Sektori për Resurse Njerëzore, në kuadër të administratës komunale të Komunës së Gostivarit, përcjell, studion dhe zbaton rregulloret ligjore në fushën e resurseve njerëzore, të vetëqeverisjes lokale dhe të marrëdhënieve të punës. Sektori përgatit analizën funksionale të vendeve të punës në komunë dhe ofron mbështetje metodologjike, organizative dhe teknike në përgatitjen e akteve për organizimin e brendshëm dhe sistematizimin e vendeve të punës.

Ky sektor siguron mbështetje profesionale-operative dhe logjistike në zbatimin e planit vjetor të punësimit në administratën komunale, zbaton procedurat për plotësimin e vendeve të lira të punës, si dhe procedurat për avancimin dhe mobilitetin e nëpunësve dhe të punonjësve të tjerë në administratën komunale.

Gjithashtu, koordinon sistemin e vlerësimit të të punësuarve, përgatit analizën e nevojave për trajnim dhe programin vjetor të trajnimit, si dhe zhvillon politika dhe udhëzime për përmirësimin e kulturës së brendshme dhe të mënyrës së punës në administratën komunale.

Sektori mban evidencën personale të punonjësve dhe evidencën për praninë në punë, koordinon planin për shfrytëzimin e pushimeve, kryen regjistrimin dhe çregjistrimin e punonjësve në organet dhe shërbimet kompetente dhe përgatit aktet që kanë të bëjnë me punësimin, të drejtat, detyrat, përgjegjësitë dhe ndërprerjen e marrëdhënies së punës. Punët kryhen edhe përmes sistemit elektronik për resurse njerëzore HRMIS.