Sektori për Veprimtari Publike, në kuadër të administratës komunale të Komunës së Gostivarit, përcjell dhe kujdeset për zbatimin e rregulloreve ligjore që kanë të bëjnë me veprimtaritë publike: arsimin, kulturën, sportin, mbrojtjen sociale, mbrojtjen e fëmijëve, kujdesin shëndetësor dhe barazinë gjinore.

Në fushën e arsimit, sektori përcjell punën e shkollave dhe të kopshteve komunale, kujdeset për themelimin, financimin dhe administrimin e shkollave fillore e të mesme dhe të kopshteve për fëmijë në përputhje me ligjin, jep mendime dhe analiza për programet, raportet dhe aktet e shkollave para miratimit në Këshill, si dhe propozon dhe zbaton masa për organizimin e transportit dhe ushqimit për nxënësit.

Ky sektor organizon projekte në fushën e veprimtarive publike në nivel lokal, ngjarje kulturore e sportive dhe aksione humanitare, jep mbështetje institucionale për institucionet dhe projektet kulturore dhe kujdeset për zhvillimin e aktiviteteve sportive masive e rekreative, si dhe për përkrahjen e klubeve sportive të regjistruara në territorin e komunës.

Gjithashtu, sektori propozon dhe zbaton masa për mbrojtjen sociale, të fëmijëve dhe shëndetësore në territorin e komunës, përgatit programe dhe raporte vjetore pune në fushat e tij dhe bashkëpunon me shkollat, kopshtet, shoqatat kulturore e sportive, institucionet shtetërore, ministritë përkatëse dhe sektorin joqeveritar.