Sektori për Administrim të të Ardhurave, në kuadër të administratës komunale të Komunës së Gostivarit, zbaton politikën e përcaktuar në fushën e përcaktimit dhe mbledhjes së tatimeve, taksave dhe kompensimeve të tjera, si dhe përcjell dhe zbaton rregulloret ligjore dhe aktet e tjera të përgjithshme në fushën e burimeve të të ardhurave të komunës.

Sektori përcakton dhe regjistron detyrimet për tatimin në pronë dhe për taksat komunale, identifikon dhe regjistron pasurinë e tatimpaguesve dhe mban regjistrat e pasurive të paluajtshme dhe të luajtshme, të cilët i harmonizon rregullisht me regjistrin e mbajtur nga Enti Shtetëror për Punë Gjeodezike.

Ky sektor kryen punët për përcaktimin dhe mbledhjen e tatimit në qarkullimin e pasurive të paluajtshme dhe të tatimit në trashëgimi dhe dhuratë, si dhe për përcaktimin e vlerës së tregut të pasurive të paluajtshme. Gjithashtu, organizon mbledhjen e detyrueshme të tatimeve, taksave dhe kompensimeve të tjera dhe udhëheq procedurat e ankimit në këto fusha.

Sektori përgatit raporte, analiza dhe informacione për realizimin e tatimeve, taksave dhe kompensimeve vendore, propozon akte për ndryshimin e normave të tatimeve vendore brenda kuadrit ligjor dhe merr pjesë në hartimin e vendimeve, rregulloreve dhe akteve të tjera në këtë fushë.