Секторот за јавни дејности, во рамките на општинската администрација на Општина Гостивар, ги следи и се грижи за спроведувањето на законските прописи што се однесуваат на јавните дејности: образованието, културата, спортот, социјалната заштита, заштитата на децата, здравствената заштита и родовата еднаквост.

Во областа на образованието, секторот ја следи работата на училиштата и општинските детски градинки, се грижи за основањето, финансирањето и управувањето со основните и средните училишта и детските градинки во согласност со законот, дава мислења и анализи за програмите, извештаите и актите на училиштата пред нивното усвојување во Советот, како и предлага и спроведува мерки за организирање на превоз и исхрана за учениците.

Овој сектор организира проекти од областа на јавните дејности на локално ниво, културни и спортски манифестации и хуманитарни акции, дава институционална поддршка за културните институции и проекти и се грижи за развој на масовните и рекреативните спортски активности, како и за поддршка на спортските клубови регистрирани на територијата на општината.

Исто така, секторот предлага и спроведува мерки за социјална, детска и здравствена заштита на територијата на општината, подготвува програми и годишни извештаи за работа во своите области и соработува со училиштата, градинките, културните и спортските здруженија, државните институции, релевантните министерства и невладиниот сектор.