Секторот за урбанизам, планирање и уредување на просторот, во рамките на општинската администрација на Општина Гостивар, ги води постапките за урбанистичко и рурално планирање во општината, вклучувајќи ги постапките за донесување на Генералниот урбанистички план, ДУП-овите, урбанистичките планови за селата и вон населените места, како и локалната урбанистичка документација и урбанистичко-архитектонските проекти.

Секторот издава изводи од урбанистичките планови и одобренија за градба, користење, прилагодување и пренамена на објекти од локално значење, издава дозволи за градба на објекти од втора категорија, утврдени согласно законот за градба, и ги спроведува постапките за технички прием на објектите. Исто така, ја спроведува постапката за утврдување на правниот статус на бесправно изградените објекти.

Овој сектор утврдува стандарди и дава согласности за поставување на привремени објекти, урбана опрема и реквизити на територијата на општината, ги контролира и одобрува елаборатите за нивно поставување и врши консултации за подготовка на Годишната програма за привремени објекти и урбана опрема.

Во областа на градежното земјиште, секторот ја подготвува проектната програма за градежно земјиште, ги спроведува постапките за отуѓување и давање под закуп на градежно земјиште во сопственост на Република Северна Македонија на територијата на општината, подготвува проектни договори за долгорочен и краткорочен закуп и го пресметува надоместокот за уредување на градежното земјиште. Исто така, ги следи условите за уредување и одржување на јавното зеленило.