Sektori për Përkrahje të Kryetarit, në kuadër të administratës komunale të Komunës së Gostivarit, kryen punët protokollare për nevojat e Kryetarit të Komunës, organizon mbledhjet dhe takimet e Kryetarit me persona të brendshëm dhe të jashtëm dhe përgatit shënimet dhe procesverbalet nga takimet dhe mbledhjet e tij.

Ky sektor organizon dhe zbaton informimin e publikut dhe të mediave për aktivitetet e organeve komunale, ndërmarrjeve publike dhe institucioneve publike në kompetencë të komunës, kryen detyrat që kanë të bëjnë me qasjen e lirë në informacione me karakter publik dhe kujdeset për postimin e informacioneve në ueb faqen e komunës. Gjithashtu, pranon dhe u përgjigjet me kohë parashtresave dhe propozimeve të qytetarëve.

Sektori ofron mbështetje për punën e Këshillit të Komunës, duke përgatitur dhe organizuar seancat e Këshillit dhe punën e komisioneve të tij, duke përgatitur materialet dhe procesverbalet nga seancat, si dhe Buletinin zyrtar të komunës.

Në kuadër të kompetencave të tij janë edhe koordinimi dhe planifikimi i zhvillimit ekonomik lokal, propozimi i prioriteteve zhvillimore dhe strukturore të komunës, koordinimi i aktiviteteve lidhur me marrjen dhe orientimin e donacioneve për qëllime zhvillimore, si dhe promovimi i politikës së integritetit dhe i mundësive të barabarta për burrat dhe gratë.