohet.

Kryetari i komunës së Gostivarit, para takimit, deklaroi për media se ambasadorja Erkal Kara është një mike e Gostivarit dhe se kjo është një vizitë miqësore, por ku do të bisedohet edhe për planifikimet e zhvillimit të komunës, duke mos përjashtuar edhe mundësinë e investimeve nga Republika e Turqisë.

“Me ambasadoren e Turqisë, zonjën Tylin Erkal Kara, njihemi prej më herët, gjegjësisht prej kohës kur isha ministër i shëndetësisë. Ajo është një mike e komunës së Gostivarit dhe një mike e imja personale. Edhe pse vizita e sotme është një vizitë urimi, padyshim se do të bisedojmë edhe për planifikimet për zhvillimin e komunës, pse jo edhe për investime të mundshme të Republikës së Turqisë në komunën tonë”, deklaroi Taravari.

Ambasadorja Tylin Erkal Kara, ia uroi postin Taravarit duke shfaqur shpresën se ai do të jep kontribut për përkrahje të popullit turk në komunën e Gostivarit.

“Gjendem këtu sot fillimisht për ta uruar për postin kryetarin Taravari. Nga zgjedhjet e fundit lokale që u mbajtën këtu kanë kaluar rreth dy muaj dhe për këtë kam dashur që sa më parë të vij dhe ta uroj kryetarin. Ai për ne është një mik shumë i rëndësishëm. Komuna e Gostivarit ka një numër të konsiderueshëm të popullatës turke dhe jemi të bindur se kreu aktual i komunës, padyshim do t’i përkrahë turqit si komunitet në Gostivar” tha mes tjerash ambasadorja turke.

Ndryshe, ambasadorja Kara, e shoqëruar nga përfaqësues të kabinetit të kryetarit të komunës, vizitoi disa institucione publike dhe fetare në qytetin e Gostivarit.

Shërbimi për informim

20/12/2017 in Lajme

Ekspozitë për mirëkuptim dhe tolerancë mes nxënësve të etnive të ndryshme

19.12.2017

Në mjediset e Shkollës së mesme teknike në Gostivar, të enjten në ora 13:00 do të hapet ekspozita me mbi 20 fotografi të punuara nga po aq nxënës të katër shkollave të mesme të komunës së Gostivarit.

Tema e ekspozitës është “Jeto në harmoni me të tjetër” dhe është pjesë e projektit edukativ dhe prevenues “Thuaj jo gjuhës së urrejtjes” që nga muaji nëntor realizohet në qytetin e Gostivarit.

Paraprakisht, në shkollat e mesme të Gostivarit u realizuan ligjërata të veçanta me nxënësit e viteve të para, nga ku prej afër u njoftuan me nocionin gjuha e urrejtjes, si manifestohet ajo, si mund të konstatohet dhe implikimet që mund të vijnë nga ky veprim.

Për nxënësit më të suksesshëm të ekspozitës, organizatorët e konkursit, kanë paraparë mirënjohje dhe dhurata.

Shërbimi për informim

19/12/2017 in Lajme

Delegacioni turk viziton komunën e Gostivarit – tregojnë gatishmëri për mbështetje dhe investime

18.12.2017

Një delegacion nga Republika e Turqisë, i përbërë prej profesorësh të Universitetit “Sylejman Demirel” në qytetin Isparta, përfaqësues të partisë në pushtet AK Partisi, intelektualë dhe gazetarë, realizuan një takim pune me kryetarin e komunës së Gostivarit Arben Taravari.

Miqtë nga Turqia, uruan kryetarin Taravari për postin e ri duke i dëshiruar atij punë të suksesshme në mandatin katërvjeçar. Ata shfaqën interesimin dhe gatishmërinë që Republika e Turqisë të mbështesë dhe të investojë në institucionet ku trajtohen fëmijët me sindromën Daun, autizëm dhe pengesa tjera në zhvillim, si dhe për mbindërtim profesional të defektologëve, psikologëve dhe profesionistëve tjerë që merren me këto çështje.

Kryetari Taravari, tha se gjatë kampanjës i ka prezantuar qëndrimet e tia në lidhje me personat me nevoja speciale, dhe se kjo çështje do të shqyrtohet edhe në takimin me ambasadoren e Turqisë.

“Që nga ditët e para të mandatit tim, kam realizuar takime me organizata joqeveritare që merren me këto çështje dhe kam marrë pjesë në aktivitetet e tyre për të treguar konkretisht mbështetjen që ata gëzojnë nga ana ime dhe ekipit tim”, theksoi Taravari.

Në takim morën pjesë edhe kryetari i Lëvizjes për Unitet Kombëtar të Turqve (TMBH), Erdogan Saraç, si dhe këshilltari komunal nga radhët e kësaj partie, Ertan Jakupi.

Në kuadër të vizitës, delegacioni turk do të vizitojë mjediset e ish Fakultetit të teknologjisë ushqimore, ku do të bëjë hulumtim terreni që në bashkëpunim me Komunën e Gostivarit të gjednen modalitete për shfrytëzim racional të këtij objekti.

Shërbimi për informim

 

19/12/2017 in Lajme

Një delegacion i Komunës së Gostivarit në takim pune në Komunën e Prishtinës

14.12.2017

Në kuadër të bashkëpunimit me komunat nga rajoni më i gjerë, një delegacion i komunës së Gostivarit në përbërje Seadin Ejupi – shef i kabinetit të kryetarit, Jasin Demiri – zëdhënës i komunës dhe Rijat Abdullai – këshilltar i jashtëm i komunës, realizuan dje një takim pune në Komunën e Prishtinës.

Ata u pritën nga z. Muhedin Nushi – drejtor i Drejtorisë së Administratës pranë Komunës së Prishtinës dhe bashkëpunëtorët e tij.

Gjatë vizitës, delegacionin e komunës së Gostivarit, nikoqirët e njoftuan nga afër me mënyrën e funksionimit të administratës komunale dhe gatishmërinë për bashkëpunim dhe shkëmbim përvojash midis dy komunave, sidomos në aspekt të rritjes së transparencës se komunës ndaj qytetarëve dhe kontributin direkt të tyre në procesin e vendimmarrjes për probleme që i tangojnë ata.

Ejupi, Demiri dhe Abdullai i uruan udhëheqësit komunalë për fitoren e dytë, si një konfirmim për punën e tyre të suksesshme në mandatin e parë të qeverisjes.

Drejtori i Drejtorisë së administratës pranë Komunës së Prishtinës, Muhedin Nushi i cili njëkohësisht është edhe zëvendës i kryetarit Shpend Ahmeti, tha se planifikojnë që së shpejti të realizojnë një vizitë në komunës e Gostivarit dhe urimet për zgjedhjen e tij personalisht t’ia shprehin kryetarit të komunës së Gostivarit, Arben Taravari.

Shërbimi për informim 

15/12/2017 in Lajme

Hapet në Gostivar ekspozita udhëtuese “Ana Frank – Historia për sot”

14.12.2017

Mbrëmë në Qendrën për kulturë në Gostivar, u Ekspozita udhëtuese “Ana Frank – Historia për sot” organizuar nga Forumi Rinor Arsimor. Në hapjen solemne të ekspozitës morën pjesë kryesisht nxënës të shkollave të mesme të Gostivarit, të cilët u njoftuan me mesazhet e gazetares dhe shkrimtares Ana Frank, si simbol i qëndresës dhe paqes.

Të pranishmit, në emër të kryetarit të komunës së Gostivarit, Arben Taravari, i përshëndeti përfaqësuesja e kabinetit të tij, Afërdita Hamza.

“Përgëzoj organizatorët për këtë aktivitet, njëkohësisht i falënderoj që përzgjodhën qytetin tonë për mbajtjen e kësaj ekspozite. Komuna e Gostivarit, është e hapur për bashkëpunim me sektorin joqeveritar dhe do t’i mbështesë ata në organizime të këtilla të cilat dërgojnë mesazhe për paqe dhe tolerancë”, theksoi znj. Hamza.

Ekspozita “Ana Frank – Historia për sot” është një koleksion prej tridhjetë e nëntë paneleve ekspozuese, të përkthyera në gjuhën maqedonase dhe shqipe, të cilat mbajnë detaje të shumta rreth jetës së vogëlushes Ana dhe familjes së saj, nga Lufta e Dytë Botërore.

Ekspozita do të jetë e hapur për vizitorët deri më 30 dhjetor 2017, dhe hyrja është falas.

Ѕhërbimi për informim

15/12/2017 in Lajme